السديم .. منه وإليــه نعــود!
كتبت: يارا كمال
الكون فيه كل أنواع الفنون: فيه العصفور اللي صوته بيشجينا زي الموسيقى، والرسوم الهندسية والخطوط الناعمة، حتى بُطش الألوان دي اللي بتبقى موجودة في الفضا بتكون رائعة الجمال، كإن فيه فُرَش سحرية لطخت صفحة الفضا. طب الألوان دي اسمها ”سُدُم“ أو ”سدوم“ زي ما قالها صلاح جاهين، جمع ”سديم“ يعني.
السدم دي حاجة تحسها كده هلامية أو ملهاش شكل محدد، بس في الحقيقة ليها دور مهم في الكون.
السديم (Nebula) هو سحابة من الغاز والغبار. أصلًا كلمة (Nebula) متاخدة من كلمة سحابة باللاتيني. السدم موجودة في المجرات وبتملى الفضا اللي ما بين النجوم، وأحيانًا بتغطي النجوم نفسها. أحيانًا السدم بتبقى ساطعة وأحيانًا بتكون مظلمة. الغاز اللي بتتكوّن منه السدم بيبقى أغلبه هيدروجين ممزوج بشوية هيليوم، أما الغبار، فبيتكوّن من جزيئات دقيقة من الكربون والسيليكون والماغنسيوم والألومنيوم وعناصر تانية.
طب اللي بيخلي السدم تبقى ساطعة أو مضلمة؟
السدم اللي بتكون قريبة من النجوم المجاورة بتتوهج، وده حسب قُرب السديم من النجم، وحرارة النجم نفسه.
سديم الجبار
لما السديم بيكون قريب أوي من نجم سخن، بيقدر يمتص كميات كبيرة من الأشعة فوق البنفسجية، وده بيسخّن درجة حرارة الغاز لحوالي 9726 درجة مئوية، وبالتالي غاز الهيدروجين بيتوهج بالضوء اللي بنشوفه في الصور. وفي الحالة دي بيكون سديم إشعاعي، زي سديم الجبار.
طب لو النجم بعيد أو مش سخن أوي؟
في الحالة دي، غبار السديم بيعكس الضوء، وده بنسميه سديم عاكس، واللي بيبقى ليه لون مدّي على أزرق لإن الجزيئات بتبعتر اللون الأزرق.
أما السدم المظلمة، فدي مابتكونش قريبة كفاية من أي نجم عشان تتوهج أو تعكس نورها، وبتتشاف بس لو فيه خلفية منيرة وراها زي مثلًا إنه يكون فيه عنقود نجمي في الخلفية. وأحيانًا، السدوم المظلمة بتبان كإنها خطوط أو كور في وسط السدم الساطعة.
سديم تريفيد
يعني مثلًا سديم تريفيد سديم إشعاعي أحمر بيبان كإنه متقسّم لـ3 مناطق عن طريق غبار مظلم كإنه على شكل ممرات كده.
سديم رأس الحصان
وبرضه من أمثلة السدم المظلمة، سديم رأس الحصان، اللي بيقسم مجرة درب التبانة نصين على هيئة حزام مظلم كبير بطول السديم.
طب هل السديم عبارة عن سحابة جمالية كده بس؟
ولو إن الجمال في حد ذاته أهمية كبرى، بس السديم مش مجرد شكل جميل بس، لأ ده بالنسبة للنجوم زي الأرض بالنسبة لنا كده. تقدر تقول كده إنها المقبرة والرحم في نفس الوقت. طب إزاي؟
من هنا يبدأ النجم:
السُدُم هي سحب كثافتها قليلة، وبما إن النجوم أجسام كثافتها عالية، فلو قلنا إن السديم هو مكان ولادة النجوم، فلازم الغاز والغبار اللي بيتكوّن منهم السديم يتشدّوا ويتضغطوا عشان يكونوا نجم. عملية التكاثف دي بتحصل في مناطق متنوعة من السُدُم المظلمة، وكمان السُدُم العاكسة، اللي هي في الأساس سُدُم مظلمة، بس بتعكس الضوء.
