10 حقائق علمية حيوية عن الحيوانات المنوية!
كتبت: مها طه
الحيوانات المنوية على قد ما هي صغيرة إلا إنها أحد أهم أسباب الحياة، من غيرها مفيش بويضة هتُخصب، كل البشر والحيوانات الموجودة على الأرض، هي نتيجة تلقيح حيوان منوي لبويضة، كل اللي إحنا نعرفه عن الحيوانات المنوية معلومات بيولوجية درسناها في المدرسة أو الجامعة، لكن هنا دكتور ”كريج نيدربيرجر“، أستاذ جراحة المسالك البولية في جامعة إلينوي في شيكاغو، هيعرفنا على 10 حقائق علمية مدهشة عن الحيوانات المنوية:
1. الحيوانات المنوية مش طبيعية! ده هو ده الطبيعي
الحيوانات المنوية مش زي البويضات بمعنى إن الراجل مش بيتولد بيها، دي بتتصنع أول بأول عن طريق عملية انقسام داخل الخصيتين وكأنها خط إنتاج. عادةً بتكون عملية الإنتاج دي مش مظبوطة أوي، وإلا نفسر إزاي حقيقة إن 90% من الحيوانات المنوية الموجودة في السائل المنوي بتبقي مشوهة، حيوان منوي له راسين، واحد تاني له ديلين، واحد تالت ديله ملفوف، قايمة طويلة بالتشوهات لو قلناها ممكن نفضل لبكره، وده كله بسبب الإنقسام السريع عشان تقدر الخلايا تنتج كل العدد ده من الحيوانات المنوية في المرة الواحدة. الصورة دي بتوضح نماذج مختلفة للتشوهات دي.
2. نص معلقة شاي
تقريبًا هي دي كمية الحيوانات المنوية اللي بتُنتج في المرة الواحدة، مش كتير صح؟ لكن الحقيقة هما كافيين جدًا لأداء المهمة المطلوبة منهم، وهنا لازم نقول إن عدد الحيوانات المنوية في الذكر الطبيعي لو كانت أقل من 20 مليون حيوان منوي في المرة الواحدة، بيُعتبر الراجل ده عقيم، فالعدد الطبيعي بيبقى حوالي 200 مليون، وهنا كمان لازم نقول إن الحيوان المنوي لا يرى بالعين المجردة وإن حجم البويضة اللي الحيوانات المنوية بتتلف حواليها بتبقي في حجم السمسمة.
3. في الشغل لازم نلبس خوذة
الحيوانات المنوية مش بتشتغل في مصنع صحيح لكنها بتلبس خوذة مع ذلك! الحقيقة هي مش خوذة أوي، هي تركيب بيضاوي الشكل اسمه ”الجسم القمّي – acrosome“، وده بيحتوي على إنزيم قوي بيفرزه بمجرد ما الحيوان المنوي يلمس البويضة، الإنزيم ده هو اللي بيدوب غلاف البويضة الخارجي عشان يقدر الحيوان المنوي يخترقها، ويندمج معاها.
4. خصية واحدة تكفي
لو شخص فقد خصية من الاتنين، فده مش معناه إنه فقد القدرة على الإنجاب بشكل طبيعي لأنه حتى ولو تأثر عدد الحيوانات المنوية شوية بسبب فقدان واحدة من الخصيتين، فالعدد اللي هتنتجه خصية واحدة كفيل للحصول على طفل. كمان في حالة فقدان خصية، فالتانية هتكبر شوية، عشان تقدر تنتج كمية كافية من الحيوانات المنوية.
اللي في الصورة ده ”لانس أرمسترونج“ تقريبًا من أشهر الناس اللي خضعوا لعملية إزالة خصية نتيجة لإصابته بالسرطان، ”أرمسترونج“ جاب 5 أطفال بعد العملية، صحيح في 3 منهم كانوا من حيوانات منوية محفوظة مسبقًا في بنك أمشاج لكن الاتنين التانيين كانوا طبيعين.
5. الحيوان المنوي محتاج بودي جارد
الحيوان المنوي خلية زيه زي أي خلية في الجسم، بخير طول ما هو جوا الخصية لكن بمجرد ما بيخرج منها بيبقى في خطر لأن الجهاز المناعي ممكن يهاجمه بسهولة لإنه بالنسبة للجهاز المناعي خلية جديدة عن باقي خلايا الجسم، بل كمان هو بيعتبره خليه غريبة لأن عدده الصبغي هو نص العدد الطبيعي في باقي الخلايا عشان كده الخصية بتفرز نوع من الخلايا اللي بتحيط بالحيوان المنوي عشان تمنع الجهاز المناعي من مهاجمته، وبكده تحميه منها.
