![](https://neonsciences.com/wp-content/uploads/2016/02/unnamed-file-5.png)
عن الكائنات الخضراء المفترسة: ”ما ذنب النباتات؟“
كتبت- مها طه
حيوانات مفترسة، وقلنا ماشي، قدرنا واللهم لا اعتراض ومتبقاش تروح غابة ولا صحراء لوحدك، لكن كمان نباتات مفترسة، زي اللي بنشوفها فى الأفلام الأجنبي، فك مرعب وأسنان حادة، مع ليونة ما شاء الله تمكنها أحيانا من الحركة كمان، وتنقنق في البني آدمين ومش هتقول لأ للأطفال، أهو ده اللي مش ممكن أبدًا!
النباتات المفترسة .. المكافحة من أجل البقاء
النباتات المفترسة من الكائنات المثيرة للاهتمام والفضول بالنسبة لكتير من الناس، كونها بتتصنف من آكلات اللحوم، وبتتغذى على الحيوانات كمان. لكن على فكرة ده مش معناه إن النباتات مفترسة مش بتقوم بعملية البناء الضوئي زيها زي باقي النباتات العادية. هي الحقيقة جاية في كل حاجة
النباتات دي بتعيش فى أماكن معينة بتتميز بوجود كميات ضوء كبيرة، وتربة فقيرة بالعناصر المهمة خاصةً النيتروجين، واللي بيحتاجه النبات عشان ينمو، ويحصل على الطاقة، عشان كدة النباتات دي بتلجأ لوسيلة مختلفة شوية عشان توصل للعناصر والمواد الغذائية اللازمة ليها والناقصة في بيئتها عن طريق أكل الحيوانات اللي أجسامها بالطبع بتحتوي على كميات كافية من المواد دي.
النباتات دي مش كلها نوع واحد، بالعكس دي ليها أنواع كتير ومختلفة، بيوصل عددهم لحوالي 583 نوع مختلف من النباتات المفترسة، كلها بتتميز بالآتى: القدرة على القبض على الفريسة وقتلها (هنشرحها بالتفصيل في بعض الأنواع)، هضم الفريسة من خلال طريقة معينة، الحصول على المغذيات اللازمة من جسم الفريسة دي.
طب إيه هى الطرق اللى بتحاصر بيها النباتات المفترسة فرائسها؟
في أربع طرق رئيسية بتعملهم النباتات المفترسة عشان تصطاد فريستها:
1 – الصيد عن طريق الفخ “الجرّة”
بتتميز الطريقة دي بوجود ورق ملفوف حوالين نفسه وكأنه أباريق فى النبات، وبتجذب النباتات دي الفرائس ليها عن طريق إفراز رحيق من فم الزهرة، وبتغطي البطانة الداخلية للنباتات دي طبقة رقيقة من الشمع، تيجي الحشرة من دول عشان تمتص رحيق الزهرة تقوم تلزق في الشمع، وبالتالي تقع في الفخ ومتقدرش تخرج منه. جوا الأباريق دي في إنزيمات هاضمة، وبمجرد دخول الحشرة أو وقوعها، بتبدأ الإنزيمات في هضم جسم الحشرة تدريجيًا فى صورة يقدر النبات يمتصها ويستفيد بيها.
![النباتات المفترسة](http://neonsciences.com/wp-content/uploads/2016/02/1.png)
اعرف أكتر| الملون الغذائي E120: وفيها إيه لما ناخده من الحشرات؟!
2 – الصيد عن طريق الصمغ
بيتغذى النوع ده من النباتات على الذباب، وبتصطاده عن طريق مادة لزجة أو صمغ الموجودة على النبات نفسه، بحيث يلتصق فيه الذباب، وعشان كدة بنلاقي على ورقة النباتات دي مادة صمغية كدة بتفرزها غدد خاصة على الورقة، وتعتبر الطريقة دي بمثابة مصيدة فعالة جدًا فى اصطياد الحشرات الطائرة الصغيرة.
وبمجرد التصاق الحشرة بالورقة، تبدأ الورقة تلف نفسها على الحشرة بحيث أن تمنع عنها أى عوامل خارجية تقدر تساعدهاعلى الهرب من الفخ، وفي نفس الوقت بتقدر تخلق مكان مناسب لإفراز إنزيمات الهضم على جسم الحشرة.
