ليه مابنفتكرش طفولتنا؟
كتب: أحمد حسين
تقريبًا كل واحد فينا محتفظ بألبوم صور الطفولة وكل فترة بيبدأ يدوّر فيه ويطلع صور ليه وهو طفل يتفرج عليها، وتقريبًا برضه ماحدش فينا بيكون فاكر أي شيء عن الصور دي، آه بتشوف تورتة وجاتوه بتقول إن ده كان عيد ميلاد، بس دي عيد ميلاد مين؟ ومين اللي في الصور دول؟ دي كلها حاجات بتتحكي لك من ناس كُبار كانوا موجودين في الأوقات دي، طيب أنا مش فاكر ليه؟
الحالة دي بيطلق عليها ”فقدان ذاكرة الطفولة – Childhood amnesia“، بمعنى إنك قبل ما يكون عندك سنتين مابتكونش فاكر أي حاجة، وبعد ما تتم السنتين بتبدأ تفتكر الأحداث اللي بتحصل قدامك بشكل مؤقت، يعني مثلًا لو روحت الملاهي ولعبت لعبة وكسبت هدية هتكون فاكر الهدية لوقت مؤقت مثلًا بس مش هتكون فاكر باقي تفاصيل اليوم.
لما بتوصل لسن أربع أو خمس سنين، بتبدأ تفتكر الأحداث بتفاصيل أكتر وتقدر توصفها بشكل أحسن، أما من سن سبع إلى تسع سنين بتبدأ تفتكر كل شيء بيحصل بالتفصيل، وتقدر تخزنه في الذاكرة طويلة المدى، وتحكيه بعدها بسنين وبتفاصيله. طبعًا في بعض الأشياء مابينطبقش عليها نفس الكلام زي اللغة مثلًا بتتعلمها في سن صغير أقل من سبع سنين وبتفضل فاكرها طول العمر.
طيب أنا ليه بنسى أغلب أحداث طفولتي كلها؟
العلماء قالوا إن الموضوع له علاقة بالمخ أكيد فعملوا تجارب وعرفوا منها إن ”الحُصين – Hippocampus“ _وهو الجزء اللي غالبًا بيكون مسئول عن الذاكرة_ مابيكونش لسه اكتمل في الوقت ده. الحصين مسئول أيضًا بشكل أساسي عن ذاكرة اسمها ”الذاكرة العرضية – Episodic memory“، ودي الذاكرة اللي بتخزن الأحداث وأماكنها وأوقاتها والمشاعر المرتبطة بيها.
في تجربة أخرى أجراها فريق من الباحثيين، عن طريق إنهم جعلوا الحُصين في الفيران ينتج خلايا عصبية كتير، واكتشفوا ساعتها إن الفيران أصبحت بتنسى كتير. طيب ده إيه علاقته بينا؟ العلماء قالوا إن المخ في السن الصغير بينتج خلايا عصبية كتيرة جدًا، وده بيخلينا كل ما بنكبر كل ما بننسى طفولتنا أكتر. هل ده معناه إننا بنتوقف عن إنتاج الخلايا العصبية لما بنكبر؟ الحقيقة لأ، بنفضل ننتجها برضه بس الحُصين بيكون اكتمل، وبقى قادر يتعامل مع العدد ده من الخلايا العصبية.
على الجانب الأخر، في بعض العلماء اعترضوا على التجربة دي، وقالوا إن الحُصين مش هو الجزء الوحيد المسئول عن الذاكرة، وإن في أجزاء أخرى زي ”اللوزة الدماغية – Amygdala“ وزي ”القشرة الأمامية – Prefrontal cortex“ ممكن تخزن ذاكرة. لذلك هما مش عارفين لحد دلوقتي سبب واضح لفقدان ذاكرة الطفولة، بس اللي متأكدين منه إننا بننسى كل شيء في طفولتنا تقريبًا!
المصدر
