“البروتين” مش لحمة وبس!
كتبت- مها طه
”البروتين“ كلمة لها هيبتها عند أي أسرة مصرية أصيلة. ”لو بتعمل دايت ركز على البروتين“،وأنت صغير ”لازم تاكل لحمة عشان تكبر.. دي البروتين“، ومؤخرًا البنات بقت تعمل شعرها ”كيرياتين وبروتين“. ونظرًا لانتشار الكلمة بزيادة يا جماعة في الأوساط الجماهيرية كان لازم نتعرف على البروتين، وهو إيه لأنه بالتأكيد مش ورك فرخة أو قطعة لحمة ودمتم.
البروتين هو جزئ بيولوجى ”بوليمر بيولوجى“، بمعنى إنه مركب كيميائى يدخل فى تكوين أجسام الكائنات الحية كلها، يعني من غير البروتينات مش هيبقى فيه كائنات حية أصلًا!! يتكون البروتين من سلسلة طويلة من الأحماض الأمينية، واللى بترتبط ببعضها عشان تكون فى النهاية بروتين معين.يبلغ عدد الأحماض الأمينية 20 حمض أمينى مختلف، تخيل عدد البروتينات الناتجة عن ارتباط العدد ده من الأحماض ببعضها، هتلاقي إن الاحتمالات كبيرة جدًأ، وده اللى بيخلى كل وظيفة وكل عضو بيتكون من نوع بروتين معين.(1)
انت أصلا مكون من حاجات كتير فوق بعضها، والبروتين جزء أساسي منها. البروتينات الموجودة فى جسمنا نوعين؛الأول اللى بيتم تصنيعه داخل الجسم على حسب نوعها ووظيفتها، يعني مثلًا فى بروتين هو اللى بيكون العين، وبروتين تانى مسئول بس عن لون العين، تخيل بقى على كده عدد البروتينات فى جسمك!! والتاني اللى بناخده من مصدر غذاء خارجى سواء كان مصدر نباتى أو مصدر حيوانى.
البروتينات هى عبارة عن ترجمة للمعلومات الوراثية الموجودة على الجينات؛ يعنى لو جين لون العين عندك بنى، فالمعلومة الوراثية دى هيتم ترجمتها فى شكل بروتين يعطى العين اللون البنى.أما البروتينات اللى بياخدها الجسم من مصدر خارجى فهى بتتكون من أحماض أمينية_أساسية_ لازم يحصل عليها الجسم من مصدر خارجى لأن تصنيعها داخل الجسم غير ممكن، الجسم بياخد الأحماض دى، ويربطها ببعضها ويكوّن البروتينات اللازمة له.
مصادر الأحماض الأمينية الخارجية دي بتكون إما مصدر حيواني (بيض، لحوم، أسماك، ألبان)، أو مصدر نباتي (فواكه، خضراوات، حبوب، بذور). المصادر النباتية غالبًا بتفقد واحد أو أكتر من الأحماض الأمينية الأساسية،وللسبب ده الأشخاص النباتيين لازم يكتروا من أنواع الأكل المحتوي على بروتين وبعض المكملات الغذائية.(2)
البروتينات ليها دور مهم جدًا فى أجسامنا، وبتدخل فى كل حاجة تقريبًا زي:
1 – الأجسام المضادة: هى عبارة عن بروتينات مهمتها الأساسية هي الدفاع عن الجسم فى حالة الإصابة بالمرض أو العدوى. الأجسام المضادة دى بتمشى فى الدم وعندها القدرة على التعرف على كتير من أنواع البكتريا والفطريات ومسببات المرض. الجسم المضاد هو اللى بيرتبط بالجسم الغريب الداخل على الجسم، ويشل حركته، وبالتالى تقدر كرات الدم البيضاء تقضى عليه.
2 – بروتينات الانقباض: أنواع من البروتينات مسئولة عن الحركة زى الأكتين والميوسين، وهيالبروتينات اللى بتتكون منها العضلات، واللى بتديها القدرة على الانقباض والانبساط، فالحركة ما هى إلا محصلة لانقباض مجموعة من العضلات ثم انبساطها.
3 –الإنزيمات: هى البروتينات اللى بتسهل التفاعلات الكيميائية اللى بتحصل فى الجسم، بتشتغل فى الجسم كأنها عوامل حفازة للتفاعلات دى _من غيرها التفاعل هيتم ببطئ جدًا_، ولأن كل العمليات الحيوية فى الجسم تقريبًا هى تفاعلات كيميائية، فالإنزيمات بتدخل فى كل العمليات تقريبًا. فى عملية الهضم مثلًا فى مجموعة كبيرة من الإنزيمات بتشتغل عشان تكمل دور بعضها وتهضم الأكل؛فهنلاقي إنزيم الببسين الموجود فى المعدة الهاضم للبروتينات بداخلها، وإنزيم التربسين اللى بيهضم البروتينات لكن فى الأمعاء، ده غير إنزيم اللاكتيز واللى بيكسر سكر اللاكتوز الموجود فى اللبن، بالإضافةللإنزيمات العصبية اللى بتتحكم فى عملية الإحساس زى إنزيم الكولين إستريز.
4 –الهرمونات: الهرمونات نفسها ما هي إلا بروتينات بتقوم بدور الرسول بين الخلايا عشان تنظم العمليات الحيوية فى الجسم. مثلًا هرمون الإنسولين اللى بينظم مستوى السكر فى الدم عشان يحافظ عليه ضمن المعدل الطبيعى، أما هرمون الأوكسيتوسينفبيتمإفرازه عشان يحفز الانقباضات، وبالتالى يسهل عملية الولادة، في كمانهرمون النمو اللى بيساعد الجسم فى النمو وبناء العضلات، الإستروجين والبروجسترون (هرمونات الأنوثة)، والتستوستيرون (هرمونات الذكورة) وغيرها.
5 – البروتينات الهيكلية: ودى بروتينات خيطية أو ليفية، وهي اللى بتدعم الخلية زى الكيراتين اللى بيقوى الأنسجة اللى بتغطى الجسم كلها سواء كانت الشعر أو الريش أو القرون أو الأظافر أو الحوافر أو المخالب _إحنا مش بنتكلم هنا على الإنسان فقط_، والكولاجينوده بيمثل لوحده من 25 لـ35 % من كمية البروتينات الموجودة فى الجسم كله، ويُعتبر المُكون الرئيسى للأنسجة الضامة فى الجسم؛ الأوتار، والأوعية الدموية، والعظام، والغضاريف، وسطح الشعر والجلد، والمشيمة.
6 – البروتينات التخزينية: ودى البروتينات اللى بتختزن جواها الأحماض الأمينية اللازمة للجسم.
7 – بروتينات النقل: ودى البروتينات اللى بترتبط بجزيئات معينة عشان تنقلها من مكان لمكان داخل الجسم، مثلًا الهيموجلوبين اللى بيرتبط بالأكسجين عشان ينقله لكل خلايا الجسم.(3)
ومن كل اللى فات نفهم إن البروتين كمُسمى مُعقد أكتر بكتير من كونه حتة اللحمة اللى بناكلها أو البروتين والكيراتين اللى البنات بتعمله عشان تفرد بيه شعرهم أو تعالجه، أو حتى المكملات الغذائية اللى بياخدها الرياضين عشان تساعدهم فى تكوين العضلات، كل الحاجات اللى فاتت فعلًا بروتين ودى كلها أشكال مختلفة للاستفادة من القيمة الأساسية ليهحيث إن البروتين هو الوحدة الأساسية فى بناء أجسامنا، لأن من الأخر جسمك كله على بعضه كده بروتين.
المصدر
