الكلب بيشم ريحة الخوف!
كتبت: مها طه
لو إنت شخص بتحب الكلاب، فأكيد إنت مش بتخاف منها، يمكن كمان بتستغرب إزاى ممكن حد يخاف من كائنات جميلة وإجتماعية ومعروفة بوفائها وذكائها زي الكلاب؟، لكن الحقيقة اللى لازم نقولها إنه فى أشخاص كتير بيخافوا من الكلاب.
فى ناس ممكن تخاف من أنواع معينة من الكلاب، مثلًا اللى حجمها كبير أو تبان عليها الشراسة، وفى ناس تانية بيخافوا من الكلاب فى المُطلق مهما كان نوعها حتى لو كلب لولوه _رغم إنها مش بالجحم فعلًا_، غالبًا لو إنت من الناس اللى بتخاف من الكلاب، هتكون صادفت الشخص اللي بيقولك اعمل نفسك مش خايف عشان الكلب بيشم ريحة الخوف، وتلاقيه بيمد كده وهو بيقول “الخوووووووف” بطريقة كافية إنها ترعبك بالإيحاء!
كلنا سمعنا عن موضوع الكلب اللى بيشم ريحة الخوف ده، الخوف شعور زيه زي الحب والسعادة والحزن، فهل الكلب عنده القدرة إنه يشم المشاعر؟ وهى المشاعر ليها ريحة أصلًا؟
أساتذة علم الحيوان لما درسوا حاسة الشم عند الكلاب، واللى بتُعتبر من أهم مميزاتهم كحيوانات، لقوا إنها قوية جدًا، فى بعض الأنواع ممكن تبقى أقوى عندها من الإنسان بـ1000 مرة، وحجم المنطقة المسئولة عن الشم أكبر بـ40 مرة من الإنسان، وده بيخليه يقدر يميز روايح كتيرة ومختلفة، ويصنفها كمان فى مخه، مهما كانت بالنسبة لنا مش ملحوظة، لكن هل معقول يكون بيشم ريحة الخوف ؟
الحقيقة إن الكلب بيميز جدًا ريحة العرق، والعرق بيكون شئ طبيعى إنه يزيد فى حالة الإحساس بالخوف، العرق بيزيد فى حالة الخوف نتيجة لأثر هرمون الادرينالين، وباقى الهرمونات اللى بيفرزها الجسم فى حالات القلق والتوتر والغضب، واللى بتخلى الجسم فى حالة استعداد للجري أو للهروب أو حتى المواجهة.
فى الحالة دى الكلب بيقدر يشم ريحة العرق اللى خرج من الغدد العرقية حتى لو كان بالنسبة لك مش ملحوظ فبالنسبة له مميز، وبكدة نقدر نقول إن الكلب مش بيشم ريحة الخوف لكنه بيشم ريحة الهرمون أو ريحة العرق الناتج عن الخوف، لكن هل الريحة دي بس اللى بتستفز الكلب؟
الكلب زي ما قلنا من الحيوانات الذكية، بيقدر بسهولة إنه يلاحظ لغة الجسد عندنا، سهل إنه يدرك إنك خايف أو متعصب أو قلقان، و ده السبب فى إن اللى بيحبوا الكلاب بيحسوا ان الكلب حاسس بيهم وبمشاعرهم. الحقيقة إن الكلب كمان ممكن يُدرك خوفك قبل ما أنت شخصيًا تدركه، وده لأنك لو خايف فغالبًا بتركز أوى مع الكلب وتبص له بشكل مباشر، وده طبعًا عشان تقدر تتجنبه أو تهرب لو ظهر أى سلوك عنيف من الكلب أو حتى مجرد قرب منك، فى الحالة دى الكلب بيترجم النظرات دى على إنها استعداد منك للهجوم عليه، فبيتحفز ويبقى عدواني بس عشان يقدر يدافع عن نفسه، يعنى من الأخر ده بيبقى مجرد سوء تفاهم بينكم مش أكتر صديقي العزيز!
و بكدة نقدر نقول إن إدراك الكلب لخوفك بيبقى ناتج عن مزيج ما بين حاسة الشم وحاسة الإبصار عنده، لكن كمان علشان نكون متأكدين من كلامنا فهو ده اللى وصل له العلم لحد دلوقتى فى تفسير إحساس الكلب بخوفنا منه، ولحد بقى ما يكتشف العلم إيه اللى بيحصل بالظبط، أنا _كشخص بيترعب من الكلاب_ أفضل إنى أسمع كلام ماما و أعض على لسانى من باب إنى أشغل نفسي، و أشتت انتباهى ومبصش ناحية الكلب لحد ما أعدى بسلام، ربنا يجعل كلامنا خفيف عليهم.
المصادر
