حساسية الأكل: ما تعزمش عليا ربما لست بخير يا أخي!
كتبت: مها طــه
في المدرسة وأيام ابتدائي كانت عادتنا أنا وصحباتي إننا ناكل مع بعض فيما يعرف بـ”الغديوة”، واللي معرفش إيه ده فهو طقس طفولي كدة بنجمع فيه كلنا أكلنا مع بعض وناكل من أكل بعض، وبعد ما أكلنا وشربنا وحلّينا كمان، فوجئنا إن صاحبتنا بترجع بشدة وبترتعش وفجأة لونها أزرق وأغمى عليها، وطبعًا كأطفال ده كان حدث مرعب جدًا!
بعدها بأسبوع صديقتنا رجعت المدرسة وكانت كويسة، لكن لقينا المشرفة بتقولنا يا بنات لو سمحتم محدش يأكلها أو يعزم عليها بأي حاجة داخل فيها لبن، وعرفنا من صاحبتنا إن عندها مرض اسمه حساسية اللبن. ومن وقتها ولحد النهاردة تعرضت في مرات كتير لعدد من الناس المصابين بأنواع مختلفة من حساسية الأكل.
حساسية الأكل .. أسباب وأعراض
أعراض حساسية الأكل منتشرة بين الرضع والأطفال أكتر من انتشارها بين البالغين، لكن ده لا يمنع إنها ممكن تظهر في أي عمر، مش بس كده ده حساسية الأكل ممكن تنشأ فجأة، حتى لو من أكل سبق وأكلته كتير قبل كدة من غير مشاكل، ولذلك خد بالك لأنها ممكن تصيبك في أي وقت.
في الطبيعي، جهاز المناعة بيتعامل مع المواد اللي بتدخل جسمك، عشان يحافظ عليك من أي عدوى أو التهاب محتمل. حالة حساسية الأكل هي الحالة اللي فيها الجهاز المناعي بيتعامل مع المواد الغذائية اللي داخلة الجسم باستجابة مبالغ فيها وكأنها مواد خطرة، تستلزم استجابة وقائية من الجسم.
أعراض حساسية الأكل مش كلها زي بعض، وبتتراوح فيها درجة الشدة، من الخفيف للشديد، ومش معنى إن الأعراض كانت في الأول خفيفة، إنها في كل مرة هتكون بنفس الدرجة. أخطر أنواع حساسية الأكل هو “الحساسية المفرطة – anaphylaxis” وده رد فعل تحسسي بيصيب الجسم كله وبيهدد الحياة، بيسبب ضعف في التنفس وانخفاض مفاجئ في ضغط الدم وانخفاض في معدل ضربات القلب، بمجرد التعرض لنوع الأكل اللي بيسبب الحساسية.
حساسية الأكل ممكن تحصل من أي نوع أكل، لكن حوالي 90% من حالات حساسية الأكل، سببها 8 أنواع بس من الأطعمة، وهي: (البيض، اللبن، الفول السوداني، المكسرات، الأسماك، المحار، القمح، الصويا). كمان بعض البذور زي بذور السمسم والخردل – اللي بتدخل كمكون رئيسي في تصنيع المسطردة- بتسبب حساسية الأكل، وعشان كده في ناس بتتعب من أكل المسطردة وهما مش عارفين السبب.
أعراض حساسية الأكل ممكن تظهر على الجلد أو على الجهاز الهضمي، وأحيانًا بتمتد للقلب والأوعية الدموية أو الجهاز التنفسي، ومن ضمن أشهر الأعراض (القئ أو تقلصات المعدة، القشعريرة، ضيق التنفس، السعال المتكرر، مشاكل في البلع، تورم اللسان، ضعف النبض، تلون الجلد باللون الأزرق، الدوخة والإغماء).
اعرف أكتر| ”الزرنيخ“: السم الكامن في وجبات الأطفال!
معظم أعراض حساسية الأكل بتظهر في خلال ساعتين من تناول الأكل، لكن بدايتها بتكون بعد دقايق قليلة من الأكل، وفي بعض الحالات النادرة، ممكن رد الفعل التحسسي ده يتأخر لمدة تتراوح ما بين 4 – 6 ساعات أو أطول. عادةً رد الفعل التحسسي المتأخر ده بيظهر عند الأطفال في صورة إصابة بالإكزيما كعرض من أعراض الحساسية.
