عن ”أكل الحشرات“: مزفلطة بس تملى التانك!
كتبت: مها طـه
من أكتر الأفلام اللي أثرت فيّا في طفولتي، كان فيلم ”lion king“، والحقيقة إنه مازال بالنسبة لي من أحلى أفلام ديزني أصلًا. فاكرين لما سيمبا هرب وقابل ”تيمون وبومبا“، وكانت أكبر مشاكله ساعتها إنه جعان ومش عارف ياكل إيه لأن زي ما أنتوا عارفين ”سيمبا“ شبل يعني آكل لحوم. فقام ”تيمون“ بحكمته وعبقريته جايب له مجموعة لطيفة مختلفة من خيرة حشرات الغابة عشان ياكلها لأن الجيشش قال له اتصرف تقريبًا، و”بومبا“ كنوع من التسويق للمنتج والتشجيع قال لـ”سيمبا“ جملته الشهيرة: ”مزفلطة.. بس تملى التانك!“.
ده في الكارتون، لما شوفنا نفس الحوار ده في فيلم ”سور الصين العظيم“، و”موهي“ أو محمد هنيدي المفروض ياكل صراصير وجراد كنوع من أنواع الأكل الموجود في الصين، وهو رافض تمامًا ووشه جايب ألوان وبيقول لهم ”آكُل إيه؟ ده عندنا بيضربوه بالشبشب“.
الحقيقة في شعوب مازالت بتاكل الحشرات لكن بالنسبة لعدد سكان الأرض الإجمالي فهما قليلين، بس يا ترى ليه معظم البشر مش بياكلوا الحشرات؟ بالرغم من إن عددهم كتير وفعليًا بيحتلوا العالم كله _ممكن تعرف ليه عددهم كتير من هنا_.
الحقيقة إن الفكرة مش إن البشر مش بياكلوا حشرات، لأ دول كانوا بياكلوها زمان لكن بطّلوا ياكلوها دلوقتي. على مر قرون فاتت، كان البشر بيستهلكوا تقريبًا كل أنواع الحشرات، من الخنافس لليرقات للصراصير للديدان وحتى الجراد ماخلوش حاجة بصراحة، والعادة دي بدأت لما البشر لقوا إن الحيوانات الموجودة في البيئة بتصطاد الحشرات وبتتغذى عليها، فتقريبًا قالوا لنفسهم وليه لأ، دي حتى غنية بالبروتين.
بمرور الزمن، أصبح أكل الحشرات من ضمن العادات اليومية للبشر لأنها مصدر متوفر طول الوقت، وكمان طعمها لذيذ _أه والله تخيل تيمون كان عنده حق_، فمثلًا الإغريق كانوا بياكلوا الحشرات كنوع من التسالي اللي بتدل على الرفاهية، زي الكاجو عندنا كدة دلوقتي، وحتى الرومان كانوا بيصنّفوا يرقات الخنافس كأكلة لذيذة وشهية، فالسؤال بقى: يا ترى ليه فقدنا الشهية العظيمة دي ناحية أكل الحشرات؟!
الحقيقة إن سبب الرفض العام لأكل الحشرات من معظم البشر هو منطقة الشرق الأوسط! تحديدًا المنطقة الخصبة منها، واللي بدأ فيها البشر بممارسة الزراعة من حوالي 10 آلاف سنة قبل الميلاد، البشر اللي سكنوا المناطق دي، بدأو يمارسوا زراعة المحاصيل وتربية الحيوانات والدواجن بدلًا من الاعتماد على الصيد كمصدر للأكل، وده اللي غيّر من عادات البشر وطريقة أكلهم.
العادات الغذائية دي انتشرت مع الهجرة والسفر والغزوات لدول أوروبا، والعالم الغربي كله، وبسبب انتشار الزراعة والاعتماد عليها، بدأ البشر يتعاملوا مع الحشرات كآفات بتصيب الزرع وتهدد المحصول، ونسيوا تمامًا إنهم في وقت ما كانوا بيعتبروا الحشرات دي نفسها مصدر للغذاء.
حاليًا لو قلت لأي حد تعرفه، الحشرات بتمثلك إيه، هيجاوب بأي حاجة غالبًا غير إنها ينفع تتاكل، تقرفك ممكن، تلسعك مفيش مانع، تبوظ أكلك وتملاه جراثيم وماله، وفعليًا سيرتهم بس ممكن تملاك بالقرف _تلاقيك حتى وإنت بتقرأ المقال ده بتقول يع_. بس خلينا نقول إنه مازال ولحد النهاردة، في شعوب بتعتمد على الحشرات كمصدر للغذاء، ويكفي إننا نقول إنه حاليًا في حوالي 2000 نوع من الحشرات، بيعتبروا جزء كبير من نظام الأكل اليومي عند بعض البشر واللي بيوصل عددهم لحوالي 2 مليار شخص.
مين الناس اللي لسه بتاكل الحشرات دي؟
سكان المناطق المدارية _اللي بتقع ما بين مدار الجدي ومدار السرطان_، هما الأحرص على تناول الحشرات، المناطق دي بتضم معظم سكان أفريقيا ومناطق جنوب شرق آسيا وبعض مناطق أمريكا الجنوبية لأن العادات والتقاليد هناك بتعتبر إن أكل الحشرات شئ عادي جدًا.
الحشرات نفسها في المناطق دي بيبقى حجمها أكبر وفيها تنوع أكتر، وبتتواجد في أسراب أو مجموعات كبيرة، وده بيخلي صيدهم سهل، فمثلًا في منطقة زي ”كمبوديا“ في جنوب شرق آسيا، هناك بيصطادوا العناكب الكبيرة، ويقلوها ويبيعوها في السوبرماركت عادي، وفي جنوب أفريقيا، دودة ”الموبان“ بتعتبر من ضمن الوجبات الثابتة الموجودة بشكل يومي تقريبًا، وبتتعمل مع صوص مشطشط كمان، أو يجففوها ويملحوها، أما في المكسيك، فبياكلوا نوع من الحشرات _شبه الصراصير_، بيشوحوه مع التوم والليمون والملح.
الحشرات هي الحل!
زي ما شوفنا شعوب العالم اللي بتاكل حشرات وإزاي بتتفنن في طبخها وتقديمها، فالعلماء كمان شايفين إن أكل الحشرات بيُعتبر صحي ومفيد لأنها بتحتوي تقريبًا على 80% بروتين، وكمان مليانة بالدهون اللازمة عشان تزود الجسم بالطاقة بالإضافة للألياف والمغذيات اللي بيحتاجها الجسم زي الفيتامينات والمعادن، يعني مثلًا أي حشرة من اللي بيتاكلوا دول بتحتوي على نفس القدر من الحديد الموجود في اللحمة ويمكن أكتر كمان، ولك أن تتخيل إن نقص الحديد بيعتبر من أكبر المشاكل الصحية اللي بتواجه البشر حوالين العالم كله.
خنافس بالكريمة ..مقرمشة ولذيذة!
على فكرة الحشرات طعمها مش وحش، بالعكس في منها اللي طعمه لذيذ، مثلًا يرقة الخنافس ”mealworms“، طعمها زي طعم الفول السوداني كده، والجراد مثلًا طعمه زي الجمبري، أما الصراصير فبعض الناس بيقولوا إن ريحتها في الأكل زي الفشار بالظبط.
مزارع الحشرات هي المستقبل
العلماء شايفين إن تربية الحشرات هتفيد البيئة، تخيل كده إنك تلاقي شخص عنده مزرعة حشرات للأكل زي مزارع المواشي والدواجن كده، ولأن الحشرات بتاخد حيز أصغر ومش محتاجة علف ولا مية كتير، كمان بتطلع منها نسب قليلة من غازات الاحتباس الحراري، بالإضافة إلى إنها متوفرة وبتتكاثر بسرعة وده ممكن يكون حل كويس لمشكلة نقص الغذاء اللي بتواجه العالم وخصوصًا الدول النامية.
زمان البشر كانوا بياكلوا الحشرات وبيعتبروا جراد البحر _حاجة شبه الكابوريا كده_ حشرة لا يمكن أكلها، حاليًا اللي حصل بقى العكس، الناس بتاكل الكابوريا وجراد البحر عادي، وبطلوا ياكلوا الحشرات وبقوا يقرفوا منها، فهل ممكن في يوم من الأيام يتشقلب الوضع تاني، ويبقوا البشر بيتغذوا على الحشرات وبيعتمدوا عليها؟
عن نفسي أتمنى إن إجابة السؤال ده تبقى لأ لأنه الحقيقة مجرد تخيل ده بالنسبة لي على الأقل مقرف جدًا، بس كمان لازم قبل ما نتريق على شعوب الارض اللي بتطبخ الحشرات وتخللها وتاكلها، نفتكر إن إحنا كمصريين عادي جدًا بناكل الفسيخ، وبنحب أوي إكسسوارات الجاموسة وبنتفنن في أكلها، وبنسميها كمان أسامي دلع، زي الممبار والفشة والعكاوي والكرشة والجوهرة، واللي هي في عبارة عن الأمعاء والرئة والذيل وغشاء البطن والعين، تخيل حتى العين والديل واللسان أكلناهم!
المصادر
