آكل لسان السمك .. كارثة بيئية تهدد الحياة في بحيرة قارون

كتبت: مها طـه

يوم 21 ديسمبر اللي فات، تقدم النائب «رائف تمراز»، عضو لجنة الزراعة بالبرلمان، بطلب إحاطة لكل من وزير الزراعة والبيئة والري والموارد المائية خاص بمشاكل بحيرة قارون وظهور حشرة غريبة بتقضي على الثروة السمكية بالبحيرة.

قبلها بشهر كان النائب «يوسف الشاذلي» تقدم بطلب إحاطة تاني لوزير البيئة بشأن بحيرة قارون نفسها، وأكد فيه على تشريد حوالي 6 آلاف صياد بسبب تلوث البحيرة بمياه الصرف، مما أدى لتراجع الإنتاج السمكي في البحيرة وتدهور الثروة السمكية فيها.

الحقيقة إن الخبرين في حد ذاتهم كدة مرعبين جدًا، والأكثر رعبًا كان البحث وراهم وكشف مشكلة بتتفاقم بقى لها سنين وبتهدد الأمن القومي متمثل في الثروة السمكية لبحيرة قارون، اللي بالمناسبة في خلال الـ3 سنين اللي فاتوا تراجع الإنتاج فيها من حوالي 5 آلاف طن سنويًا، لحوالي ألف طن بس، يعني أقل من الربع!

آكل لسان السمك .. طفيل يُهدد الثروة السمكية

بالبحث في الخبر الأول ومن خلال الصور، لقيت إن الحشرة اللي الخبر بيتكلم عن ظهورها، هي في الحقيقة مش حشرة ولكنها نوع من الطفيليات مش الحشرات. الطفيليات هي أحد أبطال أفلام الرعب في الطبيعة، كائن بيدخل جسم كائن تاني وكل همه إنه يتكاثر ويتنج عدد تاني من الطفيليات، اللي تصيب كائنات أخرى، وبكدة تكمل دورة حياته ويرتاح، وبالطبع ده بيكون على حساب العائل اللي بيتطفل عليه.

الطفيل اللي بنتكلم عنه هنا اسمه بالعربي «آكل لسان السمك» أو القملة آكلة اللسان (Tongue-Eater Louse)، والاسم العلمي ليها هو Cymothoa exigua.

بعيدًا عن كل الأسامي دي، أحب أقول لحضرتك إنك قدام طُفيل مرعب بالمعنى الحرفي للكلمة، نوع من الطفيليات اللي بتتغذى على لسان الأسماك. مش بس كده الطفيل ده بيقعد مكان اللسان وبيتعامل بعد كده وكأنه هو لسان السمكة المسكينة دي.

النوع ده من الطفيليات بيعيش في المحيطات وأحيانًا في البحار، وبيُعتبر كنوع من القشريات المتطفلة، اللي بتتخذ من الأسماك عائل أساسي ليها، ومعنى كلمة (أساسي) هنا إنها بتتكاثر داخل السمكة جنسيًا.

دورة حياة آكل لسان السمك .. للرعب وجوه كثيرة

لو حضرتك فاكر إن الرعب في الطفيل ده يتوقف عند اللي قلناه، يبقى من الأفضل تتوقع ما هو أسوء، الطفيل ده خنثى، لكن مش المعنى الحرفي للخنثى اللي نعرفه. الطفيل ده بيتولد في شكل ذكور لكن عند مرحلة معينة في حياته، عنده الاستعداد يتحول لأنثى!

بتبدأ رحلة الطفيل ده بإنه بيدخل للسمكة في شكل مجموعة من 2 أو أكتر عن طريق الخياشيم، وهناك بيستقر فترة لحد ما عملية البلوغ تتم بشكل كامل، ويفضل يتغذى على النسيج الدموي الموجود في الخياشيم. بمجرد ما يكتمل نموه، بيتحول واحد من المجموعة لأنثى، ويبدأ رحلة الهجرة ببطئ من الخياشيم صعودًا لفم السمكة.

