الوجه المظلم للمبة الليــد – Led!
كتبت – يارا كمال
البشر دول غلابة والله بحضارتهم. كل حاجة يخترعوها عشان تساعدهم في حياتهم يا إما يلاقوا فيها أضرار يا إما متوفيش بكل احتياجاتهم اللي ما بتخلصش. بدل لمبة الجاز جبنا التنجستين المقلوظة دي، ودلوقتي عملنا اللمبة الليد عشان مشاكل اللمبة الفلوروسنت المدمجة (CFL).
الميزة في اللمبة الليد (LED)، إن ضوءها أحسن، وإن مفيهاش زئبق، اللي موجود في أختها الـفلورسنت المدمجة (الزيبق ده خطر)، وكمان بتوفر طاقة بالنسبة للـفلورسنت.
بس للأسف الحلو مايكملش
لإن فيه دراسة اتنشرت سنة 2010، بتقول إن اللمض الليد فيها رصاص وزرنيخ ومواد خطيرة تانية. اللمض الليد الحمرا، واللي قوتها قليلة بيبقى فيها رصاص أكتر 8 أضعاف، وده بيزوّد احتمال الإصابة بالسرطان وأمراض تانية.
اللمض الليد البيضا فيها أقل نسبة رصاص، بس فيها كمية نيكل كبيرة اللي بيسبب حساسية. كمان النحاس اللي في اللمض الليد بيتراكم في البحيرات والأنهار وممكن يسمم الحياة البحرية.
بس برضه لو فيه لمبة ليد اتكسرت وحد استنشق اللي فيها مش هيجيله سرطان، لإن عشان يحصل ده لازم يستنشق كم أكبر من المواد السامة. بس لو اللمض الليد اتكسرت في البيت، لازم تكنسها بماسك وجوانتي، وتتخلص من المخلفات دي ومن المكنسة نفسها احتياطي برضه! فالمفروض إن المعادن التقيلة تقل في اللمض الليد، أو يتم استبدالها بمواد آمنة.
المصدر
