![](https://neonsciences.com/wp-content/uploads/2016/05/U0627U0644U0639U0644U0627U0642U0629-U0645U0627-U0628U064aU0646-U0641U064aU062aU0627U0645U064aU0646B12-U0648U0627U0644U0641U0633U0641U0648U0633U0629.png)
العلاقة ما بين فيتامين B12 والفسفوسة!
كتبت: مها طه
فيتامين (ب12- B12) هتلاقيه فى اللحوم ومنتجات الألبان، بيساعد المخ عشان يقوم بوظايفه بالشكل المطلوب بالإضافة لإن وجوده بنسب كافية بيمنع الإصابة بالأنيميا، الفيتامين ده بيغير التركيب الجينى لبعض أنواع البكتريا اللى بتعيش على الوجه. وهنا تكمن المشكلة بقى! فيتامين (ب12 أو B12) تريطه علاقة غير لطيفة بالفسفوسة حيث إن التغيير الجيني لبعض أنواع البكتريا ده بيؤدى لإلتهابات سريعة فى الجلد واللى بتؤدى لظهور الحبوب وده اللى قاله مجموعة من الباحثين الأمريكان.
فيتامين (B12) والفسفوسة … ليه؟!
الحبوب أو البثور مش بس اللى بتطلع للمراهقين فى فترة معينة، كلنا فى مرحلة ما من حياتنا ظهرت عندنا الحبوب بشكل أو بآخر وحوالى 80% من الأشخاص بيصابوا بيه فى السن ما بين 11 و30 سنة، وبالرغم من إنها منتشرة جدًا بين البشر إلا إن العلماء لحد دلوقتى ميعرفوش كتير عن أسباب ظهور حب الشباب أو كيفية الوقاية منها وعلاجها.
”هوى ينج لي“، أستاذة علم الصيدلة الجزيئية فى جامعة كاليفورنيا، قررت إنها تدرس تأثير المستويات العالية لفيتامين ب12 كسبب فى ظهور الحبوب، بناءًا على أبحاث اتعملت فى الـ60 سنة الأخيرة على أشخاص قالوا إن تعاطي فيتامين (ب12) اقترن عندهم بظهور حبوب.
أول شئ عملوه فى البحث هو إنهم حددوا مسار التفاعلات البيولوجية اللى بينتج عنها فيتامين ب12 فى البكتريا المسببة للإصابة بالحبوب فى الجلد، وقارنوا ما بين جلد أشخاص عاديين وأشخاص مصابين بحب الشباب، فلقوا إن تخليق فيتامين ب12 فى الحبوب منخفض بشكل ملحوظ فى المرضى عنه فى الأشخاص العاديين.
بعدها قرروا إنهم يدرسوا آثار زيادة تعاطى ب12 من مصادر خارجية على مستوى ب12 الموجود طبيعيًا فى البكتريا اللى بتعيش على الوجه، جمعوا 10 متطوعين بيتمتعوا بجلد صحى ونظيف وطلبوا منهم يتعاطوا جرعات من فيتامين ب12.
الباحثين أكدوا إن تعاطى جرعات من ب12 عطّل الجينات الموجودة فى البكتريا عن إنها تعبر عن نفسها وبالتالى مستوياتها قلت جدًا فبقت مشابهة تمامًا للمستويات الموجودة فى المصابين بالحبوب، وبالتالى فتعاطى جرعات زايدة من ب12 بيدفع البكتريا الموجودة فى الجلد لإن إفرازها يكون أقل وبالتالى يزيد خطر تكون الحبوب فى الجلد.
طبقًا للبحث ده فى واحد من المشاركين فعلًا ظهرت عنده حبوب بعد أسبوع واحد من تعاطى جرعات فيتامين ب12، لكن البحث أثبت إن جلد الأشخاص العاديين بقى مشابه لجلد المصابين بالحبوب بعد 14 يوم (يعني أسبوعين) من تعاطى الجرعات دى.
الفريق تابع البحث فى المعامل وقاموا بإضافة ب12 للبكتريا نفسها، فلقوا غن البكتريا بتنتج مادة إسمها ”البورفرين“، المادة دى بتتسبب فى الالتهاب اللى بيحصل ويؤدى لتكوُن الحبوب دي. وعليه، كده البحث أثبت العلاقة الوثيقة بين الإصابة بالحبوب وزيادة فيتامين ب12.
قبل ما تبطل تاكل أى نوع من اللحوم أو الألبان اللى ممكن تكون غنية بفيتامين ب12، لازم تفتكر إن دى لسه دراسة محتاجة لدراسات تانية كتيرة لحد ما يتم إثباتها بشكل قاطع، ونتمنى إن العلماء يقوموا بأبحاث تانية فى نفس المجال لحد ما نقدر نتوصل لأسباب حقيقية لظهور الحبوب وبالتالى نقدر نعالجها بكل سهولة ومن غير ما تسيب أثر مؤذي.
المصدر: livescience