.
ليه وإزاي؟

احسب الكالوري بالكيلو يطلع لك الوزن في الساعة!

كتبت: يارا كمال

إلى كل الناس اللي بيعملوا دايت، بص يا حبيبي. أنت مش شوال، والسعرات الحرارية أو الكالوريز اللي في الأكل مش عدد من الكيلوجرامات اللي هتملاك، وكل ما تاكل حاجة فيه سعرات أكتر، كل ما وزنك يزيد لإن الأكل اللي في بطنك بيزيد. الموضوع مختلف شوية.

يعني مثلًا ممكن ألاقي بوست على الفيسبوك، بيقول إن الكالوريز اللي في قطعة السينابون مش عارف قد إيه، وإنك عشان تحرقهم محتاج تعوم مش عارف 8 ساعات أو تروح موزمبيق بعجلة .. أنتوا مجانين؟! مش هروح موزمبيق بالعجلة أنا.

طب تعالوا نفهم يعني إيه السعر الحراري أو الكالوري اللي تاعبكم ده!

فيه اللي بيقول لك إن السعرات الحرارية دي كائنات صغيرة شريرة بتستناك تنام عشان تضيق لك لبسك.

في الحقيقة، السعر الحراري هو وحدة قياس الطاقة اللي موجودة في مصدر معيّن، وهو الطريقة اللي بنلاحق بيها على الطاقة اللي جسمنا بيستهلكها، أو ده اللي المفروض يحصل، لكن اللي بيحصل في الحقيقة إننا بنلاحق على السعرات اللي بناكلها وجسمنا مابيستهلكهاش

عشان يبقى جسمنا صحي لازم يبقى اللي بناكله قد اللي بنخسره في ممارسة الأنشطة المختلفة. لو تناولنا أكل فيه سعرات حرارية أكتر من اللي بنخسره، الزيادة هتتحوّش في خلاياك على هيئة دهون، وبالتالي وزنك هيزيد. والعكس صحيح، لو بتحرق طاقة أكتر من اللي بتاكله، وزنك هيقل.

تعريف السعر الحراري هو كمية الطاقة المطلوبة لرفع حرارة كيلوجرام ميه درجة مئوية زيادة. لما بنيجي نشير للسعرات الحرارية في الأكل، فهي كم الطاقة اللي أي أكل بيحتفظ بيها في روابطه الكيميائية.

عندك مثلًا قطعة البيتزا (القطعة مش البيتزا كلها) فيها 272 سعر حراري، في حين إن التفاحة فيها حوالي 52 سعر حراري بس. الطاقة اللي جوا الأكل دي بتتحرر أثناء الهضم، وتتخزّن في جزيئات تانية، واللي تقدر تتحلل عشان تمد الجسم بالطاقة اللي هو محتاجها. الجسم بيستخدم الطاقة في 3 أنشطة أساسية: 10% في الهضم، 20% في النشاط الجسماني زي الحركة والرياضة والشغل وكده، والنسبة الأكبر 70% بتروح في الوظائف الأساسية للجسم، يعني احنا متحكمين في 20% بس في الطاقة اللي داخلة الجسم مادام دخلت.

النسب دي توصلنا لحاجة اسمها ”معدل الأيض الأساسي“ (Basal Metabolic rate)، وده عدد السعرات الحرارية اللازم عشان نعيش، باستثناء الأكل أو الحركة.

لو بنتكلم عن السعرات المطلوبة للحياة وللهضم وللنشاط الجسماني، فالستات بيحتاجوا 2000 سعر حراري والرجالة بيحتاجوا 2500 سعر حراري في المتوسط كل يوم. التقديرات دي معتمدة على عوامل زي كتلة العضلات ومتوسط الوزن والنشاط الجسماني.

طب ده معناه إننا لازم نتناول حوالي 2000 سعر حراري بس؟ مش بالضرورة. لو أنت مشترك في سباق فرنسا للدراجات مثلًا، جسمك ممن يستهلك لحد 9000 سعر حراري في اليوم. الحامل مثلًا ممكن تحتاج سعرات زيادة شوية عن العادي، وبالنسبة لكبار السن، معدّل التمثيل الغذائي (أو الأيض) بيبقى أبطأ، وبالتالي الطاقة بتتحرق بالتدريج أكتر، فبيحتاجوا سعرات حرارية أقل.

soda-apple-calories

بس قبل ما تسخن علينا، وتقعد تبص في كل حاجة تاكلها وتعرف هي فيها كام سعر حراري، خلي بالك إن السعرات الحرارية اللي مكتوبة عليها هي السعرات اللي موجودة في الأكل ده، مش اللي أنت هتحصل عليها من الأكل. مثلًا، الأكل اللي فيه ألياف زي الكرفس والقمح الكامل بيستهلك طاقة أكبر عشان يتهضم، وبالتالي أنت لما هتاكل كمية من الكرفس فيها 100 سعر حراري، هتحصل على طاقة أقل من لو أكلت كمية من البطاطس فيها نفس السعرات الحرارية.

الفكرة كمان إن يكون فيه نوعين من الأكل فيهم نفس السعرات الحرارية، بس واحد فيهم فيه مواد مغذية زي الفيتامينات والبروتينات، ونوع مش مغذي. يعني تبقى بتتخن وكمان عندك سوء تغذية.

بلاش. ممكن يبقى نفس الأكل بالظبط، واتنين ياكلوه ومايحصلوش على نفس السعرات الحرارية منه. الاختلافات دي مرتبطة بمستوى الإنزيمات عندهم والبكتريا اللي في القناة الهضمية، وحتى طول الأمعاء بيفرق. وده معناه إن قدرة كل واحد فينا على إنه يستخرج الطاقة من الأكل بتفرق شوية. عشان كده تلاقي واحد صاحبك عمّال ياكل ياكل وزي الفتلة، جلد على عضم، وأنت تتنفس تتخن.

من الآخر، مش كفاية تقرا السعرات الحرارية اللي في الأكل عشان تعرف أنت هتاكل منه قد إيه، لإن الموضوع مرتبط بالنشاط الجسماني ونوع الأكل، وقدرة الإنسان على معالجة الطاقة واستخدامها، والكلام ده بقى مش هتلاقيه على كيس الشيبسي ولا إزازة الحاجة الساقعة.

 

المصادر:

youtube

livescience

 

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى