![](https://neonsciences.com/wp-content/uploads/2016/05/unnamed-file-14-1.jpg)
الشاي يحمي قلبك من الأمراض!
كتبت: مها طه
فى دراسة جديدة أثبتت إن شرب الشاى ممكن يحمى من انسداد الشرايين بشرط إن الشخص ده يكون عرضة أصلًا للإصابة بأمراض القلب والأوعية الدموية. البحث قام على دراسة مجموعة من الأشخاص اللى بيشربوا شاى بصورة مستمرة ومجموعة تانية بيشربوه لكن مش بصورة مستمرة، فلقوا إن الأشخاص اللى بيشربوا شاى لمدة 6 سنين متواصلة أو أكتر بيكون احتمال انسداد الشرايين أقل بكتير وضيف على كده إن تناول الشاى له فوايد كبيرة على صحة القلب.
البحث قام بيه مجموعة من الأطباء بقيادة أخصائى القلب الدكتو ”تشينج لين فاي“ فى إحدى مستشفيات الصين، البحث تضمن 5006 أشخاص، ذكور وإناث أعمارهم ما بين 40 و75، كان منهم 1564 شخص بنسبة 31.2% قالوا إنهم بيتناولوا الشاى بصفة مستمرة، تم تقسيم المجموعة دى لـ4 مجموعات فرعية:
1- مجموعة بتتناول شاى لمدة أكتر من 10 سنين
2- مجموعة من 6 لـ 10 سنين
3- مجموعة من سنة لـ 5 سنين
4- مجموعة بتتناول الشاى لكن مش بصفة مستمرة.
الباحثين دول قاسوا النبض للمجموعات الأربعة عشان يعرفوا حالة الشريان الأورطى وباقي شرايين القلب، ومع وجود عوامل تانية غير تناول الشاي، العلماء لقوا إن كل ما زادت فترة تناول الشاى ومعدل تناوله فى اليوم كل ما قل النبض وده معناه احتمالات أقل لانسداد الشرايين.
طب إيه خطر انسداد الشرايين؟
الشرايين عبارة عن أنابيب مرنة بيمر فيها الدم اللي تم ضخه من القلب، الشرايين بتبقى مبطنة بأنواع معينة من البروتينات اللي بتدى الشريان المرونة عشان يتحمل ضغط الدم اللى بيكون عالي أول ما بيتم ضخه من القلب.
انسداد الشرايين هو ترسب لمواد بقى سواء دهون أو غيرها على جدران الشرايين فتبدأ تتصلب وتضيق، وبالتالي الدم يواجه صعوبة في إنه يمر من خلالها، ولما بيكون مرور الدم أصعب بيبدأ القلب يبذل مجهود أكبر عشان يقدر يضخ الدم ويوصل لكل أجزاء الجسم، انسداد الشرايين ممكن يؤدى للإصابة بالجلطات والسكتة القلبية.
العلماء لقوا إن تناول الشاى بصورة مستمرة خصوصًا للأشخاص اللى بيتناولوه لمده أطول من 6 سنين بجرعة اكبر من 10 جرام فى اليوم بيحمى الشرايين من خطر الانسداد،وقالوا إن التأثير ده بسبب التفاعل الكيميائى اللي بيحصل بين الخلايا المُبطنة للشرايين وبعض المواد الكيميائية “مضادات الأكسدة” اللي موجودة فى الشاى وخصوصًا الأخضر.
مضادات الأكسدة الموجودة فى الشاي بتساعد فى استرخاء الأوعية الدموية عن طريق إنتاج أكسيد النيتروز اللي بيخلي الشرايين تبقى مرنة أكتر، وده اللي قاله “ستيفن ديفيرز”، طبيب القلب فى جامعة نورث ويسترن.
فى بعض العلماء اللى بيشككوا فى البحث لأنه إتعمل على مجموعة من الأشخاص اللى عايشين فى نفس البيئة ونفس المنطقة من الصين واللي ممكن يكون المتحكم فى ضعف احتمالات الإصابة عندهم له علاقة بالبيئة اللى موجودين فيها، لكن في دراسات تانية اتعملت على تناول الشاى في مناطق كتير من العالم اللي سكانها بيستهلكوا الشاى بصورة كبيرة، وتقريبًا كلنا له نفس التأثير في المناطق دي.
فى سنة 2014 فى بحث إتعمل فى تايوان، قال إنه شرب كوب واحد من الشاى يوميًا ولمدة سنة أو أكتر بيقلل احتمالات الإصابة بإنسداد الشرايين، وفى سنة 2013، فى دراسة اتعملت فى ”American Journal of Clinical Nutrition“ قالت إن تناول الشاى بشكل منتظم بيقلل احتمال الإصابة بالسكتة القلبية.
كمان فى دراسة منفصلة قام بيها مجموعة من الباحثين الأمركيين فى 2007، لقوا إن مضادات الأكسدة الموجودة فى الشاى بتحسن من بناء القلب فى خلال أقل من ساعتين، فى الفترة الأخيرة اتعملت دراسة تضمنت 24 بحث على حوالى 856 ألف شخص، الدراسة دى قالت إن شرب الشاى بصورة مستمرة مرتبط بمعدلات أقل من الإصابة بأمراض الشريان التاجي والسكتة القلبية والسكتة الدماغية ونزيف المخ بالإضافة لمعدلات وفيات أقل.
لحد دلوقتى العلماء ماتوصلوش لإيه هو أفضل نوع من مضادات الأكسدة الموجودة فى بعض أكلاتنا ومشروباتنا لكن البحث ده بيقولك إن كوباية شاى أو إتنين فى الإسبوع مفيدين لصحة قلبك.
المصادر