اليوم العالمي للطيور المهاجرة: خطر البلاستيك مش بس على السمك
كتبت: مها طــه
يوم 11 مايو من كل سنة بيوافق اليوم العالمي لهجرة الطيور، ولكل سنة شعار بتتبناه الجهات المهتمة بالحفاظ على البيئة وعلى سلامة الطيور المهاجرة وتقليل الأخطار اللي بتتعرض لها في رحلات هجرتها اليومية أو الموسمية، شعار السنة دي هو “حماية الطيور: كن الحل لمواجهة تلوث البلاستيك”. ولو فاكر إن الطيور مش متأثرة بأزمة تراكم البلاستيك في البيئة والمحيطات، أحب أقولك إنه بالعكس الطيور بتواجه خطر كبير جدًا بسبب البلاستيك.
اعرف أكتر| كل الطيور بتهاجر وبترجع أرضها .. ده لو ماحدش اصطادها!
تلوث البلاستيك.. أزمة تتصاعد
بداية ظهور البلاستيك كانت سنة 1907، ومن بعدها بدأت عمليات تصنيع البلاستيك بشكل واسع، لكن لحد الخمسينات كان الموضوع طبيعي ومش ملحوظ، ومن وقتها وعلى مدار 65 سنة بدأ إنتاج البلاستيك يتضاعف سنويًا ويدخل في كل حاجة حوالينا، لدرجة إنه في 2015 وصل إنتاج البلاستيك عالميًا لحوالي 381 طن، يعني تقريبًا كدة قد كتلة تلتين سكان الأرض.
ولأن صناعات البلاستيك تعتبر من أكبر الصناعات في العالم ومنتشرة في كل مكان، فالأرقام كل سنة في زيادة، وللأسف البيئة بكل مكوناتها هي اللي بتدفع التمن الغالي، وبعيدًا عن التأثير الكبير على الكائنات البحرية بسبب تراكم البلاستيك في المحيطات، بدأ الخطر كمان يشمل الطيور اللي بتتغذى على الكائنات البحرية وأحيانًا على البلاستيك نفسه من غير ما تقصد وبكدة دايرة الخطر بتوسع.
سنة 1960، كان عدد الطيور البحرية اللي بتحتوى أمعائها على البلاستيك حوالي 5%، لكن العدد ده فضل يتضاعف بشكل مستمر لحد ما وصل لـ80% سنة 2010، ولذلك مش لازم نستغرب لما نعرف إن عدد الطيور البحرية اللي بتموت كل سنة بيقدر بحوالي مليون طائر، ومن المتوقع إنه بحلول سنة 2050 _لو استمر الوضع على ما هو عليه_ إن 99% من الطيور هتبقى بتاكل البلاستيك، وده طبعًا يفسر ارتفاع أعداد الوفيات للطيور بسبب تلوث البلاستيك.
في الأغلب وقعت عينك قبل كده على صورة لطائر ما ومعدته مليانة ببواقي بلاستيك وغطيان أزايز وغيره، لو فاكر إن ده بيحصل بعيد عنك أحب أقولك إنه للأسف لأ، لأن مصر تعتبر واحدة من أهم المحطات اللي بتمر بيها الطيور البحرية في أثناء رحلات هجرتها، ولذلك إزازة المياه ولا العصير البلاستيك اللي رميتها في البحر في الأغلب هيجي طائر وياكل منها.
اعرف أكتر| كائنات بتقرقش البلاستيك أو العكس!
ليه الطيور بتاكل البلاستيك؟
في أسباب مختلفة تخلي الطيور البحرية تاكل البلاستيك:
- أوقات بتكون قطع البلاستيك صغيرة أوي وعائمة في المحيط، وبالتالي الطيور بتتلخبط فيها وتفتكرها أكل عادي فتبلعها.
- وأوقات بيكون للبلاستيك ريحة شبه ريحة كائنات تانية بتتغذى عليها الطيور. مثلًا “الكريل” وده كائن بحري بيتغذى على الطحالب اللي عايمة في المياه وطبعًا عليها فتافيت بلاستيك اللي بتخلي ريحته مثيرة للطيور وشبه الريحة الطبيعية اللي بتتبعها الطيور عشان تصطاد الأكل.
