عن الميكروبات وأنواعها: مافرقتش .. أهو كله بيجيب العلل!
كتبت: يارا كمال
أنا جالي ميكروب. الدكتور قال لي إن عندي فيروس. حد جاله التهاب سعال ديكي بسبب بكتريا. إيه الفرق بين كل الحاجات دي؟ اللي نعرفه إن كل الحاجات دي الميكروب والفيروس والبكتريا بتجيب أمراض، لكن هل هي نفس الكائن بس ليه أسماء مختلفة؟ في الحقيقة، لأ كل لفظ من دول ليه معنى مختلف.
بس مبدأيًا عشان نبقى متفقين كل الحاجات دي بيتقال عليها ميكروب، لإن كلمة ميكروب بتتقال على أي كائن لا يرى العين المجردة سواء كان مضر أو غير مضر. لما يبقى بيسبب أمراض يبقى اسمه ”جرثومة“، ولو إن فيه علماء بيتعاملوا مع مصطلح ”جراثيم“ على إنها كائنات ميكروبية مش كلها بتسبب الأمراض، بس الأكيد إن مش كل الميكروبات بتسبب المرض. يعني فيه حيوانات ونباتات نقدر نقول عليها ميكروبات؟ بالنسبة للحيوانات، آه فيه حيوانات لا تُرى بالعين المجرّدة، فتُعتبر ميكروبات زي الحيوانات الدوارة والديدان الخيطية، أما النباتات هنلاقي الفايتو بلاكنتون(Phytoplankton) وهي كائنات دقيقة تعتبر نباتية لقيامها بعملية البناء الضوئي.. بس الميكروبات ممكن تبقى بكتريا، أو كائنات أولية وبعض الفطريات بتبقى ميكروبات، حتى الفيروسات تُعتبر ميكروبات.
الجراثيم ممكن تبقى (بشكل أساسي) بكتريا، فيروسات، فطريات أو كائنات أولية. و ممكن الجراثيم تتنقل عن طريق اللمس (لإن الجراثيم دي بتكون جوة سوائل الجسم زي المخاط، وبالتالي الناس لما بتتكلّم أو تكح بينشروا الجراثيم، وكذلك لما بيلمسوا عينهم أو بؤهم ممكن ينشروا الجراثيم عن طريق اللمس)، أو الأكل والشرب، أو النفس، أو إن حيوان يعضك لا قدّر الله. تعالوا بقى نتكلم على كل حاجة لوحدها.
الفيروس: أنا عامل نفسي كائن حي
الفيروس ده حكاية لوحدها. يبان الفيروس إنه كائن حي لإنه بيتكاثر بصورة مذهلة، لكن في الحقيقة هو مش كائن حي .. أوي. على الأقل مش بالمعنى الدقيق للكلمة. لإنه ببساطة لازم يعيش في خلية تستضيفه عشان يقدر يتكاثر ويؤدي وظايفه الحيوية. ليه بقى؟
الفيروسات مبتقدرش تنتج أو تخزن الطاقة على شكل أدنوسين ثلاثي الفوسفات اللي ممكن نقول عليه ”عملة الطاقة“، وده عبارة عن جزيئ بيقدر يخزّن قدر كبير من الطاقة واللي من خلاله بنقدر نعمل كل الأنشطة اللي بنعملها. عشان كدة، الفيروس بياخد طاقته من الخلية اللي مستضيفاه، يعني بيفضّل عالة عليها أو بيتطفل عليها. من هنا نقدر نطبّق عليه مَثَل إنه اتمسكن لحد ما اتمكن. ممكن الفيروس يبقى على شكل قضبان أو كرات. قبل ما الفيروس يخش جسم الكائن الحي، بيبقى في مرحلة إنه معدي وبيبقى اسمه ”فيريون“.
الفيروس عنده حمض نووي إما الـ RNA أو DNA (نوعين من الحمض النووي، والفيروس بيحمل واحد منهم بس)، الحمض النووي هو اللي بيحمل الخريطة الجينية بتاعة الفيروس كإنه مهندس البرمجة بتاعه، المفروض بقى إنه الحمض النووي ده يتّرجم لبروتين عشان الفيروس يبتدي ينفّذ العمليات الحيوية، واللي بيؤدي الوظيفة دي هي الريبوسومات الموجودة في الخلايا.
في الوقت اللي الفيروسات عندها حمض نووي بتغطيه طبقة من البروتين، فيه كائنات تانية أشباه الفيروسات أو ”viriods“، ودي بيبقى عندها حمض نووي بس بيبقى مع نفسه كده، بدون طبقة بروتين تغطيه. في جسيمات شبيهة للفيروسات برضه اسمها بريونات ودي بتتكوّن من بروتين مدمج مع جزيئ من الحمض النووي.