6. يخرج الحي من الميت
الحيوانات المنوية ممكن تبقى ميتة، ومع ذلك ينتج عنها أطفال عادي بالطريقة العادية للإخصاب! الطبيعي إن الحيوان المنوي لازم يكون حي وبيسبح عشان يقدر يوصل للبويضة ويخصبها لكن الحقيقة إن حاليًا مش شرط إن الحيوان المنوي يبقي حي وبيتحرك عشان يحصل تخصيب، وده اللي بيحصل في تقنيات الحقن المجهري، في الحالة دي بيتم استخدام أنبوبة زجاجية رفيعة وصغيرة لإدخال الحيوان المنوي للبويضة، وأحيانًا ممكن يضربوا الحيوان المنوي عشان يتوقف عن الحركة ويقدروا يتحكموا فيه ويدخلوه في البويضة بالشكل. أهم حاجة في الحيوان المنوي هنا هو إنه يكون محتفظ بالمادة الوراثية اللي هتندمج مع نواة البويضة.
7. رايح فين بس يا عم أنت؟
الحيوانات المنوية بتتحرك عن طريق ديلها اللي بتستخدمه كأنه سوط، تضرب بيه فتتحرك لقدام وهكذا. الحقيقة بقى إنه مش دايمًا الحيوان المنوي بيعرف يمشي في خط مستقيم، نصهم بس اللي بيقدر يعمل كده، الباقيين بقى يا إما بيلفوا في دواير مُفرغة أو بيسبحوا مع حركة السائل المنوي نفسه، كائن عبيط في نفسه أوي بيعبر عن كتير مننا في الحقيقة ما علينا!
وطبعًا لأن عدد الحيوانات المنوية بيبقى أصلًا كتير جدًا، فكتير بيقدروا يوصلوا لحد قناة فالوب اللي بتربط الرحم بالمبيضين. قناة فالوب نفسها بقى بتلعب هي كمان ضد الحيوانات المنوية لأن التلت الأول من قناة فالوب مُبطن بشعيرات أو أهداب صغيرة بتحاول تمنع الحيوانات المنوية من الوصول للبويضة، وده المعنى الحرفي لكلمة السباحة ضد التيار!
8. الحيوان المنوي طويل العمر يطول عمره!
الحيوانات المنوية عمرها طويل نسبيًا لأن كون خلية من الجسم تقدر تخرج منه وتعيش في جسم تاني لمدة من يومين لأربعة أيام يُعتبر شئ عظيم في حد ذاته، الحيوان المنوي لو خرج من جسم الذكر مايقدرش يعيش أكتر من كام ساعة بالكتير لكن لما بيدخل جسم الإنثى بيقدر يعيش كل المدة دي! عشان كده الناس اللي بتحاول تمنع الحمل عن طريق فترة الأمان، بيبعدوا تمامًا عن أي ممارسة جنسية في الأيام الـ13 والـ14 والـ15 من الدورة الشهرية عشان ممكن ببساطة البويضة تخرج بعد يومين من دخول الحيوانات المنوية، واللي غالبًا هتكون حية وهيحصل تخصيب عادي جدًا.
9. الحيوانات المنوية بتكره الحر
من المعروف طبعًا إن الخصيتين بيقعوا خارج تجويف البطن، وده مش عشان أى حاجة غير حفاظًا على صحة الحيوانات المنوية، لأن الحيوانات المنوية بتحتاج في تكوينها لدرجة حرارة أقل من درجة حرارة الجسم الداخلية (37 درجة مئوية)، وغالبًا بتكون درجة حرارة الخصيتين في حدود 33 درجة مئوية.
وعشان الخصية تكون دايمًا درجة حرارتها مناسبة، بيكون فيها أوردة بتساعد على سحب الحرارة منها، وكمان وجود كيس الصفن اللي بيحميها خارج تجويف البطن، وفي نفس الوقت بيبعدها أو يقربها من الجسم على حسب احتياجها للحرارة أو للتبريد، وعشان كده بيتم التحذير من ارتداء البناطيل الضيقة أوي لأنها بتقرب الخصيتين من الجسم وممكن تساهم في رفع درجة حرارتهم، واللي ممكن تؤدي لموت الحيوانات المنوية.
10. خط الإنتاج شغال طول الوقت
الحيوانات المنوية بتتصنع عن طريق انقسامات بتحصل في الخصيتين، الحقيقة إن الحيوانات المنوية بتدخل وكأنها في خط إنتاج لحد ما تطلع بالشكل النهائي ده، ووفقًا لأحدث الدراسات، فالحيوان المنوي بياخد حوالي شهرين عشان يتشكل نهائيًا، يعني غالبًا الحيوان المنوي اللي بيخرج النهاردة، مر بخط إنتاج طويل استمر لشهرين عشان يخرج في الأخر بالشكل ده.
المصادر
