الفطريات حيث ترقد البيرة والمشروم
كتبت – يارا كمال
فكرة إن المشروم والزبادي والخميرة قرايب العفن اللي بيبقى على سطح الأكل لما بننساه في التلاجة دي بتقشعرني، بس الصراحة دي نقرة ودي نقرة وصوابعك مش زي بعضها.
الفطريات – اللي قولناه في الأول ده كله تبعها – فيها الطفيلي اللي بيمتص الغذا من الكائنات الحية وممكن ده يخلّي الكائنات دي تضرر أو تمرض، وفيها اللي بيمتص الغذا من الكائنات الميتة، وفيها اللي فيد واستفيد، يعني مثلاً هي تقدر تحلل مواد الكائنات الحية متقدرش تحللها، وتاخد جزء في المواد دي وتدي الباقي للكائن الحي مقابل إنها تفضل عايشة جواه، وفيه منهم الطفيلي اللي ممكن يعيش على أجسام الرمم لو جاتله الفرصة، وفيه العكس.
الفطريات كانت زمان تابعة لمملكة النبات، وعشان هي معندهاش كلوروفيل وبالتالي مبتعملش عملية البناء الضوئي، بقى ليها مملكة لوحدها اسمها
(الكائنات الحية كلها بتتبع لخمس ممالك: مملكة الوحدانيات “Monera”– ودي كائنات ليها خلية واحدة بس الخلية مفيهاش نواة اللي هي بتنظم أنشطة الخلية وبتحمل المادة الوراثية لخلية، ولا فيها أي عضيات (أجهزة صغيرة)، ومملكة الأولانيات “Protista”- ودي كائنات عندها خلية واحدة وعضيات ونواة وبتتحرك بس الخلية بتاعتها ملهاش جدار، ومملكة الفطريات، ومملكة النباتات، ومملكة الحيوانات.)
فيه طريقتين الفطريات بتجمع بيها الأكل؛
يا إما أنابيب مجوفة وعاملة زي الخيوط اسمها (Mycelium) ”أفطورة“ أو خلايا لوحدها كدة اسمها (Yeasts) أو خميرة. بس قبل الفطريات ما تمتص الأكل، لازم تحلل مواده المركبة قبل ما تخش جسمها، فبتفرز إنزيمات هضمية تحلل المواد دي وتحولها لمواد بسيطة.
فيه فطريات بتتشاف من غير ميكروسكوب وفيه اللي لا يرى بالعين المجردة، بس عموماً الجزء اللي بيتشاف من الفطر هو الـ(Sporophore) اللي هو الجزء اللي بيحصل من خلاله التكاثر. فيه فطريات بيوصل قطرها لـ150 سنتيمتر، وفي الحالة دي الـ(Spores) اللي فيها ممكن توصل لكذا تريليون.
هو إيه الـ(Spores) دي؟
الفطريات بتتكاثر عن طريق حاجة اسمها أو (Spores) على شكل خيوط زي الـ(Mycelium) أو على شكل خلايا لوحدها كده زي الـ(Yeasts) أو الخميرة. ممكن التكاثر ده يبقى جنسي، زي عندنا كدة يبقى فيه والدين (أب وأم مثلا) للفطر الجديد، الاتنين بيورثوه صفات وبكده الكائن الجديد ده يبقى فيه صفات مختلفة عن الوالدين، أو يبقى تكاثر لا جنسي، بمعني إن الكائن الجديد يكون ليه والد واحد، وبيطلع شبهه بالظبط.
اتفقنا إن فيه فطريات بتتطفل على الكائنات وممكن تسببلها أمراض، يعني بالنسبة للبني آدمين ممكن تسببلهم أمراض زي القوباء الحلقية (Ringworm) وده عبارة عن بقع على شكل حلقات، قدم الرياضي (Athlete’s foot) (وده مرض بيصيب جلد القدم)، وداء المبيضات (Candidiasis) وده مرض بيسبب بقع بيضا في البؤ والزور، وبقع وطفح جلدي في الفخد وبين الصوابع، وتحت الصدر، وحكة في المهبل). وبيصيب كمان النباتات والحيوانات بأمراض.
مع ذلك، الفطريات ليها فوايد كتير.
أولاً، التربة فيها مكونات معقدة والنباتات متقدرش تمتصها إلا لما بعض الفطريات والبكتريا تحللها.
ثانياً، فيه أنواع فطريات بتتاكل
رابعاً، حد زي عالم البكتريا الاسكتلندي ”ألكسندر فليمنج“ في سنة 1928 اكتشف البنسلين (مضاد حيوي) من عفن أخضر اسمه (Penicillium Notatum). وفيه مرض اسمه الأرغوت، بيصيب النبات بسبب فطر. المرض ده مصدر لأدوية زي اللي بتعمل طلق صناعي، وبتسيطر على النزيف بعد الولادة، وكمان هو مصدر لعقار هلوسة (Lysergic Acid Diethylamide). وفيه فطريات تانية، بتستخدم في أدوية زي الأدوية اللي بتتحكم في مستوى الكوليسترول في الجسم، وبتمنع مرض القلب التاجي.
وكمان الفطريات بتستخدم في إنتاج الأحماض الحيوية والإنزيمات والفيتامينات.
دي أبسط استخدامات الفطريات، اللي هي أصلاً مثيرة للدهشة. فيه استخدامات أغرب وأنواع من الفطريات أغرب، بس ده ميمنعش إن الحياة الطبيعية للفطريات مبهرة. هنتكلم عن كل ده في ملفنا.
الحلقة التانية من الملف:
حاكم الفطريات لكل لون معنى ومغنى – الجزء الأول
حاكم الفطريات لكل لون معنى ومغنى – الجزء التاني
الحلقة التالتة من الملف:
العفش من دمياط ولا فطريات؟
المصادر: botany books.google ruf.rice micro.magne .botany.hawaii umm.edu
