أمراض الرحم: تكيسات المبايض! – الجزء الثالث

كتبت: يارا كمال

في المواضيع اللي فاتت، اتكلمنا عن مشاكل الرحم زي بطانة الرحم المهاجرة وسقوط الرحم. لكن مش بس الرحم هو اللي متضرر معانا، لأ ده المبيض كمان. النهاردة بقى هنتكلم عن تكيسات المبايض. الموضوع وما فيه إن في حاجة حصلت غلط في نص عملية التبويض.. خلونا نعرف بتفصيل أكبر.

تكيسات المبيض .. مش كله وحش

الستات عندهم مبيضين موجودين على جانبي الرحم. البويضات بتنمو وتنضج في المبايض وبتطلقها في الدورة الشهرية في سن الإنجاب. تكيسات المبايض بقى هي أكياس مليانة بسائل في المبايض وعلى سطح المبيض.

فيه ستات كتير بييجي لهم تكيسات مبايض في فترة في حياتهم، وأغلب التكيسات دي مابتعملش مشكلة أو بتسبب عدم ارتياح بسيط، وأغلبها مابتكونش مضرة، وممكن تختفي لوحدها من غير علاج خلال شهور.  مع ذلك، التكيسات دي لو اتقطعت ممكن تعمل أعراض خطيرة.

كمان التكيسات الكبيرة ممكن تسبب إحساس بعدم الارتياح في البطن وممكن تضغط على المثانة، فتخلي فيه رغبة في التبول كل شوية، لإن سعة المثانة بتقل.

لكن لو فيه أعراض بتكون ألم سخيف كده في الحوض واللي ممكن يمتد للجزء السفلي من الضهر والفخدين، وعسر الجماع نتيجة ألم الحوض أثناء الاتصال الجنسي، والوجع أثناء حركة الأمعاء للتبرز، والغثيان والقيء وحنان الثدي زي ما بيحصل وقت الحمل. (حنان الثدي يعني إفراز الثدي للبن لكن في حالة عدم وجود الحمل)

التكيسات اللي بتنمو بعد انقطاع الطمث ممكن تكون سرطانية. وفيه كمان مضاعفات مابتحصلش كتير لكنها مرتبطة بالتكيسات زي التواء المبيض، وده ممكن يحصل لما التكيسات بتكون كبيرة، وبالتالي ممكن المبيض يحرك من مكانه في الحوض، وده بيزوّد فرصة حدوث التواء مؤلم للمبيض. كمان حدوث تمزق في التكيس ممكن يسبب وجد شديد ويسبب نزيف داخلي.

طب إيه بيسبب التكيسات دي؟

أغلب التكيسات بتتكون كوظيفة عادية في الدورة الشهرية. بمعنى؟

الطبيعي إن المبيض بيحتوي على عدد من البويضات غير الناضجة، في مطلع كل دورة شهرية جديدة بيحصل تحوصل حوالين البويضة، يعني بتتكون حويصلة اسمها «حويصلة جراف» . بيكون الهدف منها إن البويضة تنضج جواها لحد ما توصل لمرحلة الخروج من المبيض (التبويض). باقي الحويصلة بعد انقطاعها وخروج البويضة منها بيكون حاجة اسمها الجسم الأصفر. ودور الجسم الأصفر ده هو  إفراز هرمون الأنوثة الإستروجين والبروجسترون في حالة حدوث حمل (إن البويضة تم تخصيبها). أما إذا ماتمش تخصيب البويضة، فالجسم الأصفر بينزل عادي خارج الجسم مع دم الحيض وتبدأ دورة جديدة وهكذا.

أحيانًا بقى الحويصلة دي بتفضل تنمو وما بتتقطعش (أو تنفجر عشان البويضة تخرج منها)، وفي الحالة دي بتتسمى «كيس وظيفي»، وليه نوعين:

• أول نوع هو التكيس الجُريبي: بيحصل لو حاجة غلط حصلت والحويصلة ما اتقطعش والبويضة خرجت منها. وفي الحالة دي البويضة نفسها بتفضل تنمو وتتحوّل لتكيّس.
• أما تاني نوع فهو تكيس الجسم الأصفر: بيحصل أحيانًا في بعض الحالات لما فتحة الحويصلة اللي بتخرج منها البويضة شبه بتتقفل، وبالتالي السائل بيفضل يتراكم جواها ويتحوّل لتكيس.

اعرفوا أكتر عن الدورة الشهرية من هنا.

وفيه أنواع بقى ملهاش دعوة بالوظيفة الطبيعية للدورة الشهرية زي:

• الكيسة الجلدانية (Dermoid cysts): ودي تكيسات ممكن تكون بتحتوي على أنسجة زي أنسجة الشعر أو الجلد أو الأسنان، واسمها الورم المسخي، لإنها بتتكون من الخلايا اللي بتنتج البويضات، ونادرًا لما بتكون سرطانية.(مرة واحد كان كاتب إن عندها سرطان ولما طلعوه لقوا فيه شعر، وعرفوا إن ده سحر ومش عارف إيه. الكلام ده طبعًا هجص: اعرفوا أكتر والحدوتة بالكامل من هنا).
• ورم غدي كيسي (Cystadenomas): ودي بتتكوّن من نسيج المبيض نفسه، وممكن يكون مليان ميه أو مادة مخاطية.
• بطانة الرحم المهاجرة: أحيانًا التكيسات بتحصل نتيجة بطانة الرحم المهاجرة، لإنها أحيانًا بتتعلق بالمبيض وبتنمو.

فيه حالات لازم ساعتها تروحي للدكتور على طول، وهي الألم المفاجيء والشديد في البطن أو الحوض،أو وجع مصحوب بحمى أو قيء، أو أعراض زي أعراض الصدمة زي الجلد البارد الرطب والتنفس السريع والدوار أو الضعف.

بس على العموم، لو فيه أعراض للتكيسات، الدكتور ممكن يكتفي بمتابعة الحالة، لإن التكيس ممكن يروح لوحده، وممكن الموضوع يحتاج جراحة. وأدوية تنظيم النسل بتقلل فرصة تكوّن تكيسات جديدة.

المصادر: webmd nhs.uk mayoclinic