البكتريا تحتل العالم.. بل تحتل حضرتك شخصيًا!
كتبت- مها طه
البكتريا عالم مدهش، كائن على قد صغر حجمه إلا إنه قد يكون بيحكم العالم كله فعلًا ، يكفيك تعرف إنه مفيش سم2 على وجه الأرض مش بيعيش عليه نوع أو أكتر من البكتريا. يمكن أول حاجة بتيجي على بال معظمنا لما نسمع كلمة بكتريا أنه كائن بيسبب المرض أو كائن مقترن وجوده بالقذارة، لكن الحقيقة إن البكتريا هى أحد أسباب استمرار الحياة على الأرض.
هيّ عبارة عن كائنات دقيقة لا هى نباتات ولا هى حيوانات، مجموعة كده لوحدها مستقلة، البكتريا كائنات وحيدة الخلية طولها بيتقاس بالميكرومتر_جزء من الألف من المللى_ وعشان كده مستحيل خلية بكتيرية لوحدها كده، لازم يبقوا بالملايين مع بعض.
جرام واحد من التربة ممكن يحتوى على 40 مليون خلية بكتيرية، ملليمتر واحد من الماء ممكن يحتوى على مليون خلية! العلماء بيقولوا إن البكتريا الموجودة على كوكب الأرض تُقدر بحوالى 5 نونيليون بكتريا_ يعنى 5 وجنبها 30 صفر_! وإن ده يمثل معظم الكتلة الحيوية على الأرض.(1)
للبكتريا 3 أشكال رئيسية، الشكل الكروى وده أبسط الأنواع، والشكل العصوى _شبه العصاية_، والشكل الحلزونى.
طب إزاى البكتريا بتتغذى؟
البكتريا ممكن تكون ذاتية التغذية أو غير ذاتية التغذية.
أولًا غير ذاتية التغذية، وهي الأنواع اللى بتعتمد فى تغذيتها على كائنات تانية، منها البكتريا المُحلِلة اللى بتستمد المواد العضوية من أجسام الكائنات الميتة_نباتات أو حيوانات_، والبكتريا المتطفلة اللى بتعيش فى أجسام الكائنات الحية.
ثانيًا البكتريا ذاتية التغذية، ودي اللى بتصنع غذائها بنفسها، إما تكون بتقوم بالبناء الضوئى، لكن مش بالضرورة كلها تنتج أكسجين من البناء الضوئي، أو إنها بتصنع غذائها بطريقة كيميائية بإنها بتستخدم ثانى أكسيد الكربون و الماء وبعض المواد الكيميائية زى الأمونيا، النيتروجين، الكبريت، الفسفور، الفيتامينات، صوديوم، بوتاسيوم وغيرهم، ودي البكتريا العقدية اللى بتبقى موجودة على جذور البقوليات عشان تثبت النيتروجين، وبالتالى يقدر النبات يستفيد منه.(2)
أما بالنسبة للانطباع السلبى عندنا عن البكتريا، فلازم نفكرك إن البكتريا فعليًا هى أقدم من الإنسان على الأرض، وإنك محتاج للبكتريا فى حاجات كتيرة أوى، يكفى إننا نقول إن الأكسجين اللى بنتنفسه حاليًا ممكن يكون أصلًا ناتج من نشاط البكتريا من ملايين السنين!
من الأخر، استمرار حياتك مُعتمد بشكل كبير على وجود البكتريا، كمان فى كميات كبيرة جدًا من البكتريا عايشة فى جسمك لدرجة إنها ممكن تبقى حوالى كيلو ونص من وزنك، أي نعم ما تندهش كده وانت بتقرا. البكتريا موجودة فى الجهاز الهضمى، ولها دور مهم جدًا فى الهضم لأن فى مغذيات مُعينة عشان تتهضم محتاجة لوجود البكتريا عشان يتم ده بصورة يقدر من خلالها الجسم يستفاد زي مثلًا السكريات المُعقدة. بالإضافة للبكتريا الموجودة فى الفم وبتقوم بنفس الدور، تخيل إن البكتريا النافعة دى بتحميك كمان من خطر البكتريا المسببة للأمراض عشان بتحتل مكانها فى جسمك، وبالتالى لو جت تهاجمك مش هتلاقى مكان تقدر تحتله فى جسمك ده غير البكتريا اللى بتهاجم أنواع تانية من البكتريا المسببة للمرض وتقضى عليها.
وبعد ما اعترفنا بفايدة البكتريا لازم كمان نتكلم عن أضرار البعض الآخر منها. فى دراسة عملتها الرابطة الدولية والأمريكية لأبحاث طب الأسنان، قالت إن البكتريا ممكن تكون أحد أسباب انتشار السمنة على مستوى العالم، لأنهم اكتشفوا نوع معين من البكتريا بيعيش فى لعاب أصحاب الوزن الزائد، وبالتلي في احتمالية إنه يكون من مسببات بالسمنة، إن لم يكن وجوده من الأساس هو أحد أسباب الإصابة بيها.(3)
البكتريا ممكن تسبب أمراض كتيرة للبشر، يكفى إننا نقول إن معظم الأمراض الخطيرة والأوبئة المميتة فى تاريخ البشرية كانت السبب فيها البكتريا، الجدري والملاريا كانت أمراض غير بكتيرية لكنها تسببت فى موت بشر أكتر من اللى تسببت فى موتهم البكتريا، وبالرغم من ده فالأمراض البكتيرية تسببت فى موت ملايين الأشخاص زى (الكوليرا، الديفتريا، الديسونتاريا، الطاعون، الالتهاب الرئوى، السُل، حمى التيفويد).
فى سنة 1900 كان الالتهاب الرئوى والسُل والإسهال أهم أسباب الموت فى الولايات المتحدة ، مع تطوير تقنيات تنقية المياه واللقاحات وبرامج المناعة بالإضافة لتطور العلاج بالمضادات الحيوية، انخفض عدد ضحايا الأمراض البكتيرية بشكل ملحوظ.
البكتريا لها استخدامات كتيرة فى مجال تكنولوجيا الأغذية، زى بكتريا حمض اللاكتيك مع بعض الخميرة والفطريات، واللي بتُستخدم فى الصناعات الغذائية زى الجبنة، صوص الصويا، الخل، الزبادى، المخللات، ومعظم الأغذية اللى بتتصنع بطريقة التخمر.
للبكتريا استخدامات كتير فى المنظفات العضوية لأنها عندها قدرة كبيرة على تنظيف بقع الزيت بالإضافة لقدرتها على التخلص من النفايات السامة، وتحويلها لمواد غير سامة، البكتريا كمان ليها استخدامات دوائية وكيميائية كتيرة، بالإضافة لاستخدامها الواسع فى مجال البيولوجية الجزيئية _علم الجينات_ وده لأنها ممكن تنمو بسرعة وتنقسم بشكل كبير، وبتُستخدم فى دراسة الجينات والإنزيمات، بعض أنواع البكتريا يمكن استخدامها فى الزراعة بدل المبيدات، وفى نفس الوقت هتحافظ على البيئة ، وهتمنع عنها الأضرار اللى ممكن تتسبب فيها المبيدات دى.(4)
المصادر