الفيروس ده جبروت لإنه ممكن يصيب النباتات والحيوانات، بما فيها الإنسان طبعًا، لأ وكمان البكتريا. بالنسبة لنا إحنا، بيصيبنا بأمراض زي الانفلونزا والإيدز.
الطفيليات: الكائنات اللي عايشة على قفا غيرها
مش بس الفيروس اللي عايش عالة، لأ ده في غيره كائنات حية عايشة كده. فاكرين أيام الفلاية والجاز بتوع زمان؟ أهي ده كانت طرق لمحاربة الكائنات الطفيلية زي “القمل” اللي بتعيش في فروة راس الإنسان. الطفيليات دي بتبقى حيوانات أو نباتات بتعيش بداخل أو على جسم الحيوان أو نبات تاني. لما الطفيليات دي بتخش جسم الإنسان، ممكن صحته تتأثر. بعض الطفيليات بتخش الجسم عن طريق الميه الملوثة أو الأكل الملوث، وبعضها بيعيش على الجلد أو في الشعر. من ضمن الأمراض اللي ممكن تُصيب الإنسان بسبب الطفيليات: الجرب، والإصابة بدودة الإنكلوستوما، ده غير قمل الشعر.
البكتريا: ولاد الحلال ما سابوش لولاد الحرام حاجة
كلمة بكتريا بتقرفك؟ على فكرة بقى البكتريا دي مظلومة. حوالي 1% بس من الأنواع المختلفة للبكتريا هو اللي بيسبب الأمراض زي السل والسالمونيلا والسعال الديكي (بالنسبة للإنسان)، وفيه بعض البكتريا بتساعدنا نهضم الأكل، وبتدمر الخلايا المسببة للأمراض، وبتزود الجسم بالفيتامينات اللي بيحتاجها. كمان فيه بكتريا بتستخدم في صناعة غذائية زي الجبنة والزبادي. البكتريا كائنات حية ليها خلية واحدة، وشكلها ممكن يبقى كرات أو قضبان أو شكل لولبي.
الفطريات: حيث تكمن المتناقضات
الفطريات مملكة مستقلة بذاتها في عالم الكائنات الحية. هي تشبه النباتات بس مع ذلك معندهاش كلوروفيل يخليها تعمل تمثيل ضوئي، وبالتالي هي بتعيش في أشكال مختلفة: يعني فيها الطفيلي اللي بيعيش عالة وده ممكن يكون مضر وممرض، وفيها اللي بتمتص الغذا من الكائنات الميتة، وفيه اللي بتعيش عيشة تكافلية يعني فيد واستفيد، يعني مثلاً هي تقدر تحلل مواد الكائنات الحية متقدرش تحللها، وتاخد جزء من المواد دي وتدي الباقي للكائن الحي مقابل إنها تفضل عايشة جواه.
الفطريات بيكون عندها حاجة اسمها الأفطورة أو المشيجة عشان تلم بيها الأكل، وفيها حاجة اسمها الأبواغ أو الجراثيم (بس دي حاجة تانية غير الجراثيم اللي اتكملنا عنها فوق) ودي اللي عن طريقها بيحصل التكاثر. مش كل الفطريات ميكروسكوبية، فيه منها اللي حجمه كبير.
الفطريات المتطفلة على الكائنات الحية بتسبب أمراض زي القوباء الحلقية (Ringworm) وهو عبارة عن بقع على شكل حلقات، قدم الرياضي (Athlete’s foot) وده مرض بيصيب جلد القدم، وداء المبيضات (Candidiasis) وهو مرض بيسبب بقع بيضا في البؤ والزور، وبقع وطفح جلدي في الفخد وبين الصوابع، وتحت الصدر، وحكة في المهبل. كمان النبات بيصاب بأمراض بسبب الفطريات زي الأرغوت.
من الآخر، كدة يا جماعة الميكروبات مش عاملة زي أشرار السينما اللي حصروها في أدوار الشر، لأ فيها كده وفيه كده، وتقدم الإنسان حصل لما قدر يعرف فايدة وضرر كل حاجة، ولسه الإنسان بيحاول يوصل للي مايعرفهوش من علم عشان يستفيد منه وأحيانًا عشان يضر نفسه ولوبطريق غير مباشر، أحيانًا بيتعلم من أخطاءه وأحيانًا مابيتعلمش، وهي دي قصة الإنسان كما عهدناه.
المصادر: commtechlab kidshealth sfcdcp micro.magnet hyperphysics health bbc botany