- أوقات بتكون المشكلة سببها إن البلاستيك وزنه خفيف، وبالتالي بيطفو على وش المية. هتلاقي أنواع معينة من الطيور زي الباتروس (القطرس) بتتغذى عليه بالغلط، لأنها بتتغذى من على السطح وبالتالي بتاكل البلاستيك.
ولو فاكرين إن المشكلة دي بتؤثر بس على الطيور البحرية فللأسف ده اعتقاد غلط، لأن الرياح قادرة إنها تشيل معاها جزيئات كتير من البلاستيك وتوصل بيه لمناطق تبعد آلاف الكيلومترات عن المحيطات والبحار، وده اللي بيخلينا نقول إن مفيش طائر بعيد عن الخطر ده.
إيه اللي بيحصل لما الطيور تاكل البلاستيك؟
تاثير أكل البلاستيك على الطيور مختلف، وبيعتمد على كمية ونوع البلاستيك اللي أكلوه، يعني مثلًا في بعض الطيور بتموت بمجرد ما تبلع البلاستيك الحاد لأنه بيتسبب في ضرر بالغ لأعضائها الداخلية، وبعض الطيور التانية بتموت بسبب نقص العناصر الغذائية اللي داخلة للجسم، لأنها بياكلوا بلاستيك وبيملا بطنهم وفي المقابل مفيش أي فايدة غذائية دخلت الجسم.
الخطير كمان، إنه حاليًا بدأت ترتفع مؤشرات موت الطيور كنتيجة للتسمم بالمواد الكيميائية الموجودة على البلاستيك. الموضوع كمان بيمتد من الطيور البالغة للصغار، لأن الطيور في أثناء رحلة بحثها عن الأكل زي ما قولنا ممكن تاخد معاها كميات من البلاستيك الصغير وتطعمه للصغار، ولأن معدتهم بتكون أضعف بالتأكيد بيموتوا حتى قبل ما يوصلوا للبلوغ، يعني يبقى الموت من كله، كبار وصغيرين ومفيش تعويض للفقد.
كل اللي فات ده كان كلام عن فتافيت وأجزاء بلاستيك صغيرة كبيرها غطاء إزازة، طب بالنسبة للأجزاء الكبيرة؟ أحب أقولك إن الطيور برضه هي اللي بتدفع التمن، لأن أخطار البلاستيك اللي بتهدد حياة الطيور مش واقفة عند فكرة الأكل وبس، لكنها كمان ممتدة لإعاقة الطيور عن الحركة والتسبب في غرقها.
تخيل معايا إن كل سنة بيدخل محيطات العالم حوالي 8 طن من نفايات البلاستيك، واللي طبعًا بتفضل وتتراكم لحد ما تيجي السنة اللي بعدها يترمي غيرهم وهكذا، ومهما استهلكت فيها الكائنات البحرية والطيور بيفضل منها الأجزاء الكبيرة اللي بتشبك فيها الطيور وماتعرفش تتحرك بسببها، وبالتالي يا إما هتغرق أو هتبقى عرضة لحيوان مفترس ما ييجي ياكلها.
اعرف أكتر| البلاستيك والحيتان.. الزيادة تعني النقصان
طب يا ترى دورنا إيه؟
خلينا عارفين إن ازازة المياه البلاستيك الواحدة بتاخد حوالي 450 سنة لحد ما تتحلل، أما عن شباك الصيد البلاستيك فممكن تاخد في البيئة حوالي 600 سنة لحد ما تتحلل، تخيل إن كل بالونة ولا كيس بلاستيك بترميه بيعتبر خطر وتهديد مباشر لكتير من الكائنات البحرية وعلى رأسها السلاحف لأنها بتفتكرها قناديل بحر وبتاكلها فتختنق وتموت.
ولذلك لازم العالم كله يتوجه في الفترة الجاية للتقليل من استهلاك المنتجات البلاستيكية واستبدالها بمنتجات قابلة لإعادة الاستخدام أو إعادة التدوير، ونحاول نرجع تاني للشنطة القماش اللي كانت الستات زمان بتجيب فيها الخضار ومتطلبات البيت بدل الأكياس البلاستيك، لازم كمان كل ما تشوف حد بيرمي بلاستيك في الشارع تبعتله المقال ده وباقي مقالاتنا عن أخطار البلاستيك يمكن في يوم نقدر ننقذ حيوان واحد ونكفر عن ذنبنا في حقهم.
المصادر: ourworldindata nationalgeographic iflscience bird-rescue
