هل تسبب الألعاب الالكترونية العنف عند الأطفال؟
كتب: حسين مجدي القزاز
من أهم المؤثرات علي الجيل الحالي من شباب المستقبل والأطفال واللي بتحفر في شخصيتهم؛ الإنترنت والألعاب الالكترونية. ده مش شيء غريب لأن الجيل ده بيتمتع بتكنولوجيا ماكنتش موجودة زمان وإمكانيات أكتر. لكن مع الإمكانيات التكنولوجية الأكبر، هنلاقي مشكلات أكتر لأن مع كل خطوة بيظهر تحديات جديدة قدامنا. إلى جانب التحديات اللي ظهرت مع ظهور وانتشار الألعاب الالكترونية، بدأت تنتشر كمان تساؤلات كتير وإشاعات أكتر.
ولأننا بنتمني لأطفالنا الأفضل فلازم نعرف هل فعلا التطور في الألعاب دي هيأثر عليهم ولا لأ؟ ولو هيأثر هيكون تأثير إيجابي ولا سلبي؟ وإزاي إنت كأب أو أم تعرف تواكب التكنولوجيا اللي بتتطور كل يوم؟ وإزاي كمان تعرف اللي هيفيد ابنك واللي ممكن يضره؟
الألعاب الالكترونية خطر جدا وتسبب العنف عند الأطفال؟
شئنا أم أبينا نسبة كبيرة جدا من الأطفال والمراهقين خصوصا بيحبوا الألعاب القتالية، واللي تصنف عند البعض كألعاب مضرة وبتسبب العنف. لكن هل فعلا الألعاب دي بتسبب سلوك عدواني وعنيف عند الأطفال والمراهقين؟
في دراسة منشورة يوم 15 يناير 2018 في مجلة نيتشر، الباحثين قسموا عدد من الأطفال لمجموعتين المجموعة الأولى خلوهم يلعبوا ألعاب قتالية عنيفة لمدة شهرين كاملين، وعلي الناحية التانية المجموعة التانية خلوهم يلعبوا ألعاب مفيهاش أي نوع من أنواع العنف خالص لنفس المدة.
نتيجة الدراسة شملت سلوك الطفل من الحالة المزاجية بتاعته والقلق والعصبية والعنف والتعامل مع اللي حواليه ورد الفعل علي أي حاجة بتحصل قدامه، وكانت المفاجأة إن الأطفال اللي لعبوا الألعاب القتالية أبدوا رد فعل سريع جدا للمواقف اللي قابلوها وماكنش عندهم توتر ولا مشاكل في التحكم في مشاعرهم أو ميل للعنف في التعامل مع اللي حواليهم. ده كمان القائمين على الدراسة حطوا الأطفال دول في مواقف حياتية بحيث يختبروا تصرفهم فيها، وكانت تصرفاتهم مبنية على احتمالات مستحيل حد يعملها إلا لو جربها بنفسه، لكن لإنهم اختبروها في الألعاب الاكترونية؛ كانوا أسرع بكتير وأكثر فاعلية في تعاملهم مع أي موقف بدون عنف أو عصبية زيادة أو حتي مودهم يتعكر.
الدراسة كمان تطرقت لدراسات تانية سابقة واللي اتعملت علي أطفال وقالت إن الألعاب بتسبب العنف، ووضحت المشاكل اللي كانت في الدراسات ديه، وكان أهمها قصر مدة الدراسات الأخرى. كل ما زاد وقت الدراسة، زادت الملاحظات اللي بترصد لو حصل أي تغيير في سلوك الأطفال.
الدراسة الأخيرة بتقول إن الألعاب الالكترونية مش بتسبب عنف بل بالعكس بتزود المهارات عند الطفل في بعض المواقف. ومؤخرا ظهر عدد من الدراسات الحديثة بتقول إن الميل للعنف مالوش علاقة بالألعاب الاكترونية لإن مفيش أي اثبات حقيقي بيربط بين لعب الألعاب القتالية والسلوك العنيف. بل بالعكس إننا نخلي الطفل يلعب اللي بيحبه ويشغل وقته أفضل من إننا نسيبه في الشارع يتعرض لمشاكل أو يبقى بعيد عن العين.
امتي الألعاب الالكترونية تكون مضرة؟
طبقا للقوانين، أي شركة ألعاب بتحدد سن مخصص لكل لعبة من إنتاجها عشان تناسب الطفل اللي هيلعبها. وهنا بييجي دور الأب والأم، إحنا لو قدرنا نلتزم بالسن المحدد لكل لعبة، عمر ما الألعاب دي هتبقي مضرة لأطفالنا.
وهنا يجي سؤال طب أعرف السن المخصص لكل لعبة؟
لو دخلت علي جوجل ودورت علي السن المسموح للعبة اللي طفلك عاوز يلعبها، هتلاقي المواقع كلها بتوفر المعلومة دي بسهولة أو عن طريق أسطوانة اللعبة واللي بيبقي موجود عليها مربع أسود عليه السن الأدني المسموح ليه لعب اللعبة دي. في ألعاب كمان بتنزل Guide أو دليل عشان بتسمح لسن معين يلعب اللعبة بس بحدود معينة، ولو ابن حضرتك عدى الحدود دي، اللعبة بتتقفل وبيتبعت لك إيميل إن اللي إحنا محددين للسن ده، ابنك تخطاه عشان تاخد بالك. كمان فيه ألعاب بتمنع الشات الصوتي اللي بيكون بين اللاعبين لأي لاعب أصغر من 18 سنة لحماية أي طفل من الكلام مع حد غريب.
وبالتالي الفرصة الوحيدة إن أطفالنا يتأذوا هي في حالة لعبهم ألعاب ممنوعة لسنهم.
يعني نعمل إيه؟
يبقى عشان نخلي الأطفال يلعبوا ويستمتعوا باللي بيحبوه في أمان، خلونا نتبع شوية نصايح كده:
1- لازم نشوف السن المسموح للألعاب اللي ممكن نديها للطفل، ماينفعش الطفل يلعب لعبة فوق 17 سنة. واتعلمنا فوق إزاي نعرف السن بتاع الألعاب.
2- المشاركة مع طفلك في الألعاب ليه عامل كبير جدا في معرفة الطفل بيحب يلعب إيه، كمان وجودك جنب طفلك مهم عشان تجاوب علي أسئلته لأن ده سن بيتميز بالفضول، وكمان ده هيخليك مراقب لو طفلك قابل شيء مش مظبوط وهو بيلعب وساعتها تقدر تتصرف.
3- المراقبة ودي مش معناها إني كل شوية أفتح على الولد الأوضة وهو قاعد فجأة أشوفه بيعمل إيه (إحنا مش شرطة الأداب) ولكن فيه ألعاب بتتطلب مراقبة ولي الأمر وساعتها بييجي لك رسالة علي الإيميل باللي ابنك حققه في اللعبة وقعد قد إيه ونصايح من اللعبة نفسها عشان تساعدك في مراقبتك الفعالة للطفل.
4- التجديد بمعني إن ألعاب الفيديو جيم بينزل منها جديد كل سنة والأطفال بيحبوا الألعاب الجديدة، فلو أخدوا الألعاب الجديدة اللي تتناسب مع سنهم كهدية نجاح أو عشان كانوا بيسمعوا الكلام اللي اتفقتوا عليه في الـversion القديم من اللعبة، فده طبعا هيخليك كولي أمر المصدر الاساسي للألعاب بدل ما يلعب ألعاب ممكن تضره سمع عنها من زمايله أو من الانترنت.
5- لازم نعرف إن الألعاب الالكترونية مش مضيعة للوقت، وإنها بتخلق تجربة للاعب ومتعة تساعد الشخص ده إنه يبقي شخص إيجابي ومنتج. الألعاب الالكترونية دلوقتي بقت صناعة من أكبر الصناعات في العالم عشان كده لازم مانقعدش نقول إنها تضييع وقت لأن أولادك مي هيبقوا شايفين كده خالص وعجلة التطور مش هتستنى حد.
