![](https://neonsciences.com/wp-content/uploads/2016/06/period.jpg)
إيه هي أسباب آلام الدورة الشهرية الشديدة ؟
كتبت: مها طـه
غالبًا معظم البنات والستات بيعانوا كل شهر من آلام الدورة الشهرية ، واللي غالبًا مالهاش تفسير واضح عند العلماء. هو ليه بيبقى فيه آلام بالشكل العنيف ده؟ ليه ممكن حد يضطر ياخد كمية مسكنات رهيبة في وقت قصير عشان بس يبقى أحسن؟ بس أخيرًا، العلماء قدروا يوصلوا للسبب المنطقي المُحتمل للألم الرهيب ده. وإذا عُرِف السبب، يمكن يبطُل الألم.
الدراسة اللي حاولت تلاقي التفسير تُعتبر الدراسة الأكبر من نوعها لحد دلوقتي، فيها العلماء اكتشفوا وجود علاقة بين العلامات البيولوجية للالتهاب، وشدة الآلام المصاحبة والسابقة للدورة الشهرية، وده معناه إن الالتهابات الشديدة ممكن تحفز التقلصات والانتفاخ.
الباحثين عارفين من فترة طويلة إن الأدوية المضادة للالتهاب بتساعد في تخفيف آلام الدورة الشهرية، وفي كتير من الأطباء أصلًا بيوصفوها للبنات والستات اللي بيشتكوا من آلام قوية قبل وفي أثناء الدورة الشهرية، لكن الدراسة دي تُعتبر هي أول دراسة على نطاق واسع لتحديد وجود صلة بيولوجية بين الالتهاب والدورة الشهرية. بالرغم من إن الدراسة دي تُعتبر لسة في مرحلة مبكرة، إلا إنها ممكن تساعد العلماء على التوصل لأدوية أكثر فاعلية من المُسكنات اللي بتُستخدم حاليًا.
إيه هو السبب في آلام الدورة الشهرية ؟
بعد مسح لـ2939 سيدة في الولايات المتحدة الامريكية، توصل فريق البحث في جامعة كاليفورنيا لوجود علاقة طردية بين شدة آلام الدورة الشهرية، وظهور بروتين اسمه ”high-sensitivity C-reactive protein“ أو ”hs-CRP“. البروتين ده بيُعتبر علامة بيولوجية على وجود التهاب في الجسم، وعشان كدة العلماء شايفين إنه كل ما كانت نسبة البروتين ده أعلى في الجسم، فالشخص ده هيكون عُرضة أكتر للإصابة بالالتهابات، ويا سلام بقى لو ست يبقى في الحالة دي هتعاني من آلام شديدة جدًh قبل وأثناء دورتها الشهرية.
الباحثين قالوا إن الأعراض اللي بتحصل قبل وأثناء الدورة الشهرية غالبًا ما بتكون في شكل آلام في البطن والظهر، زيادة في الوزن، شهية مفتوحة وميل للأكل، الشعور بالانتفاخ، وآلام الثدي، كل الأعراض دي معناها زيادة نسبة الـhs-CRP في الجسم.
طبعًا أهمية الاكتشاف ده نابعة من إن في حوالي 80% من السيدات والبنات بيعانوا من آلام ما قبل وفي أثناء الدورة الشهرية، ومع ذلك الأبحاث على الموضوع ده، سواء من ناحية معرفة الأسباب أو إيجاد علاج للحالاة دي، وكل اللي بيعملوه الدكاترة هو إنهم ينصحوا بأنواع مختلفة من المسكنات وأحيانًا مضادات الالتهاب.
وبالرغم من وجود جهاز جديد بيُقال إنه بيوقف ألم الدورة الشهرية إلكترونيًا، لكنه كمان من المؤكد إنه بس بيقلل من ألم الدورة الشهرية لكنه مش بيقضي عليها تمامًا ولا على أعراض ما قبل نزول الدورة الشهرية. الألم اللي سيدات كتير بتعانيه بيكون لا يُطاق أحيانًا، وفي الوقت ده بتبقى لازم الست تستحمل المعاناة مع الآلام دي لمعظم حياتها بالإضافة للإحساس أحيانًا بالغثيان والإكتئاب والقئ كل شهر .
بداية السنة دي، دكتور ”جون جويليبود“، أستاذ الصحة الإنجابية في جامعة كلية لندن، قال إن آلام الدورة الشهرية ممكن تُعادل ألم الإصابة بالنوبة القلبية، وإن الألم ده معظم الدكاترة الرجالة بيتجاهلوه وده باختصار لأنهم رجالة، وبالتالي عمرهم ما جربوا الآلام دي. حاليًا وعشان تجنُب الألم ده في سيدات بيختاروا إنهم ياخدوا أدوية تمنع نزور الطمث أصلًا، زي اللي بيعملوه رائدات الفضاء عشان ميحصلش الألم الرهيب ده في أثناء وجودهم في الفضاء.
لكن طبعًا حاليًا وطالما قدر العلماء يوصلوا لعوامل بيولوجية معينة بتساهم في حدوث الألم ده، فالفرصة بقت أكبر بكتير لتطوير أدوية أفضل، أو على الأقل تحديد السيدات الأكثر عُرضة للإصابة بالنوع ده من الآلام. النتايج بتُشير لعوامل كتير مرتبطة بكل أعراض ما قبل الدورة الشهرية، وده اللي بيخلي العملية مُعقدة شوية، الآليات مثلًا اللي بيحصل بيها الألم بتكون مختلفة لكن في النهاية الالتهاب بيلعب دور في الآلية دي. طبعًا لسه البحث محتاج أبحاث تانية تدعمه وتثبت اللي توصل له.
ومع ذلك كانت نصيحة الباحثين للسيدات بالابتعاد قدر الإمكان عن كل مُسببات الالتهاب في الفترة دي، وأخد أدوية مضادة للالتهابات لتخفيف الألم. طبعًا مسببات الالتهاب ممكن تكون أكل حراق مثلًا، وده كفيل يلهب المعدة أو القولون وبالتالي يحفز من استجابة الجسم للالتهابات. ونصيحة مني لو حضرتك راجل وبتقرأ المقال ده، حاول بس تدرك مدى الألم اللي بتحسه الستات والبنات، وتكون في الفترة دي على الأقل لطيف معهن، أو أقولك كن لطيف في المُجمل يعني.
المصادر: