.
ليه وإزاي؟

اندفاع الأدرنالين؛ اجري يا مجدي!

كتب: أحمد حسين

مرة كنت بلعب أنا وقرايبي وإحنا صغيرين في نادي الجزيرة أو علشان أكون دقيق ”مركز شباب الجزيرة“. كنا بنتمشّى في التراك بتاع النادي ولاجل حظنا السعيد والتعيس في نفس الوقت، قدرنا ندخل عن طريق فتحة صغيرة في السور لنادي الجزيرة. طبعًا كان بالنسبة لنا عالم تاني. ملاعب جولف بقى وناس بتتمشى وكلاب، كلاب كتير جدًا بقى مش عارف ليه الحقيقة!

طبعًا إحنا اتسمّرنا شوية كده، لحد ما نكتشف إزاي ممكن نهرب من الموقف ده. حاولنا نلف ونرجع تاني ولا من شاف ولا من دري، بس لأ، ودي تيجي؟ لازم علشان القصة تكتمل والحبكة تبقى أقوى، إنه يجري ناحيتنا كلب صيد (Dalmatian) بسرعة كبيرة جدًا. فإحنا اتخضينا الصراحة وخُفنا، وبما إن روزفيلت قال إنك المفروض ماتخافش غير من الخوف نفسه، حاولت أقف في وش الكلب، لكن الأمر كان أقوى مني بصراحة، فلقيت رجلي بتقول لي الجري كل الجدعنة وجريت للناحية التانية على طول.

طبعًا في الوقت ده، إنت مابتكونش شايف حاجة تقريبًا غير الطريق اللي قدامك، ومابتكونش مركّز في أي حاجة غير إنك تخرج من المكان ده سليم. حسيت ساعتها إني كنت بجري بسرعة شديدة، لدرجة إن الكلب فعلًا مالحقنيش. إيه بقى سبب الجري السريع اللي جريته ده مع إني ماكنتش رياضي ولا حاجة؟

اندفاع الأدرنالين ”Adrenaline Rush” ، اجري وارمح يا مجدي!

NemesisInferno002_6_450656a

إندفاع الأدرينالين ده معناه تدفق هرمون الأدرنالين في الجسم بشكل كبير جدًا، وده بيساعد العضلات إنها تتمدد وتبقى جاهزة للجري أو للإشتباك مع أي شيء. ده بيحصل نتيجة الوقوع في مواقف متوترة أو صعبة بتصيبك بالقلق أو الخوف أو الغضب الشديد، لدرجة إن المخ بيبدأ يفرز الأدرنالين في جسمك علشان كل عضلاتك تبقى مستعدة للي هتعمله أيًا كان هو إيه.

طبعًا الكلام ده مفيد جدًا لينا، علشان نقدر نتخطى الموقف ده. لكن المشكلة هي إن في بعض الناس بيتم إفراز الأدرنالين عندهم بصورة كبيرة جدًا، الأمر اللي ممكن يسبب لهم دوخة أو زيادة شديدة في نبضات القلب أو ممكن توصل في بعض اللحظات لحد ”نوبات الهلع – Panic Attacks“. لذلك، نصح الأطباء الناس دول بكام خطوة يعمولها عشان تساعدهم إنهم يتحكموا في اندفاع الأدرنالين في جسمهم:

  1. أول حاجة تعملها، إنك تتنفس بعمق (شهيق – زفير – شهيق وراه زفير)، لأن التنفس بعمق ده هيساعدك توزّع الأكسجين على جسمك كله، وده ممكن يقلل من سرعة نبضات القلب ويرخي العضلات شوية بحيث تكون أكثر هدوءًا.
  2. حاول تعد من 1 لحد 10، أو عشرين لو لقيت نفسك لسه متعصب. الموضوع ده هيفيدك في إنك تشتت نفسك وتركز على حاجة تانية علشان مستوى الأدرنالين اللي تم إفرازه ده ينخفض شوية فتقدر تقرر هتعمل إيه بالظبط. طبعًا لو حسيت إنك لسه متعصب أو خايف حاول عِد من الأول تاني لحد ما تحس إنك أصبحت هادئ.
  3. لما تحس إنك متضايق أو متوتر، استلقي على الأرض وحاول تقبض وترخي عضلات جسمك بهدوء. ابدأ برجليك مرورًا بباقي العضلات وحاول تقبض وترخي العضلة على الأقل لمدة 5 ثواني، وبعد كده سيب عضلاتك ترتاح.
  4. حاول تواظب على الرياضة، الرياضة من أكتر الحاجات اللي بتسحب طاقة ومجهود، وفي نفس الوقت بتكافئك بحالة صحية ممتازة سواء (النفسية والعضلية)، ده غير إنه الرياضة مهمة عمومًا يعني وإحنا لازم نجربّها بقى، مش هينفع نتجاهلها أكتر من كده.
  5. فكر في سيناريوهات سعيدة (أفكار إيجابية)، يعني مثلًا ارسم سيناريو في دماغك يكون شبه إسكتش كده عن حلّك للمشكلة، أو إسكتنش لخروجك من الموقف. الطريقة دي هتخليك تفكر في سيناريوهات للحل أكبر، وجايز فعلًا تلاقي فيها الحل اللي كان تايه عن دماغك.
  6. اسخر من الأمر اللي إنت واقع فيه _أيًا كان إيه هو_، فالمواقف الصعبة غالبًا بيكون فيها لحظات مضحكة علشان ماتأثرش علينا لدرجة كبيرة، حاول بقى تدور على اللحظات دي، ولما تلاقيها اضحك عليها واسخر، لأن ده اللي هيخليك فعلًا تعديها.
  7. آخر حاجة ممكن أقولها لك، هو إنك لو فضلت على نفس الحال، بعد ما عملت كل ده، فالأفضل ليك إنك تستشير طبيب متخصص، علشان يعرف يشخّص أعراض المرض كويس، ويقدر يعالجه.

المصادر

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى