![](https://neonsciences.com/wp-content/uploads/2016/08/unnamed-file-17.jpg)
ما لم يقله مخرجي السينما عن السيكوباتي!
كتب: أحمد حسين
في واحد من مشاهد فيلم الكيف، يحيى الفخراني بيوصف شخصية جميل راتب أو ”البهظ بيه“ بإنه سايكوباتي. فأنا ساعتها تخيلت إن السيكوباتي ده هو الشخص اللي فيه لمحة من الجنون والشر في نفس الوقت، وبقيت من وقت للتاني لما أتفرج على فيلم فيه قاتل محترف ولا شخص مسّه الجنون زي بطل فيلم (The Shining)، أو شخص مختل ومضطرب عقليًا زي الجوكر، كنت بربطه تلقائيًا بالسيكوباتية.
في الثقافة الشعبية السيكوباتي له شكل محدد، أو على الأقل صفات مُحددة، بس بعض من الصفات دي ”علميًا“ مش صحيح. الحقيقة، السيكوباتي مش بالضرورة بيكون قاتل محترف أو زعيم عصابة ولا شخص مسّه الجنون أو مختل. ده ممكن يكون سياسي ناجح، أو رياضي فاز ببطولات كتير، ده حتى ممكن يكون واحد من أصدقائك أو معارفك، ده غير إن في احتمال تكون إنت نفسك سيكوباتي!
مين هو السيكوباتي؟
على الرغم من إن أدوار الشخص السيكوباتي غالبًا بتتعمل وبتتكتب بشكل جيد جدًا، لدرجة إنك ممكن تتعاطف معاه حتى لو هو قاتل، ماحدش عارف مين هو السيكوباتي بالظبط، أو إيه هي صفاته بالتحديد حتى إن كلمة ”سيكوباتي“ نفسها مش موجودة في الدليل التشخيصي الإحصائي للإضطرابات العقلية (DSM-5)، وده يُعد بمثابة الكتاب المقدّس للأمراض النفسية.
الدليل ذكر ”اضطراب الشخصية المعادية للمجتمع (اللاجتماعية) – Antisocial Personality Disorder“، وهو اللي بشكل ما قريب من فكرة السيكوباتي بشخصيته المندفعة والمتجاهلة للآخرين وغير المتعاطفة معاهم، زائد إنه في الغالب بيميل كمان للتلاعب بيهم.
بس الأطباء في العموم مش بيعتبروا الشخص اللي عنده صفات كارهة للاجتماعات بالضرورة سيكوباتي، لأن سيكوباتي في الأساس مش تشخيص. وهنا هنعرف بعض الصفات اللي مش بالضرورة تكون في الشخصية السيكوباتية.
-مش لازم يكون مجرم أو عنيف
أغلب المخرجين أو المؤلفين لما بييجوا يستعملوا شخصية السيكوباتي ضمن سياق أفلامهم، بيستعملوها على إنها شخصية لمجرم عنيف زي فيلم (American Psycho) كده. لكن في الحقيقة، إن السيكوباتي مش لازم يكون مجرم، ده ساعات مابيكونش مُدرك إنه سيكوباتي أساسًا.
أغرب حالة لسايكوباتي اكتشف ده بالصدفة كانت لعالم الأعصاب ”جيمس فالون“. د. فالون عمل إشاعات ومسح ضوئي لمخه، وبعد ظهور النتائج، اكتشف إنه سيكوباتي، وإن الأجزاء اللي مسئولة عن التعاطف والتحكّم في النفس نشاطها قليل، مما يعني إنه في الغالب سيكوباتي، بس هو عمره ما كان مؤذي لحد، ولا مجرم ولا دموي ولا عنيف ولا أي حاجة من دي.
-السيكوباتي مش مجنون في الغالب
الحقيقة إن السيكوباتي ممكن يكون عاقل جدًا، لكن في الغالب بتظهر شخصيته في الأفلام إنها بتسمع أصوات داخل العقل وبيشوف ضلالات وأوهام، وده مش حقيقي، ده أساسًا معناه إن الشخص بيهلوس وأقرب للشيزوفرينيا مش إنه سيكوباتي.
السيكوباتي في الأساس بيكون مصاب باضطراب في الشخصية، مش اضطراب في العقلية، والهلوسة بتكون في الغالب من ضمن أعراض الشيزوفرينيا، اللي هي مرض عقلي. لذلك مثلًا الشخصية الأساسية في فيلم (Psycho)، إخراج ألفريد هيتشكوك، ماكنتش لشخص سيكوباتي، بل لشخص مضطرب عقليًا.
اعرف أكتر عن اضطراب الشخصية الهيستيرية ومتلازمة “أيوه أنا عندي نفس المشكلة”
-مش لازم السيكوباتي يكون سادي
مش هنقدر نقول إن السادي مايكونش سيكوباتي، لكن مش بالضرورة السيكوباتي يكون شخص سادي. السادية المتطرفة مرض وله اسم ”اضطراب الشخصية السادية – Sadistic Personality disorder“، وممكن التفريق بينه وبين الشخص السيكوباتي اللي عنده ميول للتلاعب بالبشر والتحكم فيهم وعدم التعاطف معاهم. فالقصد إن السيكوباتي مش لازم يكون شخص نرجسي أو انتهازي أو سادي أو غيره من الاضطرابات الشخصية دي.
-غير قابل للشفاء، لكنه قابل للعلاج
المعنى هنا مختلف بين الكلمتين، اضطراب الشخصية السيكوباتية في النهاية مش مرض بيتم تشخصيه، وساعتها معنى كده إنه ممكن يكون غير قابل للشفاء، لأ هو قابل للعلاج والتعامل معاها وتخطيه كمان، وكل ده بيتم عن طريق المتابعة مع الطبيب النفسي، زائد كمان التركيز مع الأطفال منذ الصغر.
في مقال اتنشر في نيويورك تايمز سنة 2012، بيقول إن متابعة الأطفال وسلوكهم وتحليل شخصيتهم أمر هام جدًا، لأن أي بوادر تظهر عليه بإنه يميل للتلاعب بالأخرين أو إنه مابيتعاطفش معاهم مثلًا، بتطرح احتمالية إنه ممكن لما يكبر يطوّر شخصية سيكوباتية، لذلك معالجة الأمر في وقتها، أفضل بكتير من الانتظار.
طيب، تفتكر إنت سيكوباتي؟ والله ممكن. خبراء الطب النفسي بيقولوا إن 1% من البشر بشكل عام بيُظهروا تصرفات سيكوباتية. باختصار، السيكوباتي مش لازم يكون شخص خطر، ولا لازم يكون شخص مجنون، ده مش لازم حتى يكون مدرك إنه سيكوباتي من الأساس.
المصادر: businessinsider APA sagepub