من ضمن أنواع الحساسية اللي بتظهر رد فعل متأخر هي الحساسية الناتجة عن الالتهاب المعوي المستحث بالبروتين الغذائي (FPIES)، وده نوع من حساسية الأكل اللي بتظهر أعراضه في صورة رد تحسسي في المعدة والأمعاء بعد تناول اللبن، فول الصويا، وبعض أنواع الحبوب والأطعمة الصلبة الأخرى.
النوع ده من الحساسية غالبًا بيظهر عند الأطفال الرضع اللي بيتعرضوا للأطعمة دي لأول مرة في حياتهم أو اللي تم فطامهم، وغالبًا بتكون أعراض الحالة عبارة عن قئ متكرر ومستمر واحتمال يؤدي للجفاف، وفي بعض الحالات بيصاب الاطفال دول بالإسهال الدموي.
للأسف وبسبب تشابه حالة الإصابة بالحساسية دي مع أنواع تانية من الاصابة زي العدوى البكتيرية أو الفيروسية، فتشخيص الحالة ممكن يتأخر، وده ممكن يهدد حياة الطفل في اللحظة دي، لاحتمالية الإصابة بالجفاف، وعشان كدة لازم لو إبنك لسه رضيع أو في مرحة الفطام وبيجرب أكل لأول مرة وحصل أي عرض ولو خفيف إنك تتوجهي بيه لمستشفى أو عيادة وبسرعة خوفًا من خطر الحساسية اللي قد تكون مؤذية بشدة.
ملحوظة مهمة، مش كل شخص بيعاني من بعض الأعراض بعد تناول أطعمة معينة بيكون مصاب بحساسية منها، مثلًا زي الناس اللي بتعاني من حكة في الفم أو الحلق بعد تناول خضراوات وفواكه معينة نية مش مطبوخة، غالبًا ده معناه الإصابة بحساسية الفم، مش حساسية أكل خالص، هي مجرد رد فعل تحسسي على حبوب اللقاح الموجودة على الأكل مش الأكل نفسه، وبكدة ممكن لو أكلت نفس الحاجة دي مطبوخة مش بيبقى فيه أي مشكلة، لأن الحرارة بتدمر المواد المسببة للحساسية دي.
اعرف أكتر| عن غسل الخضار والفاكهة.. سمّي وكُل!
في حالة الإصابة بالحساسية إيه العمل؟
لو اتأكدت من كونك مصاب بحساسية الأكل إنت أو حد من عيلتك، لازم تراعي أنواع أكلك جدًا، وزي ما قولنا لو طفل فغالبًا بتكون الحساسية من البيض واللبن والفول السوداني هي الغالبة، لكن عادي ممكن بعد ما الطفل يبلغ يتخلص من حساسية اللبن والبيض، لكن لو فول سوداني/ مكسرات يبقى غالبًا خلاص كدة لازم يتجنبه طول عمره.
وفي البالغين، غالبًا بتكون حساسية لقاح الفاكهة والخضراوت زي ما شرحنا والفول السوداني والمكسرات والأسماك والمحار هي الغالبة، لكن هنا بتظهر مشكلة خطيرة في البالغين، وهي إنه ممكن يكون بيعاني من حساسية تجاه حاجة معينة زي الفول السوادني اللي هو من البقوليات، ويلاقيها امتدت معاه عشان تشمل المكسرات بأنواعها (جوز، لوز، كاجو..)، وأحيانًا البقوليات التانية (عدس وغيره) ما عدا فول الصويا. كمان الأشخاص اللي بيعانوا من حساسية للجمبري مثلا، ممكن يتفاجئوا بإنها امتدت عشان تشمل كمان الكابوريا والاستاكوزا وما شابه من القشريات البحرية.
استنونا في المقال اللي جاي عشان نتكلم عن أشهر أنواع حساسية الأكل بالتفاصيل.
المصادر: foodallergy mayoclinic nhs medlineplus webmd kidswithfoodallergies aaaai
