الصيام “هنا وهناك”: أنواع الصيام في الديانات والثقافات المختلفة
كتب: أحمد حسين
مع قرب شهر رمضان، في أشياء كتير بتظهر تعرّفك إن رمضان قرّب حتى لو مش واخد بالك. زمان، كنت بعرف من الزينة والفوانيس ووجود كمية ياميش كبيرة جدًا في كل ركن من أركان الشوارع، ده طبعًا غير الفوازير ونيللي وشريهان وعمو فؤاد وفطوطة، ولما كبرنا شوية بقى فيه بكّار وبدأت المسلسلات برضه تسيطر، لحد ما وصلنا حاليًا لإنك تعرف ميعاد رمضان من إعلانات المسلسلات بالأساس.
الصيام في الثقافات المختلفة
هرجع تاني للماضي _من غير نوستالجيا_، وأفتكر أول مرة سمعت فيها عن فكرة الصيام نفسها. غالبًا كنت في ابتدائي، وكنا بنتعلم الأركان الخمسة للإسلام، واللي من ضمنهم الصيام، بس ماكنتش فاهم الفكرة أوي من الصيام، أو حتى ماكنتش بصوم، وساعات كنت بعمل إن أنا صايم لكن بضعف قصاد البطاطس المحمرة.
ما علينا، خلينا في المهم، لما كبرت شوية، حاولت أفهم إحنا ليه بنصوم؟ ولقيت وأنا في طريقي للمعرفة كده إننا مش الوحيدين اللي بنصوم، ده في ديانات تانية وثقافات تانية بيصوموا عادي، بس يا ترى هما بيصوموا زينا؟ أو هما بيصوموا ليه طيب؟
اعرف أكتر| إيه اللي يحصل لو بلعت الشعر اللي في الأكل؟
تقريبًا معظم البشر _سواء بيتبعوا ديانة أو لأ_ بيختبروا الصيام في وقت من الأوقات. والصيام عمومًا له أسباب كتير جدًا، وكل واحد على حسب ديانته أو على حسب وجهة نظره يعني.
في الإسلام مثلًا، الصيام بيكون من الفجر للمغرب، ويمتد لمدة شهر، وبينقسم لنوعين، صيام مادي وصيام روحاني، الصيام المادي بيكون عن الأكل والشرب والإساءة باليد أو باللفظ لحد وممارسة الجنس بين الأزواج، أما الجزء الروحاني، فده الجزء اللي بيكون فيه عدم الشعور بالمشاعر السلبية تجاه البشر، يعني بتحاول في الفترة دي تترفّع عن الكُره والحقد والحسد وتنشغل أكتر بنفسك بعيدًا عن غيرك.
في وجهة نظر أخرى، بتقول إن الصيام بيكون بسبب إنك تحس بمعاناة من لا يستطيع الحصول على لقمة العيش بشكل سهل. يعني عمومًا، الموضوع كله موضوع روحاني، والمفروض تجربة الصيام دي بتغيّر فيك حاجة، بمعنى بتخليك أقرب للجزء الصافي من النفس. باختصار، الموضوع في الإسلام عبادة أقرب للروحانية من المادية.
في المسيحية الأمر شبيه بذلك، يعني الصيام برضه لأسباب روحانية، على الرغم من إنه في المعظم مابيكونش فيه امتناع عن الأكل إلا اللحوم ومشتقاتها يعني، بس غير كده مسموح، لذلك الموضوع بيكون روحاني فعلًا، وبيختلف من كنيسة لكنيسة. يعني الأرثوذكسية مثلًا بتمتد فيها فترة الصوم لحوالي 210 يوم متقسمة على مدار السنة وأطولها الصوم الكبير اللي بيمتد لـ55 يوم قبل عيد القيامة المجيد وبيشترك فيه مع الكالثوليك مع الأرثوذكس، أما الطائفة الإنجيلية فيكون فيها الصيام فردي وتطوعي مش في أوقات محددة.
الصيام لا يختلف كثيرًا برضه في اليهودية، ففيها نفس قائمة الممنوعات (الأكل والشُرب والجنس والقول أو الفعل السيء) لكن بيزيد عليها _على حسب علمي_ تحريم الاستحمام ولبس الأحذية الجلدية. في اليهودية الصيام نوعين، الأول هو صيام الفرد ده للتكفير عن الذنوب، وفي الصيام الجماعي، وده بيجي بعد وقوع كارثة ما. الناس في اليهودية بيصوموا كتير برضه، تقريبًا 40 يوم، ده غير أيام الغفران وهدم الهيكل والصيام التطوعي (اللي هما يومين الاتنين والاربعاء).
في البهائية، الصيام أشبه بالصيام في الإسلام، الفرق بس بيكون في عدد الأيام، يعني البهائيين بيصوموا 19 يوم بس من 2 مارس لحد 20 مارس. أما الهندوسية، فالصيام فيها بيكون حسب الإله اللي بتتبعه، يعني مثلًا لو بتتبع الإله “شيفا” يبقى هتصوم يوم الاتنين طول السنة، ولو بتتبع الإله “فيشنو” فهتصوم يوم الخميس، أما بقى أتباع الإله “سانتوشي ماتا” فبيصوموا يوم السبت.
اعرف أكتر| إيه ده؟ ورم ده ولا سحر سُفلي؟!
وبتختلف بقى في ناس بيصوموا طول السنة وفي ناس بيصوموا لمدة شهور على حسب الطائفة يعني، وفي بيصوموا 24 ساعة وفي بيصوموا 12 بس، لكن في وقت واحد بيتجمعوا فيه كلهم، أول 9 أيام من كل فصل جديد في السنة، وبيصوموا في الوقت ده من غروب الشمس لحد شروق الشمس في اليوم اللي بعده.
وفي بعض الحضارات القديمة، كان الصيام فيها أشبه بعادة/فريضة دينية، زي الحضارة المصرية القديمة كده، أينعم كان الصيام في الأغلب مقتصر على الكهنة بشكل خاص يعني، وصيامهم كان عبارة عن امتناعهم عن الأكل والشرب وممارسة الجنس، بس في بعض الدراسات اتكلمت عن فكرة إن المصريين القدماء كانوا بيصوموا لمدة شهر تقريبًا وبيحتفلوا بعد انتهاء الشهر ده.
الإغريق برضه كانوا بيصوموا، بس لأسباب يمكن تكون علاجية أكتر منها دينية أو روحانية، يعني بيصوموا علشان يتخلصوا من أي زوائد في الجسم، ويستعيدوا صحّتهم ولياقتهم.
الناس اللي بيتمنعوا من الصيام غالبًا بيتمنعوا لنفس الأسباب في الديانات كلها، يعني المرأة الحامل أو اللي بتُرضع مابتصومش، وكِبار السن مابيصوموش، والمصابين بمرض أو اضطراب ما _سواء في المعدة أو غيرها_ بيصعّب الصيام فدول كمان مابيصوموش، أو اللي على سفر برضه كذلك. يعني عمومًا اللي مابيصوموش ليهم نفس الأسباب في الديانات كلها تقريبًا.
في طبعًا بعض البشر، مابيتبعوش أي ديانة، وبيصوموا لأسباب تانية يمكن علمية أكتر، لأن الصيام بيكون بالنسبة لهم طريقة للتخلص من السموم اللي موجودة في الجسم، عن طريق الصيام لمدة تلات أيام، والفترة دي بتسمح للجسم بتجديد خلايا الجهاز المناعي، حسب دراسة نُشرت سنة 2014.
باختصار، معظم البشر في العالم بيجربوا الصيام على الأقل مره في حياتهم، لأسباب مختلفة، لذلك، وبشكل عام يعني، كل عام وكل البشرية بخير.
المصادر: yahoo cru hinduismfacts
