السعادة والاكتئاب: نفس الجينات لكن التأثير مختلف
كتبت: مها طـه
من أكتر الجمل اللي قريتها من فترة على الفيسبوك وضحكتني في البداية كانت إن كل حاجة اتقلت بركتها حتى الإكتئاب مبقاش يخسس زي زمان. الجملة في الأول ضحكتني لكنها بعد كده أثارت انتباهي هل فعلًا كلنا بقينا مكتئبين؟! ومن خلال معرفتي الصغيرة بالاكتئاب فهو مش مجرد الشعور العارض بالحزن والزعل وخلاص.
الاكتئاب مرض ومرض خطير لابد من علاجه لأنه مضاعفاته خطيرة ومؤذية على المدى الطويل، وعشان كدة خلينا نقول كدة من الأول إن الفرق كبير بين مريض الإكتئاب والشخص الحزين بسبب موقف مُعين.
اعرف أكتر عن الاكتئاب وأنواعه من هنا.
في الأول كده البشر زي ما ليهم بنية جسدية بتختلف بينهم وبين بعض، فكمان البيئة النفسية بتختلف. في شخص ممكن يكون حساس بزيادة، وشخص تاني عصبي بزيادة أو شخص تالت أعصابه هادية مثلًا، وده بسبب اختلاف الجينات ما بينا وبين بعض.
تخيل إن حتى حساسيتنا تجاه البيئة المحيطة بينا طلعت هي كمان شئ موجود على جيناتنا داخل أعمق حتة في تكويننا البشري.. جوه الحمض النووي في خلايانا.
السعادة والاكتئاب التؤام المتآخي
طبقًا لبحث جديد قام بيه مجموعة من علماء النفس، بيقولوا إن نفس الجينات المسئولة عن الإصابة بالاكتئاب هي كمان المسئولة عن الشعور بالسعادة. فالجينات دي بتخلينا أكتر حساسية للبيئة المحيطة بينا، وعشان نكون أوضح، حضرتك لو عندك الجينات دي وعايش في بيئة سلبية، فاحتمال إنك تُصاب بالاضطرابات النفسية هيكون أكبر والعكس صحيح.
الكلام ده طبقًا لكلام أستاذ علم النفس المعرفي ”إلين فوكس“، من جامعة أوكسفورد في الممكلة المتحدة. فلو حضرتك عايش في بيئة إيجابية داعمة، فغالبًا هتزيد المرونة العقلية الخاصة بيك وهتنمو مهاراتك المعرفية بشكل إيجابي أكتر.
عشان يكون البحث متكامل، استعان الباحثين بدراسات سابقة، واللي كلها بتركز على كيفية تحكم الجينات والعوامل الوراثية في الصحة النفسية العقلية للأفراد بالإضافة إلى تأثيرها على المهارات المعرفية كمان للمخ.
”كريس بيفيرس“، الطبيب النفسي بجامعة تكساس، قال إن الأشخاص اللي بيفكروا تفكير سلبي ومحبِط بيكونوا أكثر عرضة لخطر الإصابة بالامراض المتعلقة بالصحة العقلية، وأضاف إن في أبحاث كتير في المجال ده بتُشير لتدخل الجينات في العملية دي، وبالتالي فالجينات قد تكون سبب رئيسي في الإصابة بالمرض النفسي.
الجينات والصحة النفسية
كنتيجة للأبحاث السابقة دي، شاف الباحثين إنه لازم يكون في دراسة شاملة تجمع كل اللي ربط بين الجينات والصحة النفسية والعقلية. الجمع بين دراسة تحيُزات البشر وتفضيلاتهم وبين مستوى صحتهم العقلية النفسية يُعتبر أمل جديد لمحاولة فهم أصل المشاكل العقلية النفسية ومُسبباتها.
الفهم بدوره هيؤدي طبعًا لعلاجات أفضل ومُصممة بشكل يتناسب مع حالة كل مريض على حدة، ده غير إنه ممكن يساعد في معرفة الأشخاص الأكثر عُرضة للإصابة بالاكتئاب من قبل إصابتهم حتى.
فريق الباحثين شرحوا وجهة نظرهم وقالوا إنهم لحد دلوقتي ميعرفوش بشكل كامل الآليات النفسية والبيولوجية المثتسببة في الحساسة الزايدة تجاه البيئة، لكنهم بيعتقدوا إن السبب هو المُتغيرات الجينية بين البشر وبعضهم واللي بتتسبب في إحساسهم بالمشاكل، هي نفسها اللي ممكن تبقى إيجابية وتتحول لمُسببات للشعور بالسعادة.
الباحثين أشاروا إلى إن العمليات العقلية اللي بتحصل لما بيتعرض الشخص لموقف معين وكيفية تعامله معاه وتفضيلاته وقتها، بتتحكم فيهم مجموعة من الجينات، بمعنى تاني إنت ممكن تتعامل مع الموقف سلبي كان أو إيجابي وتشوف إن ده رد الفعل المناسب، في حين إن اللي جنبك لو تعرض لنفس الموقف مش هكون ده رد فعله خالص، والسبب في ده هو الاختلاف الجيني بينكم.
الحقيقة إنه فيه عشرات الأوراق البحثية العلمية اللي بتتكلم في الموضوع ده، زي دراسة نُشرت سنة 2006 بتتكلم عن تحديد الروابط بين الجينات والإكتئاب، ودراستين تانيين نُشروا سنة 2010 بيتكلموا عن كيفية تأثير إنحيازاتنا في طريقة تعاملنا مع الأحداث المختلفة.
الخطوة الجاية اللي بيتكلم عنها الباحثين هي الجمع بين مجالي الدراسة دول، والبحث في كيفية تأثُر إنحيازاتنا العقلية بمجموعة من الجينات بالإضافة للعوامل البيئية المحيطة بينا، اللي في النهاية بتدفع الشخص ناحية حاجة من الاتنين يا إما الاكتئاب والتعب العقلي والنفسي أو ناحية التعامل السليم مع المواقف والأحداث والشعور بالسعادة والرضا.
البحث ده هيكون جزء من مشروع ”CogBIAS“ في جامعة أكسفورد، ويُعتبر بحث متعدد التخصصات يهدف لمعرفة الفرق بين المرونة العاطفية والهشاشة والضعف العاطفي.
وبمرور الوقت بيعتقد الفريق بإنهم ممكن يقدروا يعملوا تعديل أو إعادة ترتيب للتحيُزات في المخ وبالتالي الحد من الأفكار المُتعلقة بالإكتئاب أو القلق عند بعض الناس. في النهاية لازم نقول إن البحث لسة في بدايته لكن بمرور الأيام هتتضح الرؤية بشكل أفضل بكتير.
المصادر: cogbias-project ajp.psychiatryonline ncbi nature
