أهمية «البيض» في حياتنا!
كتب: أحمد حسين
أغلبنا وإحنا صغيرين ماكنش بيحب ”البيض“ _ اللي بناكله طبعًا_ سواء كان مسلوق أو أومليت أو عيون أو غيره. البيض يعتبر من أكتر الحاجات اللي في اختلاف عليها، يعني ممكن تلاقي ناس بتحبه في كل أشكاله، وناس مابتحبوش خالص، وناس بتحبه أومليت مثلًا وناس مابتحبوش مسلوق، بس كل دي في النهاية تفضيلات شخصية، المهم هو إننا نعرف الإجابة على سؤال: ”هل البيض مفيد فعلًا؟“.
– أحد أهم مصادر البروتين
مبدئيًا، يعتبر البيض من أكتر الأطعمة اللي بتحتوي على مُغذيات كتير مفيدة، من ضمن المغذيات دي حاجة معروفة جدًا بين الناس وهي ”البروتين“. يعتبر البيض واحد من أهم مصادر البروتين الغذائية، والبروتين بالفعل من أهم المغذيات اللي ممكن الإنسان يحصل عليها، فهو بيساعد على خسارة الوزن وزيادة الكتلة العضلية وبيقلل/بيخفّض ضغط الدم. زائد إن البيض بيحتوي على مقدار مناسب من الأحماض الأمينية (العنصر الأساسي لبناء البروتين) اللي الجسم بيكون محتاجها.
– يقلل من خطر الإصابة بأمراض القلب
السبب اللي ممكن يقنعك تحب البيض لو ماكنتش بتحبه هو إنه البيض بيقلل من خطر الإصابة بأمراض القلب، زي الجلطة والذبحة والحاجات اللي بيجي بعدها جملة اللهم احفظنا كده. طيب البيض ممكن يحمينا من الأمراض دي إزاي؟ الدكاترة وخبراء التغذية قالوا إن البيض بيحتوي على”البروتين الشحمي عالي الكثافة – HDL Cholestrerol“، وده بيعتبرالنوع الجيد من الكوليستيرول. البيض بقى بيكون فيه أكتر من نص النسبة المطلوبة من الكوليستيرول الجيّد للجسم عشان كده مع ذلك لازم نعتدل في أكله.
– بناء الغشاء الخلوي وجزيئات المخ
البيض كمان بيحتوي على مركب كيميائي اسمه ”الكولين – Choline“، المركب ده بيعتبر من المواد الأساسية المغذية للجسم، بيُستخدم الكولين لبناء الأغشية الخلوية (Cell membranes) وجزيئات المخ (Brain molecules). تحتوي البيضة الواحدة على أكتر من 100 ملّيجرام من الكولين، والأكاديمية الوطنية للعلوم بأمريكا صرّحت قبل كدة بإن الراجل بيحتاج لحوالي 550 ملّيجرام كولين في اليوم والست بتحتاج لحوالي 425 ملّيجرام في اليوم.
– تساعد العيون إنها تبقى بصحة جيدة
البيض ممكن يساعد عيونك إنها تفضل سليمة ومستوى إبصارنا جيد، والسبب في ده إنه بيحتوي على مضادات للأكسدة بتقلل من خطر الإصابة بإعتام عدسة العين (المياه البيضاء)، وتقليل الإصابة بـ”التنكس البقعي – Macular degeneration“، وده مرض مرتبط بالتقدم في السن وبيؤدي لفقدان البصر. البيض كمان بيحتوي على فيتامين A واللي قلّة تواجده في الجسم بتؤدي في النهاية لفقدان البصر.
فلو بتحب البيض مسلوق أو مقلي أو أومليت وأنصحك يكون الأومليت برشة فلفل أسود وحتة جنبة رومي مع فلفل أخضر، لازم تعرف إنك مش بتاكل البيض عشان البروتين بس اللي في الصفار أو الكالسيوم اللي في البياض اللي هيّ أصلًا اعتقاد غلط ودي لنا فيها مقال آخر، لأ انت بتاكله وانت بتستفيد منه على أكتر من مستوى يخليك ممتن للبيضة والفرخة اللي جابتها.
المصادر
