هو الإندومي كمان بيجيب سرطان؟
كتب: أحمد حسين
في بعض الكلمات اللي بتترجم بشكل مختلف عن معناها في علاقتنا بأمهاتنا بالذات، يعني مثلًا جملة زي ”إنت جيت يا زفت؟“ دي مش المقصود منها الغلط فيك لا سمح الله، دي غالبًا بتستخدم لما بتيجي تطمّن عليك وأنت راجع البيت متأخر شوية. في حين في جملة تانية مهمة بتظهر في الأجواء لما ماما تبقى حالتها المزاجية مش مظبوطة، وهي ”أنا مش عاملة أكل النهاردة!“ ودي غالبًا بتترجم لأكل غير صحي هتطلبه دليفري وغالبًا على حسابك لأن اتبطرت على البيضتين وحتة الجبنة برغيف العيش!
طبعًا انت استقبالك للكلمة دي بيختلف لما تيجي تفكر بقى هتطلب أكل منين مع بصة سريعة في محفظتك. ممكن تلاقي كل اللي حيلتك مايخلكش تجيب أكتر من فطيرة من الفرن اللي على أول الشارع أو كيسين إندومي، وده الأغلب.
الإندومي بقت حل سريع وعملي لكتير من الشباب والأخطر لكتير من الأمهات اللي بيأكلوها لأطفالهم الصغيرين، كل ده كان عادي لحد ما ظهرت الجملة المخيفة بتاعت ”بس ده بيقولوا إنها بتجيب سرطان“، فهل فعلًا أكل الإندومي ممكن يتسبب في السرطان؟
طيب في الأول، خلونا نعرف إيه هي الإندومي اصلًا:
إيه هي الإندومي أصلًا؟
الإندومي دي شعرية سريعة التحضير بتتكون من دقيق أبيض وبعض المركبات الكيميائية زي حمض الفوليك والصوديوم والنشويات والدهون والفينول وملح المونوصوديوم جلوتاميت. كل المواد دي بتدخل في خط إنتاج وبتعدي بمراحل كتير منها مراحل تنقية وتسخين وتبريد وتغليف، وبتخرج في النهاية المُنتج اللي بيوصل لك ده. الفيديو ده بيوضح لنا عملية تصنيع الإندومي بتتم إزاي.
هل الإندومي بتتسبب في الإصابة بالسرطان؟
الإجابة لأ، الإندومي لا يتسبب بالإصابة سرطان، وده مش لأنه مفيد أو غير ضار لكن لأن أصلًا فهمنا لفكرة السرطان مش واضح وأحيانًا بيكون خاطئ. بحسب كلام العلماء، السرطان بييجي في أغلب الأحيان عن طريق تحوّل عشوائي خاطيء في الجينات بيخليها تتكاثر بشكل سريع جدًا مكونةً أورام في الدم، الخطأ ده ممكن يتسبب في حدوثه حاجات كتير لدرجة إن أحد العلماء اعتبر الإصابة بالسرطان سوء حظ!
طيب هل ده معناه إن الإندومي مش مضر؟
الحقيقة الإجابة برضه لأ، الإندومي ممكن يكون مُضر على نواحي أخرى، إحنا بس اللي بنعتبر إن الحاجة الفلانية مش هتكون مُضرة إلا لو اتسببت في الإصابة بالسرطان. ضرر الإندومي موجود في المقام الأول في إنها بتتكون من الأساس من الدقيق الأبيض، والنقطة دي لوحدها تخليك تفكر قبل ما تاكل إندومي بكميات كبيرة لأن الدقيق الأبيض دائمًا مرتبط بالسمنة المفرطة لأنه بيمد جسمك بكتير من النشويات غير المفيدة.
طبعًا ده غير وجود الصوديوم كعنصر أساسي في الإندومي. منظمة الصحة العالمية أوصت بإنه من الأفضل التقليل من نسبة الصوديوم لتخفيض ضغط الدم والحد من خطورة الإصابة بأمراض القلب والأوعية الدموية والسكتة الدماغية، وبحيث إن نسبة الصوديوم للأشخاص للبالغين لا تتعدى 2 جرام صوديوم يوميا أي ما يعادل الموجود في 5 جرام من ملح الطعام.
أما بالنسبة للأطفال فأوصت المنظمة بتخفيض نسبة الصوديوم للتحكم في ضغط الدم عند الأطفال، فمفروض تكون أقل من نسبة الـ2 جرام المسموح بيها للبالغين على أساس متطلبات الأطفال من الطاقة.
ده كله بالإضافة إلى كمية النشويات والدهون (الزيت اللي بيستخدم في التتبلية) اللي بتكون موجودة في الإندومي بطبيعة الحال. عشان كده لو أكلت الإندومي زيادة عن الحد الطبيعي (بإفراط يعني) ممكن ضغط الدم عندك يعلى وكمان نسبة الكولستيرول في الدم هتزيد، وده معناه إن مشكلة الإندومي مش بس إنها ممكن تسبب سمنة مفرطة وبس لكن دي كمان ممكن تتسبب في الإصابة بأمراض القلب.
ده عن الأخطار الوارد حدوثها عن الأغلبية العظمى من الناس، لكن كمان في خطر من مادة الفينول على الناس اللي بيعانوا من (Genetic disorder phenylketonuria)، وده خطأ جيني وراثي ممكن يؤدي بالمصابين بيه إلى مشاكل صحية كتير ممكن توصل لتلف في المخ. لحسن الحظ إنه مرض نادر بيحصل بنسبة 1 لكل 10 آلاف شخص. إلى جانب ملح المونوصوديوم جلوتاميت اللي ممكن بعض البشر يكون عندهم حساسية تجاهه.
الإندومي لا يحتوي على قيمة غذائية
الشيء الأكثر خطورة من وجهة نظري هو إن الإندومي لا تحتوي على أي قيمة غذائية، يعني هي فعلًا عبارة عن شعرية مجففة وسريعة التحضير وطعمها لذيذ بالنسبة لبعض الناس لكنها مش مغذية إطلاقًا. يعني بمعنى إن الأم اللي عندها أطفال وبتكسل تغذيهم بمواد تزود جسمهم بالبروتين والكالسيوم والعناصر اللي بيحتاجوها وبتغذيهم على الإندومي، غالبًا مابتديهمش أي قيمة غذائية في اليوم وده مش كويس بالذات لكونهم لسه في مراحل النمو ومحتاجين ياكلوا أكل يحتوي على قيمة غذائية.
بإختصار يعني، مش لازم الحاجة تكون بتجيب سرطان علشان تبقى مُضرة، ومش بالضرورة كل حاجة مش بتجيب سرطان تبقى مفيدة. وعليه، الإندومي ممكن يكون مُضر فعلًا لما يتم تناوله بإفراط، على المدى البعيد حتى لو مش هيجيب سرطان كفاية إنه ممكن يتسبب في الإصابة بالسمنة المفرطة وأمراض القلب وضغط الدم وغيره.
المصادر:
