الكبد راح في غيبوبة!
كتبت: يارا كمال
فاكرين حمادة عزو لما وقع في الجنينة بعد ما أكل البليلة لما ماما نونا ماتت؟ هو راح في غيبوبة سكر، بس مش أي غيبوبة تبقى غيبوبة سكر، في حاجة اسمها ”غيبوبة كبدية“ أو غيبوبة الكبد. الغيبوبة دي ممكن تيجي للناس اللي في مرحلة متقدمة من التليّف الكبدي غير المتكافئ، لإن الكبد ما بيقدرش يتخلّص من السموم.
طب إيه الحاجات اللي ممكن تخلي المرضى دول ييجي لهم غيبوبة كبدية؟
- الإمساك أو الإسهال الشديد.
- إن المريض ياكل بروتينات حيوانية كتير.
- إنه يستخدم أدوية مدرّة للبول زيادة عن اللزوم.
- ارتفاع درجة حرارة المريض نتيجة الإصابة ببعض الميكروبات.
- النزيف الشديد بسبب دوالي المرئ أو قرحة المعدة أو الإثنى عشر.
وممكن كمان تحصل بسبب تدهور حالة كبد المريض مش أكتر. بس لحسن الحظ، بيبقى فيه مرحلتين للغيبوبة ممكن يدّونا فرصة نلحقها فيها. في مرحلة ما قبل الغيبوبة، واللي فيها بنلاقي المريض مش مركّز ولا واعي أوي، وبتحصل له اضطرابات في النوم، وشوية تغييرات في شخصيته، يعني ممكن يبقى عصبي شوية، وإيده بتترعش، أو مبيقدرش يتحكم في البول والبراز.
لما المريض بيوصل لمرحلة الغيبوبة الكاملة، بيبدأ يبقى كلامه مش مفهوم، وإيديه بتترعش لدرجة إنه لو مدّها قدامه هتتحرّك حركة زي الرفرفة، وهتفضل تتكرر بمعدل مرتين تلات مرات في الثانية الواحدة.
طب إيه الإسعافات الأولية في الحالة دي؟
لو المريض في المراحل الأولى للغيبوبة، بيتعمل له حقنة شرجية كل 6 ساعات، وبياخد لاكتيلوز بمعدل معلقتين كبار كل 8 ساعات، ويوقف أدوية المدّرة للبول، ويمنع الأكل اللي فيه بروتينات حيوانية، وده حسب كلام د. جمال شيحة، أستاذ ورئيس وحدة الكبد والجهاز الهضمي في جامعة المنصورة. لكن لو دخلنا في مرحلة الغيبوبة الكاملة، لازم المريض يتنقل المستشفى، وكمان عشان يعرفوا سبب الغيبوبة، لإن فيه غيبوبة بييجي معاها نزيف داخلي من دوالي المرئ.
المصادر
كتاب “100 سؤال عن الكبد” – تأليف/ أ.د. جمال شيحة – الهيئة المصرية العامة للكتاب