الجاذبية هنا بتقوم بدورها كقوة بتدفع ناحية التكاثف ده. هنا الكرة اللي بتتكوّن من غاز وغبار بتبدأ تتقلص تحت تأثير جاذبيتها وتنكمش واللب بتاعها بيبدأ ينهار أسرع كل مدى. ده بيخلي اللُب يسخن ويدور. المادة اللي اتجمّعت دي بيسموها نجم أولي (protostar). ممكن سديم واحد يبقى فيه نجوم أولية كتير، كل واحد فيهم هيبقى نظام نجمي لوحده.
فيه نجوم أولية بتكون أصغر من الشمس، وبالتالي بتبقى صغيرة أوي على إنها تبدأ تفاعلات نووية حرارية زي بقية النجوم، بس ممكن تتوهج بضوء خافت كده لإن قوة الجاذبية بتخليهم يكملوا انكماش، وخلال العملية دي بيطلقوا طاقة. العلماء بيسموا النجوم الأولية دي الأقزام البنية عشان حجمها صغير والطاقة اللي بتطلع منهم صغيرة.
أما بالنسبة للنجوم الأولية اللي أكبر من الشمس بكتير، فالنجوم دي بتكمّل في تقلصها وتنتج حرارة أثناء العملية دي، وبتبدأ تحوّل الهيدروجين لهيليوم أثناء عملية الاندماج النووي الحراري. في الوقت ده، مرحلة النجم الأولي بتنتهي وبيبدأ نجم حقيقي يتكوّن، واللي حواليه بتكون فيه سحابة ملتفة من الغاز والغبار، اللي هي المادة اللي بتتكوّن منها خلال مليارات السنين الكواكب والأقمار.
سديم المخروط
لما النجم الأولي يبقى نجم حقيقي، لو النجم ده كبير كفاية، هيقدر يأيّن المادة اللي في السديم ويكوّن حواليها الفلورية أو الإشعاع المضيء اللي احنا بنشوفه، ومن هنا ممكن السديم المظلم يبقى سديم إشعاعي. ممكن سديم إشعاعي واحد يبقى مليان نجوم كتيرة لسه متكوّنة زي سديم المخروط.
منها وإليها نعود
وزي ما قولنا إن السديم مش بس رحم بيطلع منها النجوم، لأ ده كمان مقبرة. وهنا هيظهر لنا نوع تاني من السُدُم وهي السدم الكوكبية، ودي بتكون الغلاف الجوي الخارجي لنجم أحمر كبير بس غلاف جوي منفصل، والنجم الأحمر الكبير ده بيكون من المراحل النهائية في دورة حياة نجم متوسط الحجم.
اللي بيحصل إن النجم لما بيشيخ، وبيبقى الهيدروجين اللي فيه قل خلاص، بيبدأ يحرق الهيليوم، وبيستمر في حرق الهيدروجين اللي في الطبقات الخارجية ، وبينتفخ لحد ما يوصل لحجم عملاق.
وهنا سطحه بيبدأ يبرد ويحمر، بس النجم الكبير نفسه بيبقى مش مستقر وبيطرد طبقاته الخارجية. أهي المادة اللي بتتطرد دي بتكوّن السديم الكوكبي اللي بيحيط باللب الساخن اللي بيكون لونه أبيض مزرق. السخونة اللي بتطلع من اللب بتخلي السديم يتوهج.
سديم الإسكيمو
السديم الكوكبي بيبقى اسمه كده لإنه بيبقى مدوّر زي الكواكب. من أمثلة السُدُم الكوكبية سديم الإسكيمو، واللي موجود على بُعد 5000 سنة ضوئية من الأرض في برج الجوزاء، وسمّوه كده لإنهم كانوا شايفينه من التليسكوبات اللي على الأرض، كإنه وش حواليه فروة زي ياقة البالطو اللي بيلبسه الإسكيمو.
سديم السرطان، الناتج عن سوبر نوفا
برضه السوبر نوفا ممكن تكوّن سديم، والسوبر نوفا بتحصل لما نجم ينفجر ويرمي أغلب مادته في الفضا، فيتكوّن سديم.
يعني لو السُديم بالنسبة لك لوحة حلوة، فهو بالنسبة للنجم الموت والحياة.
المصادر:
universetoday howstuffworks howstuffworks
