طاقة المخ: ليه لازم تعمل شغلك المهم الصبح؟
كتبت: مها طـه
أيام ما كنت في الكلية كان عندي نظام مُتبع للمذاكرة _كلية علوم فكنت بذاكر طول السنة عادي_. أقوم الصبح بدري في يوم الأجازة وأول حاجة أعملها هي إني أذاكر المادة الأصعب الأول. كان جوايا إحساس إني كده هابقى رايقة أكتر ومخي مستعد يستقبل المعلومات بشكل أوضح. حقيقي مكنتش أعرف إيه السبب في إحساسي ده، لكنه كان مفيد وبيجيب نتيجة كويسة معايا.
بعد كدة لاحظت إنه فعلًا معظم الناس كدة، الإنجاز الحقيقي في الشغل أو المذاكرة بيكون عندهم الصبح بدري، وعلى العصر كده بيبقى خلاص مفيش أي طاقة. وبرضه مكنش عندي أي تفسير، لحد ما قابلت تفسير لبحث في علم النفس بيقول إن أكتر وقت ممكن يكون مثمر بالنسبة للشغل أو المذاكرة هو أول ساعتين بعد الصحيان من النوم، وأقل وقت من حيث الإنتاجية هو فترة ما بعد الظهر يعني في حدود الساعة 3 العصر كدة، وكان السبب في ده هو المخ.
مخ الإنسان زيه زي باقي أعضاء جسمه، بيتعب ويحس بإرهاق ولازم يستريح، الأقات اللي المخ فيها بيكون مرهق اتفق علماء النفس على تسميتها ”decision fatigue“.
اتخاذ القرارات بالنسبة للمخ بيحتاج نفس القدر من الإرادة عشان تقدر تقاوم إغراء شئ معين سواء كان أكل مثلًا لو عامل دايت أو مخدرات أو غيرها، وده اللي قاله ”روي باوميستير“، الطبيب النفسي، واللي بيدرس حالة إرهاق المخ واتكلم عنها في كتابه ”قوة الإرادة: إعادة اكتشاف أعظم قوة في الإنسان“، واللي قال إن اتخاذ قرار معين زيه زي الامتناع عن شئ معين بيحتاج لطاقة عقلية كبيرة يوميًا، وبالتالي فالطاقة العقلية ممكن تُستنزف، زيها زي طاقة العضلات لو حملت عليها هتتعب ومش هتقدر تشيل عليها أكتر.
الشغل أو حتى المذاكرة كلها بتتطلب القيام بقرارات مختلفة، زي مثلًا قرارك إنك تذاكر فيزياء لمدة 3 ساعات متواصلة أو إنك تكتب مقال بحثي، وحتى لو شغلك مكتبي ومش عملي، هتلاقيك مضطر تاخد عدد من القرارات كل يوم عشان الشغل ينجح وهكذا، لكن الحقيقة إن كل القرارات محسوبة عليك، يعني مثلًا حضرتِك كبنت، لو قومتي الصبح من النوم قبل الشغل وأخدتي ساعتين عشان ”تقرري“ هتلبسي إيه، فده يعتبر إهدار لطاقة عقلية في اتخاذ قرار ممكن بمنتهى السهولة يتاخد من قبلها بيوم قبل النوم مباشرةً.
”مارك زوكربيرج“، مؤسس الفيسبوك والمدير التنفيذي له، بيلبس كل يوم نفس اللبس وهو رايح لشغله، وده لأنه ببساطة بيطبق القاعدة العلمية دي في عدم استهلاك وقت ومجهود عقلي لاتخاذ قرار زي ده.
ضبط النفس طريقك للحفاظ على طاقة المخ
”باوميستير“ صرح لجريدة النيويورك تايمز بإن تقريبًا كل قرار بتاخده من أول ما بتصحى من النوم بيأثر على مستوى الطاقة العقلية وممكن يسرع من إرهاق المخ. تخيل معايا حضرتك لما تصحى الصبح وإنت بتحاول تزيح نفسك من على السرير بكل طاقتك، وبعدها تقرر هتلبس إيه، وتنزل تركب المترو أو أي مواصلات عشان تروح شغلك، وتاخد قرار إنك هتحافظ على هدوئك وتلتزم بقواعد الأدب قدام كل الاستفزازات الموجودة حواليك، أكيد في الحالة دي على ما توصل شغلك هتكون استنفذت قدر كبير من طاقتك العقلية، وعليه علينا وعلى ضبط النفس والتعود على الهدوء الحقيقي. من وجهة نظري نام بدري بحيث إنك تصحى نشيط، سماعة موبايلك وأغنية لطيفة تفصلك عن اللي حواليك ممكن تكون كفيلة بإنك تضمن حالة ”power save“ أو حفظ للطاقة.
الأشخاص الأكثر مسئولية أكثر عرضة لإرهاق المخ
كل ما كان الشخص مسئول أكتر، كل ما كان مُعرض أكتر لإرهاق المخ. فمثلًا القضاة من أكتر الأشخاص اللي عملهم بيتطلب مسئولية كبيرة، وبالتالي بيحتاج لطاقة عقلية كبيرة. في دراسة اتعملت سنة 2011، قام فيها مجموعة من الباحثين في كلية كولومبيا للأعمال وجامعة ”بن جوريون“ بتتبع أحكام القضاة في قضايا الإفراج المشروط، في أربعة سجون رئيسية في إسرائيل. بعد تتبع حوالي 1112 حكم في خلال 10 شهور، الباحثين اكتشفوا إن الأحكام والقرارات الصائبة كانت مرتبطة بنسبة كبيرة بالقضاة اللي حكموا بعد استراحة الغدا.
الباحثين وقتها قالوا إن الأحكام والقرارات الصائبة كانت بتقل قبل الاستراحة من 65% لحد صفر%، لكنها وبمجرد الحصول على الاستراحة والرجوع منها كانت بترجع تاني لحوالي 65%، وده معناه ببساطة إنه كل ما كان القاضي ذهنه مرتاح، كل ما كانت أحكامه وقراراته صائبة أكتر.
كل ده معناه إن المخ بيكون الصبح بدري بعد الصحيان من النوم في أتم الاستعداد لكل المشاكل العقبات والقرارات الصعبة، وكل ما تم استهلاكه بالقرارات كل ما بدأت قدراته تقل، وبالتالي يوصل لحالة إرهاق المخ، واللي معاها بيبقى صعب إتخاذ القرارات المناسبة. مع ذلك في بحث بيقول إنه في حالة الشعور بإرهاق المخ بتكون القدرة الإبداعية أكبر، وده لأن الإبداع عادةً بيتطلب خروج برا الصندوق وتفكير بدون قيود، وده اللي بيكون متوفر وقت إرهاق المخ، وعشان كدة ممكن لو حضرتك شغلك بيتطلب حالة من التركيز والقرارات الصعبة تقوم بيها الصبح، أما الأفكار الإبداعية لتطوير الشغل خليها بالليل بعد ما يكون مخك خلاص وصل لحالة الإرهاق.
المصادر:
