السيلان مُقاوم للمضادات الحيوية!
كتبت: مها طـه
من فترة والدتي تعبت جدًا. التهاب في الأمعاء والإثنى عشر، وكان الحل عند الدكتور في المضاد الحيوي عشان يعالج الالتهاب. للأسف أنا ماعرفتش إن الدوا عبارة عن مضاد حيوي غير بعد ما اشتريته، وبمجرد ما عرفت رفضت إن ماما تاخده.
السبب، ببساطة، إن المضاد الحيوي لازم التعامل معاه يكون بمُنتهى الحرص، وفي الحالات اللي يستعصي فيها العلاج بأي أدوية تانية، لأنه للأسف استعمالنا المُفرط للمُضادات الحيوية مع أي حالة مرضية وخلاص، هو اللي خلانا نوصل لمرحلة إننا نكون على مشارف عصر ما بعد المضادات الحيوية، وده ممكن تعرفوا تفاصيل أكتر عنه من هنا.
المشكلة لم تكُن بس إن الدواء اللي كتبه الدكتور مضاد حيوي، لكنه مضاد حيوي متخصص في علاج حالات الالتهاب الرئوي وحالات تسمُم الدم، بالإضافة لمرض السيلان!
وهنا كانت المفاجأة اللي أعلنتها المراكز الأمريكية لمكافحة الأمراض (CDC)، بإن البكتريا المُسببة لمرض السيلان حاليًا بتطور من مقاومتها ضد أخر نوعين من المضادات الحيوية اللي بتقدر تعالج النوع ده وتقضي عليه!
السيلان ومقاومة المضادات الحيوية
معنى الكلام ده إن السيلان، وهو مرض بينتقل عن طريق الاتصال الجنسي، على وشك إنه يبقى مُقاوم لكل أنواع المُضادات الحيوية، وكمان غير قابل للعلاج عن طريق الأدوية الموجودة حاليًا، وللأسف المرض ده وطريقة انتقاله تُنبئ بخطر كبير، لإن حتى الواقيات الذكرية مش بتقدر تمنع انتقاله بدرجة كبيرة.
في الولايات المتحدة الأمريكية مثلًا بيتراوح عدد الأشخاص اللي بيُصابوا بالبكتريا المُسببة للسيلان حوالي 820 ألف شخص سنويًا، والمشكلة إن نصهم بتتراوح أعمارهم بين 15 و24 سنة، طبعًا في مصر صعب تلاقي إحصاء دقيق للأنواع دي من الأمراض بالذات، لكنه يظل مرض خطير وطريقة انتقاله صعب أوي السيطرة عليها.
عينة للبكتريا المسببة لمرض السيلان
حاليًا الأطباء بيستخدموا مزيج من نوعين من المُضادات الحيوية لعلاج العدوى بالسيلان، وهما ”أزيثروميسين“ و”سيفترياكسون“. الأطباء بيأملوا إن الاستراتيجيات اللي بيتبعوها تخلي البكتريا تتوقف عن مقاومة أي أدوية مُستخدمة للعلاج في المستقبل القريب، ومع ذلك نتايج الأبحاث كلها بتُشير لإن البكتريا بالفعل بتقاوم في النوعين دول من المُضادات الحيوية، وكمان المقاومة دي في ارتفاع متزايد.
سنة 2014 ارتفعت نسبة مقاومة عينات البكتريا المُسببة للسيلان للمُضاد الحيوي ”أزيثروميسين“ من 0.6 لـ2.5 في المئة، بمعنى تاني المقاومة زادت لأربعة أضعاف، ونسبة المقاومة للمُضاد الحيوي ”سيفترياكسون“ من 0.4 لـ0.8 في المئة.
طبعًا الأرقام دي ممكن تكون بالفعل لسة صغيرة، والحالات اللي بتقاوم النوعين دول من المضادات نجحت المُضادات الحيوية التانية في علاجها، لكن للأسف برضة الزيادة دي تُعتبر بمثابة إشارة حمراء للباحثين في المراكز الأمريكية لمكافحة الأمراض (CDC).
صرح ”روبرت كيركالدي“، من (CDC)، بإن النسب بالرغم من إنها منخفضة، لكن المشكلة هو إنها بالفعل أثبتت قدرتها على المقاومة من الأساس وده تكرر، وبالتالي بقى فيه خطر من احتمال مقاومة البكتريا لكل الأدوية اللي بيتم استخدامها حاليًا، وبكده في إمكانية حقيقية جدًا، إن مرض السيلان في المُستقبل يبقى مرض غير قابل للعلاج للأسف.
إيه هيحصل في حالة مقاومة المضاد الحيوي؟
للأسف عواقب ده لو حصل خطيرة جدًا، لأنه ببساطة السيلان كعدوى بكتيرية بيتسبب في ألم وحرقان وتدفق للإفرازات بشكل كبير من الجهاز التناسلي، ده غير إنه طبعًا بيؤدي لمضاعفات كبيرة على المدى الطويل أهمها هو إنها بتزود احتماليات الإصابة بالعقم، وإذا تسربت البكتريا للدم بأي شكل، هتؤدي للوفاة.
ليه السيلان بالتحديد؟
على الرغم من إن الباحثين مازالوا مش متأكدين من إجابة السؤال ده، لكن في جزء من المشكلة بيكمُن في إن البكتريا لما بتقدر تقاوم نوع من المضادات الحيوية أو الأدوية، فهي بتورث المقاومة دي للأجيال اللي بعدها وبكده مش بتفقد قدرتها على مقاومة نفس الانواع.
وده معناه إنها تقدر تراوغ حتى أنواع المُضادات اللي كانت بتُستخدم في علاجها من عشرات السنين، وده اللي دفع شركات الأدوية حاليًا إنها تشتغل على تطوير مضادات حيوية جديدة، لكن للأسف حتى الحل ده ممكن ياخد سنين قبل ما ينزل للأسواق، وده لأن عملية التصنيع الدوائي وإجراء التجارب على البشر بتمر بتعقيدات وإجراءات سلامة مختلفة للتأكد من فاعلية الدوا.
لحد دلوقتي الباحثين لم يتكهنوا بمدى سرعة السيلان في مقاومة جميع المضادات الحيوية دي، ومع ذلك فمن اللازم محاولة استباق المشكلة والإنتباه لعلامات الخطر، ولحد دلوقتي الحل المُتاح هو محاولة وقف الانتشار من الأساس، وفي نفس الوقت محاولة العلماء للوصول لحلول سريعة وجيدة في نفس الوقت.
المصادر:
statnews sciencealert wisegeekhealth scientificamerican cdc.gov