أول ما الأنثى تلاقي نفسها داخل فم السمكة وتحديدًا على لسانها، هنا بقى بتبدأ تشعر بالاستقرار وتستخدم الساقين الخلفيتين عشان تتمسك باللسان، وعشان تأمن وضع الإقامة الدائم ده، بتلدغ اللسان لدغة قوية لدرجة إنها بتعمل فيه زي شق كدة، وتبدأ من خلال الشق ده تمص كل الدم الموجود في اللسان، بالمناسبة هي من الطفيليات اللي عندها شراهة ناحية الدم، وده بيخليها تستنزف اللسان حرفيًا، وبناءًا عليه غالبًا اللسان بيتحلل أو بيدبل ويقع من فم السمكة.

عملية أكل لسان السمكة مش بتتسبب في موتها مع ذلك وبتظل حية عادي رغم صعوبة الأمر عليها، وبعد فترة لما اللسان بيتلاشى بتبدأ تتعامل مع آكل لسان السمك وكأنه طرف صناعي (لسان صناعي)!

الطفيل ده بيحتل جزء كبير من تجويف فم السمكة – بالطبع أكبر من اللسان- وده بيصعب جدًا من الأكل، لكن مع ذلك السمكة مش بتموت وبتفضل تحصل على قدر ما من التغذية، لكن طبعًا أقل. الطفيل بقى بيكون قاعد ومستقر جوا فم السمكة، وبيتغذى بشكل أساسي على مخاط السمكة أو بواقي الدم الموجود في أجزاء الفم، لو فاكر بقى إن الرعب ينتهى لحد كده، أحب أقولك إنه لأ، الطفيل خلاص استقر ووفر الأكل، يبقى لازم يتزاوج بقى!

أيوة للأسف زي ما جه في دماغ حضرتك، الطفيل الذكر اللي كان موجود في الخياشيم بيهاجر لمكان الطفيل الأنثى اللي احتل اللسان، وبيتزاوج معاه وكل ده جوا فم السمكة، بعد كدة الطفيل بينتج عدد من الصغار كلهم ذكور زي ما قولنا، وبمجرد ما السمكة تقرب من مجموعة تانية من الأسماك، تبدأ تطلقهم عشان يبدأو يدخلوا خياشيم أسماك تانية ويكملوا دورة حياتهم المرعبة وهكذا. غالبًا بعد كده الطفيل خلاص أدى مهمته وبيموت وبتموت معاه السمكة اللي مبقاش ليها لسان خلاص لا الطبيعي ولا الصناعي.

 بالمناسبة من كتر ما آكل لسان السمك في حد ذاته مرعب، أحد مخرجين هوليوود استغله وبنى عليه فكرة فيلم (the bay)، واللي فيه بيتحول الطفيل بشكل يخليه يهاجم البشر ويحتل مكان لسانهم!

التلوث يضرب بحيرة قارون

جريدة الوطن بتاريخ 17 أغسطس 2015، نشرت تقرير كان بيتكلم بالتفصيل عن أزمة تلوث بحيرة قارون، وتشريد كتير من الصيادين العاملين فيها. الأسباب الرئيسية للتلوث كانت مياه الصرف الصحي اللي بتترمي في البحيرة وتفاعلها مع المياه فيها، وده بالطبع بيكون له تأثير قوي على الثروة السمكية الموجودة في البحيرة.

التقرير بيرصد مجموعة من المشاكل المحيطة بالبحيرة، والمستمرة بقالها سنين طويلة، لكن الخبر الجديد أضاف ليها بُعد جديد تمامًا، متمثل في ظهور الطفيل المرعب ده. بعد ما عرفنا عن آكل لسان السمك ودورة حياته، كان في شوية أسئلة لازم نطرحها، أولًا إزاي الطفيل اللي بيعيش في مياه مالحة (محيطات) عايش عادي في المياه العذبة (البحيرة)؟ ثانيًا إزاي وصل أصلًا من المحيط للبحيرة المغلقة؟ وإيه هو تأثير الطفيل ده لو شخص أكل سمكة مصابة بيه؟

