حلم ”الخلود“ ابن عم الحلم الأمريكي بالظبط!
كتبت: مها طه
حاليًا متوسط أعمار البشر فى العالم هو 71 سنة للرجالة و73.5 سنة للستات. فى بعض الدول ممكن يوصل أكتر من كده زى أسبانيا واليابان وأستراليا. في ناس بتعيش أكتر من كده طبعًا وفي معمرين بيوصل عمرهم لمية سنة وأكتر بس مش بيملثوا النسبة الغالبة بالتأكيد. السؤال هنا ليه الخلود مستحيل؟ الشئ اللي البعض بيسعى له وعنده هوس بيه واتعملت أفلام سينما عنه تحديدًا واتكتب فيه روايات عن الشباب الأبدي أو الخلود!
قبل حوالى 10 آلاف سنة البشر ماكنش عندهم الأمل إنهم يعيشوا أكتر من 30 سنة، ومن حوالى 100 سنة بقى متوسط العمر حوالى 50 سنة، وبكده يُعتبر إن البشر حققوا ارتفاع كبير فى متوسط العمر خلال القرن الماضى، فعلى كده فغالبًا هنفضل نحقق ارتفاع ملحوظ وده نتيجة التقدم العلمى.
الأبحاث اللى اتعملت فى المجال ده كلها أثبتت إن فى مجموعة من العوامل بتدخل مع بعضها للتحكم فى العمر اللى ممكن يوصله الشخص منها جيناتك والمكان اللى بتعيش فيه ونظام أكلك حتى كمية الأشعة الفوق بنفسجية اللى بتتعرض لها، كمان ساعتك البيولوجية اللي بتظبط إيقاعك الداخلى واللي بتفضل تشتغل لفترة معينة، بمعنى تانى إحنا أصلًا مبرمجين عشان نموت فى الأخر.
فى دراسات اتعملت عشان تعرف إزاى إحنا بنتقدم فى العمر لحد ما نوصل لمرحلة الوفاة، الدراسة ركزت على دراسة عملية انقسام الخلايا فى الجسم، واللى كنتيجة ليها بيبدأ الـDNA يتآكل تدريجيًا!
فى كل مرة بتنقسم الخلايا _والانقسام عملية طبيعية بتحصل طول الوقت عشان تجدد الخلايا_ بتنسخ الـDNA عشان كل نسخة من الخلية تبقى فيها نسخة من نفس الـDNA الأصلي. الـDNA بيبقى موجود فى الخلايا فى شكل كروموسومات، نهاية الكروموسومات دى بتبقى عبارة عن أجزاء من الـDNA بتُسمى ”تيلومير“، وظيفتها هى حماية أطراف الكروموسوم من البيئة المحيطه بيه عشان ما يتفاعلش معاها ويتغير تركيبه الأمر اللي ممكن يؤدى لظهور طفرات جينية خطيرة.
المشكلة بقى إنه فى كل انقسام خليه بيبدأ جزء من التيلوميرات دى يتآكل، بتآكل التيلوميرات دى تمامًا، الخلية بتفقد قدرتها على الانقسام.
الخلود البيولوجي الموجود فعلًا عند بعض أنواع الديدان المفلطحة اللى بتقدر تجدد التيلوميرات دى بشكل لا نهائي، وبالتالى مهما انقسمت فهى هتحافظ على قدرة خلاياها على الانقسام، طب وليه العلم مايطورش طريقة نقدر بيها نحمى أو نجدد التيلوميرات عندنا، وبالتالي نوصل للخلود أو حتى نقدر نطول أعمارنا على الأقل لمدد أطول؟
السبب الرئيسى اللى يخلينا مانقدرش نعمل كده هو السرطان! لما الخلايا تنقسم كده بشكل لا نهائى فهى فعليًا هتتحول لخلايا سرطانية مش ممكن السيطرة عليها وعشان كده عملية التقدم فى العمر هى عملية طبيعية وحقيقة كونية ثابتة تقريبًا، فبلاش حب الحياة الغير مبرر لأن من الأخر حلم الخلود زي الحلم الأمريكي كده الاتنين هيرسوا على مافيش وهتتحقق نبوءة الأستاذ أحمد بدير وهنموت كلنا للأسف!
المصادر
