أنا بطارية ليثيوم.. لو مانفجرتش، أتحرق!
كتب: أحمد حسين
موبايلك واللابتوب وأجهزة تانية كتير جدًا بتشتغل ببطاريات الـ”ليثيوم-أيون – Lithium-ion battery“. مشكلة الليثيوم أيون دي إنها لو كانت رديئة الصنع بتنفجر أو في بعض الأحيان كمان بتنفجر وهي مش رديئة الصنع. الخطر في الموضوع إنه بيحصل خلال ثواني، حاجة كده عاملة زي تأثير الدومينو: البطارية بتسخن جدًا، فبتنتج حرارة أكتر، وتفضل تسخن وتسخن لحد ما فجأة تنفجر.
طبعًا زي ما قولنا، في بعض البطاريات مابتنفجرش، وده بيكون بسبب دعمها ببعض الأشياء اللي ممكن تزوّد من معدلات الأمان فيها لأنه البطاريات دي إحنا بنتعامل معاها بشكل مباشر في حياتنا اليومية، غير إنه حاليًا في أطفال كتير بتستعمل الهوفربورد (Hoverboard) أو اللوح اللي بتشوف الأطفال ماشيين بيه في المولات ده، وطبعًا انفجار بطارية شيء زي ده ممكن يؤدي لنتائج كارثية، زيها زي انفجار بطارية ليثيوم لموبايل محطوط على سرير مثلًا، اللي ممكن فعلًا تؤدي لحريقة كبيرة.
بطاريات اللثيوم دي بتتصنّع من طبقتين: طبقة من الأنود وطبقة من الكاثود مفصولين عن بعضهم عن طريق سائل موصّل للكهرباء. أيونات اللثيوم بتبدأ عملها من طبقة الكاثود، واللي بتكون مصنوعة من الكوبالت أو المنجنيز أو النيكل أو الأكسجين، لما البطاريات بتتشحن، الكهرباء بتدفع أيونات الليثيوم من الكاثود مرورًا بالسائل الموصل للكهرباء لحد ما توصل للأنود، واللي بيكون مصنوع من الجرافيت. بعد ما بتشتغل البطارية، بترجع أيونات الليثيوم تاني من الأنود لمكانها الطبيعي اللي هو الكاثود. لما ترجع أيونات اللثيوم كلها للأنود ده ساعتها بتظهر لك كلمة ”Low battery“.
في مئات الملايين من البطاريات بيتم إنتاجها سنويًا، وبحسب”بول شيرنج“، مهندس كيميائي بجامعة كلية لندن، إن الحوادث الكارثية اللي بتحصل زي الانفجار والانصهار دي شيء نادر الحدوث، وبحسب لجنة سلامة المنتجات الأمريكية، فعدد البطاريات المعيبة من سنة 2002 لحد دلوقتي كان 43 بطارية فقط.
بطاريات الليثيوم ممكن تنفجر أو تنصهر، لما المكونات الكهربائية اللي موجودة داخل دائرة تسخن جدًا لحد ما تذوب أو لما تحصل بعض المشاكل الميكانيكية داخل البطارية بعد سقوط اللابتوب أو الموبايل أو إن الميكانيكيات دي تتركب غلط. معظم الحالات اللي بتحصل بيكون إن في جزء ما في البطارية بيسخن جدًا ولخطأ ما مانفعش إنه يبرد بسرعة، فخلق سلسلة من ردود الفعل اللي بتولد مزيد من الحرارة، وبالتالي البطارية بتنفجر أو على أقل تقدير بتتحرق.
زي ما ذكرنا قبل كده، في بعض البطاريات بتعتمد على بعض مزايا الآمان الداخلية اللي بتمنع بقى سلسلة ردود الفعل اللي بتزود الحرارة دي لفترة أطول يعني، لكن كده كده لما الحرارة هتزيد جدًا، لازم البطارية تتحرق. يعني، في بعض البطاريات ممكن تفضل محتفظة بقوتها لحد ما توصل حرارتها الداخلية لـ1000 درجة مئوية، بعدها بتبدأ أسلاك النحاس الداخلية في الانصهار، وده بيخلق سلسلة ردود الفعل إياها، فبتتحرق البطارية، أما البطاريات ردئية الصنع، فبتنفجر على طول.
يعني، على الرغم من إن انفجار البطاريات ده شيء يعتبر نادر الحدوث إلى حدٍ ما إلا إنه ممكن، لو كنت من الناس اللي بتستعمل البطاريات بشكل مستمر ودون أي تهوية مناسبة أو الناس اللي بتوصّل الشاحن بشكل مستمر في اللابتوب أو الموبايل، وده غالبًا بيؤدي لحرق البطارية يعني إلا في بعض الحالات اللي بيوصل فيها الموضوع للانفجار. عمومًا، كل واحد يخلي باله من بطارياته علشان بطاريات الليثيوم دي مالهاش آمان خالص بقى.
المصادر
