الكائنات الدقيقة ”ميكروبيوم“: ليها فيك أكتر ما ليك!
كتب: أحمد حسين
معظم الناس عارفين إن جسم الإنسان عبارة عن قلب ورئتين وكبد وكليتين وأنف وعينين وفم وأذنين مع حمض نووي وشوية جينات فوق بعض. واللي بيتكون منه كل حاجة من الحاجات دي على حدا هي الخلية، الخلايا وحدات بنائية أساسية في الجسم. الخلية دي هي اللي في النهاية بتوصفك، بتوصف مين إنت وإيه شكلك ولونك والحاجات دي، لحد هنا والموضوع عادي.
الكائنات الدقيقة ”ميكروبيوم“: أنا 10% من نفسي بس!
اللي مش عادي بقى، إن قدام كل خلية من دول في حوالي 10 كائنات دقيقة تانية مهمين جدًا لحياتك. يعني الرقم كده يطلع تقريبًا 100 تريليون كائن دقيق عايش عليك وبداخلك، واللي اكتسبت معظمهم عن طريق الفم والأذن والأنف خلال حياتك، وده معناه إن نسبة الخلايا اللي بتوصفك (بتوصف صفاتك) في النهاية كلها على بعضها حوالي 10% بس، وباقي الـ90% عبارة عن كائنات دقيقة.
الكائنات الدقيقة دي بقى بيُطلق عليها ”ميكروبيوم – Microbiome“، الكائنات دي لوحدها بتمتلك حوالي 22 مليون جين خاص بالحمض النووي بتاعهم، واللي مش بس بيخليهم عايشين ومتعايشين لأ، ده كمان بيمكنّهم إنهم يتحكموا في مئات من العمليات في جسمك، زي إنهم بيساعدوا المعدة تهضم الأكل، وبيساعدوا الجهاز المناعي إنه يفضل سليم، وكمان بيساعدوك إنت شخصيًا في التخلص من الجوع.
ولو حسيت في مرة إنك متوتر أو حاجة، الكائنات الدقيقة اللي عايشين جوا جسمك بيساعدوا المخ يفرز هرمونات تساعدك في التخلص من التوتر ده. زي ما أظهرت التجارب إن الفيران اللي بيتربوا في بيئة معقمة تمامًا ومابيكتسبوش الكائنات الدقيقة دي، بيكون رد فعلهم على التوتر أكبر بكتير من الفيران العادية.
طيب معرفة موضوع الكائنات الدقيقة ده كان مفيد لينا في إيه غير إننا نعرف إن عددهم كبير جدًا كده؟ الحقيقة الحقيقة اكتشاف الكائنات دي ساعد العلماء في ابتكار طرق علاج جديدة لبعض الأمراض. عمرك سمعت عن ”زراعة/نقل البراز – Poop Transplant“؟ ده شيء حقيقي جدًا على فكرة وفعلًا بيعالج بعض الأمراض.
في بعض الكائنات الدقيقة _الأشرار منهم_ عندهم القدرة على إصابتك بالمرض، أو على الأقل عندهم القدرة على إنهم يخلوك شخص سريع التأثّر وبتصاب بالأمراض بسرعة. العلماء بقى اكتشفوا إنهم لو زرعوا براز شخص سليم، كائناته الدقيقة مش بتتسبب في مرضه، في معدة الشخص اللي كائناته الدقيقة شريرة وبتصيبه بالمرض، ممكن فعلًا الموضوع ده يعالجه بشكل أفضل من أي مضاد حيوي.
العلماء طبعًا ماوقفوش عند النقطة دي بس، عملوا تجارب كمان على الفيران، واكتشفوا إنهم لو عملوا زراعة براز لفار مصاب بالسمنة، ونقلوا له براز فار سليم تمامًا، فالموضوع ده هيعالج السمنة عنده، ويخليه ينقص وزن كبير جدًا، حتى لو نظامهم الغذائي هيفضل زي ما هو. يعني نقدر نقول فعلًا إن الكائنات الدقيقة دي مهمة جدًا جدًا لحياتك، لدرجة إنه في المستقبل ممكن الأطباء يتعاملوا معاهم هما شخصيًا على طول علشان يعرفوا يعالجوك.
وبما إن الكائنات الدقيقة دي جزء كبير من جسمك، وبما إنها كمان مش من الـ10% جينات اللي مابتقدرش تتحكم فيها، فهي قابلة جدًا للتحكم، عن طريق الأكل مثلًا، حاجات زي الثوم والزبادي مثلًا ممكن تزوّد عدد الكائنات الدقيقة السليمة للجسم، علشان تساعد الكائنات الدقيقة التانية. لكن الأكل الجاهز غالبًا بيكون فيه بعض المواد الكيماوية اللي ممكن تقتل الكائنات الدقيقة في العموم، الكويس منها بقى واللي مش كويس. لذلك الأطباء بيقولوا إن كل ماكانت وجباتك متوازنة وصحية، كل ما كانت صحتك سليمة.
المصادر:
