.
ليه وإزاي؟

5 تفاعلات كيميائية مدهشة ”الله عليك يا أستاذ“ أوي!

كتبت: مها طه

كشخص محب للعلوم التفاعلات الكيميائية كلها بالنسبة لي فيها جانب مدهشة، وأعتقد إن في كتير مننا كان بيحب يشوف التجارب في معمل المدرسة وكان ده بيمثل لنا الـfun part زي ما بيقولوا، اللي فيه الجمال والدهشة وأحيانًا الرعب لما تشوف لون بيتحول للون تانى، مواد بتختلط ببعضها عشان يطلع راسب من ناتج جديد أصلًا وغيره، هنا بقى اختارنا لكم 5 تفاعلات كيميائية مدهشة عشان نشوفهم أولًا ويتحقق لكم عنصر الإبهار زي ما حصل معايا وبعدها نشرح هو إيه اللي حصل بالظبط.

1. ثعبان فرعون

فاكرين قصة سيدنا موسى وعصاه، المفروض فرعون جاب السحرة بتوعه اللي رموا عصيانهم فتحولت لتعابين، غالبًا ده ماكنش سحر ولا حاجة، ده كان مجرد دليل على تقدم المصريين القدماء فى الكيمياء، واستخدامهم لتفاعل كيميائي ممكن مع شوية إثارة وتشويق يخلي الشخص اللى بيشوفوا يفتكر إن الناتج ده تعابين حقيقية بجد.

التفاعل ده بيتم بحرق مسحوق من مادة ”ثيوسيانات الزئبق“ لونها أبيض، المادة الناتجة عن الاحتراق اللى شبه التعابين دى اسمها ”نيتريد الكربون“. لو بتفكر تنفذ التجربة دي عملي في البيت، فالأفضل بلاش خالص لأن المواد المُستخدمة فيه سامة جدًا.

2. ساعة اليود

التفاعل ده بالنسبة لي أنا شخصيًا مدهش جدًا، التفاعل ده بيحصل لما تخلط ”يوديد البوتاسيوم“ و”النشا“ و”ثيوسلفات الصوديوم“ مع محلول من”بيروكسيد الهيدروجين“، بعد ثواني من الخلط بيتحول المحلول الشفاف للون الكحلي، الفيديو بيوضح التجربة بطرق مختلفة، وبيعكسها كمان، فبيرجع اللون تانى شفاف، اتفرجوا واستمتعوا بالكيمياء وجمالها!

3. الثعبان الأسود

واضح إن في هارموني وحالة من الانسجام عظيمة ما بين الكيميا والتعابين! التفاعل ده بيتصنف فى الكيمياء كتفاعل نازع للماء، وبيتم على السكر ”السكروز“ عن طريق استخدام حمض الكبريتيك _ مية النار يعني_ وبما إن ”السكروز“ نوع من أنواع الكربوهيدرات، فبالتالى لما تنزع المياه من جزئ السكر، بيتبقى عنصر الكربون اللي لونه أسود، وبالرغم من إن التفاعل بينزع المياه من جزيئات السكر إلا إنها مش بتختفي بشكل كامل يعني، بعض جزيئات الميه بيفضل على شكل سائل فى الحمض، ولأن التفاعل يُعتبر طارد للحرارة، يعنى بينتُج عنه حرارة _مية نار حضراتكم يعني، فالمية الموجودة فى الحمض بتتبخر، ولو ركزت فى الفيديو هتشوفها. طبعًا مش محتاجين نقول إن التفاعل ده خطير جدًا.

4. بركان ثانى كرومات الأمونيوم

تفاعل تحلُل ثانى كرومات الأمونيوم، عند تحلل ثانى كرومات الأمونيوم ذات اللون البرتقالي البرّاق ده، بينتُج عنها غاز أكسيد الكروم الأخضر اللي بيخرج للهواء، وينتج عنه أثر شبه البركان والحمم بتخرج منه قبل الإنفجار، وبالرغم من إن الغالبية العُظمى من المادة بتتبخر إلا إن المُنتج النهائي بيظهر بحجم أكبر من الكمية اللى بدأ بيها أصلًا.

5. معجون أسنان الفيل

تفاعل رغوي بيسموه كده بسبب رغوة عظيمة اللي بتتج عنه. التفاعل ده ناتج عن التحلل السريع لـ”بيروكسيد الهيدروجين“، وممكن يتعمل بمُنتهى السهولة لأنه بيتطلب عدد قليل من المكونات، فكل اللي إنت محتاجه هو ميه وبرمنجانات بوتاسيوم، لما تحطهم على بعض هتلاقى لون المية اتحول للبنفسجي، كل ما عليك إنك تضيف ”بيروكيد الهيدروجين“، وهتلاقى فوران كبير من الرغوة، هنافي الفيديو عشان يوضحها أوى، أضاف نقطتين من صابون سائل.


المصادر

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى