الضحك من غير سبب «علميًا» مش قلة أدب
كتب: أحمد حسين
زمان لما كنا أطفال كنا نسمع دايمًا جملة ”الضحك من غير سبب قلة أدب“، ومع إنه عمومًا يعني مفيش حد بيضحك من غير سبب، إلا إنه أهالينا كانوا بيقولوا الجملة دي في الأوقات اللي بيكون فيها ضيوف، أو نكون في الشارع، أو في مكان يعني ممكن يُحرجوا فيه من ضحكنا لأي سبب.
بعد ما كبرنا شوية، سمعنا رأيين مختلفين عن الضحك، ناس تقول إن الضحك يميت القلب، وناس تقول إنه يُطيل العُمر، والحالتين عكس بعض تمامًا، فالواحد مبقاش فاهم إيه اللي فيهم ممكن يكون حقيقي؟ يعني لو ضحكت كتير عمري هيطول، ولا هيقصر. الحقيقة بقى، إن الكلام العلمي لا بيؤيد ده، ولا بيؤيد ده. علميًا، الضحك مفيد للإنسان فعلًا بس خلونا نعرف إزاي؟
”د. لي بيرك“، أستاذ مساعد بجامعة لوما ليندا في كاليفورنيا، واللي قضى ما يقرب من ثلاثة عقود بيدرس توابع الضحك على المخ والجسم، بيقول إن عقلك ونظامك الهرموني وجهازك المناعي بيحتاجوا يتواصلوا مع بعض باستمرار، وده بيأثر عليك في حاجتين: مزاجك الخاص وقدرتك على مقاومة المرض.
ناخد الحزن كمثال، الحزن بيزوّد نسبة هرمون التوتر، والهرمون ده بيقمع وظائف الجهاز المناعي، وده ممكن يؤدي للإصابة بالأمراض. أضاف د. بيرك إنه مابيمرش حتى أسبوع واحد من غير ما يكون في بحث جديد بيربط التوتر بمرض رئيسي آخر. ليه طيب اخترنا الكلام عن التوتر بالذات؟ علشان الضحك بيعمل عكس تأثيره تمامًا، د. بيرك قال إن الضحك بيوقف إطلاق هرمونات التوتر (الكورتيزول مثلًا) وبيفرز كمان هرمون الدوبامين المسئول عن السعادة ويعتبر كمان مضاد للقلق.
ممكن نتكلم كمان عن فوائد الضحك من الناحية الجسدية، يعني بعيدًا عن إنه مضاد للقلق والتوتر، فالضحك ممكن يقلل من نسبة الالتهابات عن طريق تحفيز الجهاز المناعي، وكمان يحفز سريان الدم. الموضوع ده تم إثباته عن طريق أبحاث اتعملت في جامعة ويسترن كينتاكي، وقالوا إن الضحكة ممكن تحفز عدد كبير من ”الخلايا القاتلة – Killer Cells“ اللي بيستخدمها الجهاز المناعي لمهاجمة المرض. أضاف د. بيرك إن الكلام ده ممكن يحصل برضه لو كنت بتنام كويس وبتاكل كويس وبتلعب رياضة.
الضحك كمان بيؤدي لتغيير في الطريقة اللي بتتواصل بيها العديد من الخلايا العصبية في المخ، فالضحك مثلًا بيحفّز ترددات ”الجاما“، موجات الجاما دي بقى بتحسن من تزامن نشاط الخلايا العصبية، واللي بدوره بيعزز الذاكرة. وفي العموم ”د. بروفين“ قال إن إحنا لما بنضحك بنبقى في مكان سعيد، وده بشكل عام شيء جيد دائمًا.
المشكلة إن العلماء لحد دلوقتي ماتفقوش على رأي في نقطة إزاي الضحك بيعمل كده، يعني هما لحد لدوقتي مش عارفين الطريقة بالظبط اللي بيحفز بيها الضحك المخ. لكن عمومًا يعني، حتى لو ماتفقوش، فالضحك شيء جميل، ولو بتضحك من غير سبب اضحك، الموضوع أبسط من كده بكتير.
المصادر
