صملاخ الأذن.. صملاخ؟!
كتبت: يارا كمال
أيوة هو اسمه كده للأسف. أو خلينا نبسطّها شوية ونخليها المادة الشمعية في الأذن. يا ترى بتتكوّن إزاي ومنين؟ يا ترى ليه موجودة أصلًا؟ عشان تضايقنا وترازي فينا مثلًا؟
الصملاخ مادة بتكون موجودة في الأذن الخارجية، وبتتكون في القناة السمعية اللي بتوصّل بين الأذن الخارجية اللي إحنا شايفينها دي والأذن الوسطى. القناة السمعية بتبقى متبطنة بالغدد الصملاخية اللي بتنتج المادة الشمعية مادة الزهم أو (Sebum)، ودي مادة دهنية بيفرزها الجلد، وخلايا الجلد الميتة بتساهم في صناعة المادة الشمعية.
المادة الشمعية دي بتتكوّن من 60% كيراتين (نوع من البروتينات)، والباقي توليفة من خلايا الجلد الميتة وأحماض دهنية وكوليسترول ومركبات تانية.
تركيب المادة الشمعية مابيختلفش من شخص للتاني، بس المادة نفسها بتختلف في اللون والقوام. يعني الناس اللي من شمال شرق آسيا زي الصين وكوريا بتبقى المادة الشمعية اللي عندهم دي ناشفة في الغالب وبيبقى لونها من الأحمر للأسود، أو ممكن تبقى بتتقشّر كده ولونها أصفر باهت. بالنسبة لبقية الناس، المادة الشمعية دي بتبقى لزجة ولونها من الأصفر اللي مدّي على برتقاني لحد البرتقاني المحمر.
على فكرة المادة الشمعية دي مش مادة وحشة، و أنت مش محتاج تتخلص منها إلا لو هي متراكمة في ودنك، في الحالة دي، الدكتور بيشيلها لك. (اتفرجوا على الفيديو ده بس لو بتقرفوا بلاش.
المادة دي زي فخ للبكتريا أو أي حاجة صغيرة ممكن تدخل الودن. وعلى فكرة، المادة دي بتنضّف نفسها بنفسها، يعني هي بتقشّر وتقع بره الودن، فأنت مش محتاج تنضّف ودنك بالقطن طول الوقت، بالعكس ده مضر لإن القطنة ممكن تزق المادة الشمعية جوه الودن أوي أو ممكن حتت من القطن تقع جوه القناة السمعية ، فتبقى بدال ما نضفت ودنك ضرتها بشكل أكبر.
المصدر
