الجهاز المناعي: اللي له ضهر مايضربش على بطنه!

كتبت: مها طـه

أى منظومه لازم يبقى ليها وسائل وأدوات حمايتها الخاصة للحفاظ عليها ضد أى خطر ممكن يهدمها، فما بالك بجسمك بقى. جسم الإنسان يُعتبر منظومة كبيرة ومعقدة كل عضو أو جهاز فيها بيقوم بدور ووظيفة عشان فى النهاية تشتغل المنظومه دي كلها بنجاح ويعيش الواحد مننا صحته فيه. جهازك المناعى هو اللى بيدافع عن جسمك ضد أى إصابة أو خطر أو عدوى، فنظرًا للدور الحيوي اللي من غيره ما نقدرش نعيش حبين نأخدكم جولة عشان نتعرف أكتر على جهازنا المناعي.

إيه هو الجهاز المناعي؟

الجهاز المناعي هو جهاز بيتكون من شبكة من الخلايا والأنسجة والأعضاء اللي بتشتغل مع بعضها بشكل متناغم عشان تحمى الجسم من أى أجسام غريبة ممكن تسبب العدوى زى الميكروبات والبكتريا والفيروسات والفطريات والطفيليات، ولإن جسم الإنسان بيعتبر بيئه مناسبة جدًا لنمو أنواع كتيرة من الميكروبات وغيرها، فالجهاز المناعى دوره هو حماية الجسم ومنع دخول الكائنات دي للجسم أو القضاء عليها إذا دخلت الجسم. الجهاز المناعي نفسه بقى لو هاجم  الجسم ممكن يتسبب فى مشاكل خطيرة وأمراض كتيرة زي الحساسية والتهاب المفاصل والإيدز.

الجهاز المناعى معُقد بشكل مذهل، تخيل إنه يقدر يتعرف على ملايين الأنواع من الكائنات اللي ممكن تهاجم الجسم ويحفظها كلها وكمان ينتج خلايا وإفرازات مختلفه للقضاء على كل نوع منها على حدا. يكمن سر نجاح الجهاز المناعى فى القضاء على مختلف الميكروبات و الفيروسات وغيرها فى وجود شبكه حيوية كبيرة بين ملايين الخلايا التابعه له فى الجسم واللي بتتقسم لمجموعات رئيسية ومجموعات فرعية كلها متصلة ببعضها وبالتالي تبدأ تتنقل المعلومات بين الخلايا كلها. بمجرد أن تستقبل الخلايا المعلومات عن وجود خطر ما تبدأ فى إفراز مواد كيميائية تسمح للخلايا بتنظيم سلوكها ونموها والاستعانة بخلايا جديدة لمحاربة الأجسام الغريبة.⁽¹⁾

إزاي الجهاز المناعى بيشتغل؟

خلايا الجهاز المناعى بتقدر تفرق ما بين الخلايا السليمة في الجسم والأجسام الغريبة عليه عن طريق وجود علامة مميزة على سطح الخلايا الغريبة، أي خلية تقدر تستفز الجهاز المناعي للتعرف عليها تُسمى ”المادة المولدة Antigen“. إذا أى ميكروب أو فيروس أو حتى خلايا من شخص تاني دخلت الجسم، بيبدأ الجهاز المناعي يتعرف عليها على إنها مادة مولدة وبعدها بيبدأ يحاربها عشان يقضي عليها، وده السبب في صعوبة عمليات نقل الأعضاء وأحيانًا بيعتبر السبب الرئيسى لفشل بعض عمليات نقل الأعضاء.

أحيانا بيُسمى الجهاز المناعي باسم ”الجهاز الليمفاوي“. الليمف هو سائل شبيه بالدم وبيوصل لكل خلايا الجسم وبيمر فى شعيرات ليمفاوية ثم أوعية ليمفاوية وغدد ليمفاوية لحد ما يصب أخيراً فى القلب ويبتدأ يختلط بالدم عشان يبدأ ينقيه لأن الليمف بيشبه إلى حد كبير بلازما الدم اللي عبارة عن سائل شفاف بتسبح فيه كرات الدم اللبيضاء و الحمراء و الصفائح الدموية، لكن الفرق ما بين بلازما الدم والليمف إن الليمف بيبقى غالبًا فيه كرات الدم البيضاء فقط، واللي بيستخدمها الجسم فى الدفاع عن نفسه ضد الأجسام الغريبة.⁽²⁾