![النباتات المفترسة](http://neonsciences.com/wp-content/uploads/2016/02/2.png)
3 – الفخ المفاجئ
في نوعين من النباتات المفترسة بتعتمد على الطريقة دي في الحصول على الفرائس، وبتعتبر الأنواع دي أكتر تطورًا من اللي بتستخدم طريقة الصمغ والكلام ده. طريقة الصيد النباتات دي مشابه لطريقة الصيد عند الحيوانات من حيث شكل الحركة وسرعتها. لكن برضة مش معنى إننا قولنا على دي سريعة إن الاتنين اللي فاتوا بيحصلوا ببطئ، لكن الطريقة دي أسرع.
الورقة في النباتات دي بتاخد شكل شبه القلب المقسوم نصين وخارج منهم ثلاثة شعيرات أو أكتر. الورقة دي حساسة جدًا للمس، بمجرد ما يلمس جسم الحشرة الشعيرات دي، بتبدأ الشعيرات في نقل إشارة لباقى الورقة بوجود جسم ما، فبينطبق فصين الورقة على بعضهم وكأنهم فم يبيتقفل على فريسة. العملية دي بتتم فى أقل من ثانية، والجدير بالذكر أن ورقة النباتات دي مش بتستجيب مثلًا لقطرات المطر، لأن أوراقها بتتمتع بخاصية تشبه ذاكرة بسيطة تخليها تستجيب للحركات الأكبر من كده.
![النباتات المفترسة](http://neonsciences.com/wp-content/uploads/2016/02/3.png)
4 – فخ جراد البحر
الفخ ده بالنسبة للحيوانات لا تمثله غير جملة “دخول الحمام، مش زي خروجه”. بتكون أوراق النباتات دي على شكل حرف Y أو A، وده بيخلي الفريسة تعرف تدخل من ناحية لكن مستحيل تخرج من التانية، وده مش بس عشان شكل الورقة، لكن كمان لأن الورقة بتكون مبطنة بشعيرات بتوجه الفريسة فى إتجاه واحد بس، فتدخل الفريسة الورقة من الإتجاه الواسع، وفجأة تلاقي نفسها المسكينة عند معدة النبات_ المكان الموجودة فيه إنزيمات الهضم_، كمان في اعتقاد تاني بيبرر دفع الفريسة (الحشرة) في الاتجاه ده تحديدًا، وهو أنها بتتحرك في نفس اتجاه حركة الماء داخل الورقة نفسها.
![النباتات المفترسة](http://neonsciences.com/wp-content/uploads/2016/02/4.png)
اعرف أكتر| عن ”أكل الحشرات“: مزفلطة بس تملى التانك!
هل النباتات المفترسة عندها القدرة على مهاجمة إنسان؟
للأسف أيوة، النباتات دي تقدر تتغذى على إنسان، لكنها فعليًا بتتغذى على الحشرات، العناكب، القشريات، الكائنات الأولية، السحالى، الفئران، الفقاريات الصغيرة. غالبًا البشر طعمهم مش حلو أوي يعني أو كبار شوية عليها الله أعلم لكن الحمدلله يعني.
بتعتمد النباتات دي على فرائسها للتغذية، ولكنها تقدر تنمو عادي من غير وجود الفرائس دي، لكن الحقيقة النمو بيتأثر وبيبقى أبطأ بكتير . النباتات المفترسة في الأساس نباتات زيها زي أي نباتات لكنها لما تواجدت في بيئة فقيرة بالعناصر الغذائية اللازمة للنمو بدأت تطور أساليب مختلفة تخليها تقدر تحصل عليها، وبعد كدة بدأت في توريث الصفات دي للأجيال اللي بعدها.
أخيرًا، لازم نقول إن مش كل النباتات اللي بتصطاد حشرات تبقى نباتات مفترسة، لأن عشان نعتبر كائن ما مفترس، لازم يكون بيصطاد الفريسة دي ويتغذى عليها، لكن في بعض النباتات بتصطاد الحشرات وتقفل عليها بأوراقها عشان حبوب اللقاح تلزق على جسم الحشرة وتقدر تنقلها من زهرة للتانية، وبالتالي تساعد في عملية التلقيح والتكاثر.
وعمومًا لو كان كل اللي فات ده مش كفاية عشان تحس بالرعب وتحمد ربنا إنك عايش بعيد عن النباتات دي، ممكن تتفرج على الفيديو ده وتقولنا رأيك بعدها.
https://www.youtube.com/watch?time_continue=2&v=MnY_cCRELvs
المصادر