• إزاي بيعيش في المياه العذبة؟

بحيرة قارون من الأساس وبالرغم من أصلها النهري، إلا إنها مالحة بسبب زيادة البخر فيها، ولأنها بحيرة مغلقة، كانت مياه الصرف الصحي الزراعي هي السبب في عدم ارتفاع نسبة الملوحة زيادة عن اللزوم، أما حاليًا فالصرف الصحي للمصانع والمنشآت السياحية هي اللي بتصب في البحيرة، وده أدى لارتفاع نسبة الملوحة بشكل خلق بيئة جيدة لنمو أنواع غريبة من الطحالب والأسماك، وكمان الطفيليات ومنها الطفيل ده.

• إزاي وصل من المحيط للبحيرة؟

البحيرة مغلقة زي ما قولنا وبالتالي ده يصعب جدًا من وصول الطفيل ليها، والحقيقة إن سبب انتقال الطفيل لحد دلوقتي يُعتبر مجهول لكنه بيتراوح بين احتمالين.

الأول: إنه يكون موجود في البحر المتوسط، وفي أثناء نقل زريعة الأسماك من البحر للبحيرة اتنقل معاها الطفيل.
التاني: إن الطيور المهاجرة اللي بتنزل في منخفض الفيوم هي اللي تكون نقلته في طريق هجرتها مرورًا بالبحيرة.

إيه ممكن يحصل للإنسان لو أكل سمكة مصابة بالطفيل؟

لحد دلوقتي، في أبحاث مستمرة عن الطفيل ده، لكن مفيش أي واحد منها أثبت إن الطفيل ممكن يكون مُضر بالنسبة للبشر، إلا إنه في حالة صيد السمكة، لو الطفيل كان حي ممكن يعض الصياد عضة قوية. ومع ذلك وجب الحذر عند شراء أي نوع من الأسماك دلوقتي. وهنا يأتي السؤال الأهم بقى، في وسط كل الكوارث دي، يا ترى إيه هي الحلول؟

وزير البيئة «خالد فهمي» أعلن في تصريحاته بخصوص الطفيل ده، إن هيئة الثروة السمكية حاليًا بتدرس الحشرة – على حد قوله-  وأسباب تواجدها وسُبل مواجهتها، لكنه أضاف إنه من الممكن القضاء عليها من خلال إكثار كائنات بحرية معينة تتغذى على الأسماك المصابة بالطفيل وتنتهي المشكلة!

بس للأسف ببحثنا وراء أساليب القضاء على النوع ده من الطفيليات، لقينا إن الطفيل ده ممكن يصيب أي نوع سمك عادي، وكمان مفيش أي أساليب للتخلص منه زي ما الوزير قال، ده طفيل بيحتل السمكة ويفضل جواها لحد ما يتكاثر وينتج أجيال جديدة وبعدين بيموت بشكل طبيعي، بالإضافة لوجود مشكلة تانية، إن التواجد الأصلي للطفيل ده بيكون في المحيطات المفتوحة، لكن هنا الوضع مختلف لأنه بينتشر في بحيرة مقفولة وبتتمتع ببيئة ملوثة بدرجة كبيرة، وده بيمثل قمة السعادة للطفيليات بالمناسبة!

فالحقيقة المشكلة بالفعل كبيرة ومتشعبة، وبتهدد بحيرة من أقدم البحيرات المصرية والموجودة من عصر الفراعنة، ده غير إنها بتهدد الثروة السمكية في مصر بشكل كبير وخطير، يكفي نقول إن إنتاج الثروة السمكية من البحيرة حاليا انخفض لأقل من ربع الإنتاج من 3 سنين، مما بيستدعي إدارة حقيقة للأزمة، وتكاتف لجهود الباحثين ونواب مجلس الشعب والحكومة كمان، للوصول لحل أتمنى يكون سريع.

المصادر: nationalgeographic  futurism  wired  masralarabia  youm7  youtube