الجهاز المناعي بيتكون من إيه؟

الجهاز المناعى بيتكون من مجموعة من الأعضاء متوزعة فى أماكن مختلفة من الجسم، و تُسمى بالأعضاء الليمفاويه لأنها تحتوى على الخلايا الليمفاوية ”كرات الدم البيضاء“. أهم أجزاء الجهاز المناعي هي:

1. الغدد الليمفاوية: أجسام صغيرة شبه بذرة الفول، دورها الأساسي إنتاج وتخزين الخلايا المسئولة عن مكافحة العدوى والأمراض، تعتبر جزء من الجهاز الليمفاوى.

2. الطحال: أكبر عضو ليمفاوي فى الجسم _موجود فى الجنب الشمال تحت الضلوع و فوق المعدة_ بيحتوى على كرات الدم البيضاء، و كمان له دور فى تنظيم كميات الدم فى الجسم والتخلص من خلايا الدم التالفة والقديمة.

3. نخاع العظام: خلايا لونها أصفر موجودة داخل العظام مسئولة عن إنتاج كرات الدم البيضاء، النخاع الموجود داخل بعض العظام زى عظمة الفخذ بيحتوي على خلايا غير متخصصة تُسمى بالخلايا الجزعية وهي خلايا موجودة فى كل أجزاء الجسم، دور الخلايا دي الرئيسى هو تعويض الخلايا اللي بتموت يوميًا فى الجسم فتتحول لخلية متخصصة تؤدي نفس وظائف الخلية الميتة لإنها تتميز بقدرتها على الانقسام وتجديد نفسها باستمرار.

4. الخلايا الليمفاوية: ودي بقى كرات الدم البيضاء، وبتنقسم لنوعين:

 أولاً: الخلايا B اللي بتنتج أجسام مضادة (الأجسام اللى بتتفاعل مع المواد المولدة على سطح الأجسام الغريبه) واللي بتهاجم البكتريا والسموم فى الجسم.

ثانياً: الخلايا T اللي بتقضي على الخلايا المُصابة أو الخلايا السرطانية، وبتنقسم لنوعين: الخلايا T القاتلة، ودي اللي بتقوم بتدمير الخلايا المُصابة بالفيروسات أو الأمراض والقضاء عليها، والنوع التاني الخلايا T المساعدة، ودي اللي بتحدد نوع الخلايا المناسب لمحاربة الجسم الغريب أو المرض اللى أصاب خلية معينة.

5. الغدة الزعترية (Thymus): هي غدة تقع خلف عظمة القفص (العظمة الموجودة فى منتصف القفص الصدري) فوق القلب، وشكلها شبه ورقة نبات الزعتر _ و ده سبب تسميتها بالزعترية_ وهي المسئولة عن إنتاج الأجسام المضادة. غالبًا بيكون حجم الغدة دي كبير فى الأطفال حديثي الولادة وبتستمر فى الزياده فى الحجم لحد البلوغ، ثم تبدأ فى الانكماش مع التقدم فى العمر.

كرات الدم البيضاء مسئولة عن التعرف على الأجسام الغريبة والقضاء عليها. وجود عدد كبير من كرات الدم البيضاء بيدل على وجود مرض أو عدوى. لخلايا الدم البيضاء أنواع مختلفة منها ما يقوم بابتلاع الأجسام الغريبة ومنها ما يقوم بمهاجمتها والقضاء عليها. مع التقدم فى العمر أو الإصابة بأمراض المناعة عدد كرات الدم البيضاء بيبتدي يقل وبالتالى تعرفها على الأجسام الغريبة والقضاء عليها بيبقى أصعب بكتير، كمان فى بعض العمليات الجراحية زى عمليات نقل الأعضاء بيبدأ الأطباء فى كتابة أدوية تقلل من المناعة عشان تساعد فى تقبل الجسم للعضو المزروع ونتيجة لده ممكن بس الإصابة بنزلة برد تؤدي للوفاة لا قدر الله.⁽³⁾

المصادر

• Understanding the Immune System: How it works – IMGT
• uhaweb
• livescience
• cisncancer