.
ليه وإزاي؟

”قرقضة الضوافر“ : شيل البكتيريا دي من بُقك!

كتب: أحمد حسين

من أكتر الحاجات اللي بتخليني مابحبش أتفرج مع حد معين من أصحابي على ماتشات الكورة، إن فيهم واحد بيتوتر جدًا، ومن كتر ما هو بيتوتر بيفضل يقرقض في ضوافره، فالحركة دي بتتنقل لي بشكل لا إرادي، وببدأ أنا كمان أقرقض في ضوافري، ودي العادة المنيلة اللي بدأت عندي من وأنا صغير! ليه عادة منيلة أو سيئة بقى، ده اللي هنجاوب عليه مع بعض دلوقتي.

”د. ريتشارد شير“، خبير في اضطرابات الأظافر في كلية وايل كورنيل للطب وعضو الأكاديمية الأمريكية للأمراض الجلدية، بيقول إن الموضوع ده فعلًا مضر. مبدئيًا، الأظافر بيئة صالحة لتواجد كل أنواع الجراثيم، وعلى وجه الخصوص عائلة من البكتيريا المعوية والتي تشمل السالمونيلا والإي كولاي. بتعمل إيه بقى البكتيريا دي لما بتدخل جسمك؟ بتسبب التهابات المعدة والأمعاء، ده غير الإصابة بالإسهال وآلام البطن.

على المدى الطويل، اللي بيقرقضوا ضوافرهم بيصابوا بمرض اسمه ”التقرح حول الظفر – Paronychia“، د. شير بيقول كمان إن الجروح اللي في الجلد وفي أطراف الصوابع، بتسمح للبكتيريا أو الخميرة بالتسلل داخل الإصبع، فبتسبب القُرح والتورم واحمرار الجلد، وفي بعض الأحيان الأمراض دي بتتطلب تدخل جراحي لو ماتمش معالجتها بالمضادات الحيوية أو غيره.

طبيب الأمراض الجلدية في مركز جامعة نيويورك انجون الطبي ”د. كريس أديفون“، قال إن مرض ”الورم الحليمي البشري – HPV“، اللي بيسبب وجود دمامل كتير على الأصابع، من أكتر الأمراض شيوعًا بين الناس اللي بيحبوا يقرقضوا ضوافرهم. المشكلة الأكبر إن المرض لما بيصيب الصوابع، بينتقل بعدها للفم والشفايف.

ده غير بقى مخاطر موضوع القرقضة ده اللي ممكن توصل لأسنانك، فقرقضة الضوافر أحيانًا بتؤدي لسوء إطباق الأسنان، بمعنى إن الأسنان بتتحرك من مكانها وبيكون شكلها غريب جدًا، بالإضافة للمعاناة من أمراض اللثة كمان. عشان كده ”د. شير“ بينصح إننا نحاول نبطل العادة دي كوقاية لينا.

غالبًا بيتم ربط قرقضة الضوافر بالإجهاد أو الاضطرابات النفسية، فلما تلاقي الموضوع وصل معاك لطحن الأسنان لدرجة إنك مش قادر تشيل صوابعك من تحت أسنانك، فالأفضل ساعتها إنك تستعين بدكتور نفسي يساعدك توقف العادة دي.


المصادر: 

time
webmd
mayoclinic

 

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى