النحل تنسيقه جاب هندسة!
كتبت: يارا كمال
مع تأسيس كلية الهندسة في جامعة مملكة الحشرات، دخل مجموعة نوابغ من النحل الكلية، مش عشان يبنوا عمارات تتهد على أدمغة أصحابها، ولا عشان تنسيقهم جاب هندسة ولا عشان النحلة الملكة قالت لهم: ”نفسي الناس تقول لي يا أم الباشمهندس”. لأ، هما مشكلتهم كانت إنهم هيودوا كل العسل اللي بيعملوه ده فين. هما عايزين شكل للخلية بتاعتهم يقدروا يخزّنوا فيه أكبر كم من العسل بدون إهدار للشمع اللي بيعملوا بيه الخلية.
هتقولوا لي إنتي أكيد بتستعبطي، يعني إيه النحل دخل هندسة؟ الصراحة آه بستعبط، بس ممكن حد يشرح لي إزاي بيقدروا يكوّنوا الخلية بتاعتهم من أشكال سداسية الأضلاع، ويحسبوا زوايا الأشكال دي بحيث تطلع مظبوطة كده؟ فاكرين الكارتون اللي كان الدبدوب بيطلع فيه عايز يسرق العسل، فيمسك الخلية والنحل يلسعوا؟ فاكرين بقى شكل الخلية والمخازن الصغيرة سداسية الأضلاع اللي بتتكون منها الخلية؟ أهي هي دي.
طب إشمعنا النحل اختاروا الشكل سداسي الأضلاع ده؟
النحل بيحتاجوا مكان آمن تعيش فيه مستعمرة النحل كلها، وفي نفس الوقت ممكن يتحط فيه الرحيق لحد ما ينضج ويبقى عسل. ده هيحتاج استغلال ذكي للمساحة. الحل هنا كان إنهم يعملوا وحدات تخزين صغيرة مرصوصة جنب بعضها، بس تبقى بحجم كبير كفاية إن نحلة تخش جوة الوحدة دي.
مبدئيًا كده، الخلية اللي بتتكوّن من وحدات تخزين صغيرة دي بتتعمل من الشمع. عشان النحل يعمل أوقية شمع (الأوقية بتساوي حوالي 28 جرام)، محتاج يعمل الأول 8 أوقيات من العسل، وده بيحتاج مجهود كبير. يبقى النحل محتاج شكل لوحدات التخزين يستوعب عسل كتير من غير ما يهدر الشمع.
المشكلة دلوقتي بقى وحدة التخزين دي هتتعمل على شكل إيه؟
نرجع تاني لمجموعة النحل اللي مجموعهم جاب هندسة دول. المجموعة دي دخلت على الدكتور بتاعهم وسألوه: إيه أكتر شكل ممكن يحقق المعادلة دي؟ فقال لهم: الدايرة.
وماله حلوة الدايرة. جم يجربوا الدايرة، لقوا إنه كده بقى فيه فجوات بين وحدات التخزين، ودي مساحة ضايعة. قاموا سايبين كلام الدكتور على جنب، وقعدوا يفكروا إيه الشكل التاني اللي ممكن يحقق المعادلة دي، لحد ما توصلوا لإن الشكل سداسي الأضلاع هو أفضل اختيار. ليه؟
أولًا، لإن الشكل سداسي الأضلاع أقرب شكل للدايرة، بس الفرق إنه مش هيبقى فيه فجوات بين الوحدات. ثانيًا إن مساحته بالنسبة لمساحة المثلثات أو المربعات (اللي برضه مش هيبقى فيه بينها وبين بعضها فجوات) أحسن في تحقيق المعادلة دي. يعني مساحة المثلث هي نص (الارتفاع X طول القاعدة)، ومساحة المربع هي طول الضلع مضروب في نفسه، أما مساحة سداسي الأضلاع هي 6 X (نص (الارتفاع X طول القاعدة))، يعني ببساطة 6 أضعاف مساحة المثلث بنفس طول القاعدة والارتفاع.
وبالفعل جربوا يستخدموا الشكل سداسي الأضلاع، وبعد تاريخ طويل من التجربة والخطأ والتطور، قدروا يوصلوا للشكل ده اللي أي مهندس يفخر إنه صممه. بس أحب أقول لكم إن بعد ما المجموعة دي اتخرّجت، علقوا الشهادة في الصالون، ودلوقتي بيلفّوا بعسل على البيوت.
تمت.
قصة قصيرة حزينة
المصدر
