10 من فوائد الصيام الصحية في رمضان

كتبت: مها طـه

رمضان فترة مهمة تقدر تستغلها عشان تستفيد مش بس على المستوى الروحي، لكن كمان على المستوى الجسدي وعشان صحتك تبقى أحسن بسبب الصيام.

مبدئيًا لازم نقول إن كتير من الناس حول العالم بيصوموا، مسلمين وغير مسلمين، الصيام بيختلف باختلاف الديانات والثقافات يمكن، بس يظل الأساس بتاعه في الأخر واحد وهو الامتناع عن كل أو بعض الأكل والشرب لعدد من الساعات المتقطعة خلال فترة يوم أو أكتر. الفوايد الصحية للصيام كتيرة جدًا، لكن في الغالب بيكون الهدف منه إنقاص الوزن اللي غالبًا بيحرق من الكتلة العضلية، وبالتالي كمية الدهون في الجسم مش بتتأثر حتى لو الوزن الكلي نقص، ده كمان ممكن ببساطة يرجع الشخص ده يكسب نفس الوزن تاني ويمكن أكتر.

طبقًا لكلام ”شهيد أطهر“، الأستاذ المشارك بكلية الطب بجامعة انديانا، والمتخصص في طب الباطنة والغدد الصماء، فالصيام في رمضان بقى بيكون مختلف لأنه غالبًا مش بينتج عنه حرمان أو سوء تغذية، والجسم بياخد احتياجاته من السعرات الحرارية كاملة، وأحيانًا ممكن تبقى أقل شوية لكن مش كتير، ده بالإضافة لإن الصيام في رمضان لو بيتعارض مع الحالة الصحية للشخص، فالفطار بيبقي متاح، بناءًا على توجيهات الطبيب.

وعليه خلونا نتكلم عن 10 من فوائد الصيام الصحية في رمضان تحديدًا:

• تحسين عملية التخلص من السموم:

طبعًا معظم الأكل المُصنع اللي بناكله طول الوقت عليه مكسبات طعم ولون ومواد مُضافة، واللي بتزود نسبة الدهون عند دخولها في الجسم، ومعظم السموم بيتم تخزينها في الدهون دي الموجودة في الجسم، الصيام بيساعد على حرق الدهون عشان الجسم يحصل على الطاقة اللازمة وبالتالي ومع الصيام لـ30 يوم متواصل وعدم إدخال سموم جديدة للجسم، فالكبد والكلى والأعضاء التانية بتتخلص من السموم.

اعرف أكتر| حرب الكافيين: النسكافية ولّا القهوة؟

• أفضل لجهازك الهضمي:

في خلال فترة الصوم، الجهاز الهضمي بيرتاح، الجهاز الهضمي بيفضل شغال وبيفرز كل إفرازاته الطبيعية، لكن بنسبة قليلة، وده بيساعد على الحفاظ على نسبة السوايل في الجسم، وبالتالي عملية هضم الطعام بتتم بمعدل ثابت وحصول الجسم على الطاقة من الأكل بيبقى بشكل تدريجي.

• التقليل من الالتهابات:

في بعض الدراسات اللي بتقول إن الصيام بيقلل من الأمراض الالتهابية والحساسية، زي التهاب المفاصل، الروماتويد، الأمراض الجلدية زي الصدفية، ومش بس كدة الصيام بيساعد على الشفاء من أمراض الأمعاء الالتهابية زي قُرح القولون.

• تقليل نسبة السكر في الدم:

الجسم عشان يشتغل ويقوم بكل وظايفه محتاج طاقة، في حالة الصيام حضرتك مُمتنع عن الأكل وبالتالي مفيش أكل داخله، فبيبدأ الجسم يكسر الجلوكوز المتخزن جواه أصلًا، ويقلل من إفراز هرمون الإنسولين، وده بيريح البنكرياس كمان.

• زيادة حرق الدهون:

الجسم عشان يوفر الطاقة اللي محتاجها بيكسر الجلوكوز، لحد ما يستنفذ مخزون الجلوكوز، فيبدأ في حرق الدهون كبديل عشان يستخلص منها الطاقة اللي محتاجها.

• خفض سكر الدم

الصيام بيعتبر أحد طرق علاج ارتفاع ضغط الدم، الصيام بيقلل كمان من خطر الإصابة بتصلب الشرايين. تصلب الشرايين بيبقى عبارة عن شرايين مسدودة عن طريق جزيئات الدهون، وبما إن الصيام بيساعد على حرق الجلوكوز وبعده الدهون، فهو بيقلل من احتمالية تراكمها في الشرايين من الأصل، كمان هرمونات التوتر زي الأدرينالين والنورأدرينالين مع الصيام بيقل إفرازهم، وده بيخلي معدل التمثيل الغذائي ثابت ضمن حدود معينة، وكل ده بيُعتبر في صالح تخفيض ضغط الدم.

• الصيام بيعزز فقدان الوزن:

الصيام في الحقيقة بيقلل الوزن، لأ ده كمان بيعزز فقدان الوزن بشكل سريع، بس طبعًا لو بطلنا ناكل محشي وبط ومكرونة بالبشاميل وكنافة بالمانجة كل يوم، لأنه زي ما شرحنا بيحرق الدهون.

• المساعدة على اتباع نظام أكل صحي:

بعيدًا عن إننا في المعظم ممارستنا في الأكل ملهاش أي علاقة بالأكل الصحي، إلا إنك ممكن تعتبر رمضان فرصة عشان الصيام بيخلي شهيتك للأكل تقل شوية وبالتالي ممكن تستبدل الأكل المُصنع والوحبات السريعة تقل، وبالتالي يبقى نمط الحياة احسن.

• تعزيز المناعة:

لما بتحافظ على نظام غذائي متوازن في الصيام، ده بيعزز المناعة، كفاية إنه بيقضي على السموم، وبيقلل من تخزين الجسم للدهون، ولما تكسر صيامك على فاكهة مثلًا، فالجسم هيخزن الفيتامينات والمعادن الأساسية بشكل أفضل.

اعرف أكتر|  أمراض المناعة الذاتية: لما يعلن جهازك المناعي تمرده عليك!

• الصيام فرصة كويسة للتخلص من الإدمان:

مش شرط إدمان يعني مخدرات، لك تعاطي أي حاجة بشكل زايد عن الطبيعي هو إدمان، كمان بالذات لو مش قادر تستغنى عنها ومن غيرها تتعب، إدمان النيكوتين، الكافيين، وغيرهم، لأنه بالفعل الصايم بيمتنع عن كل ده ولعدد ساعات كتير، انتهزها فرصة وبطل.

نشر هذا المقال في 25 يونيو، 2016 وتم تحديثه في 18 مايو 2019

المصادر:  soundvision  livestrong  healthline