للأسف جسم حضرتك لا يقبل القسمة على اتنين!
كتبت: يارا كمال
– لأ ماتصوريش، استني أقف الناحية التانية معلش.
= يا بنتي، ما الناحية دي زي الناحية دي.
– لأ، أصل أنا بروفايلي اليمين أحلى من الشمال.
إحنا من بره الناحية اليمين تشبه الناحية الشمال، بشكل كبير جدًا يعني. ممكن الناحيتين يختلفوا في حاجات بسيطة: غمازة هنا، حسنة هنا، عين أوسع من التانية حاجة بسيطة أوي، عشان إحنا مش تماثيل.
السيمترية أو إن حاجتين يبقوا قد بعض، عمومًا بتُعتبر من علامات الجمال. وإحنا حلوين أوي من بره وسيمتريين في نفسنا لكن السؤال يا ترى إحنا كده كمان من جوه؟
في الحقيقة، لأ. توزيعة الأعضاء في جسمنا مش سيمترية خالص: يعني القلب والمعدة والطحال والبنكرياس موجودين في الشمال، في حين إن المرارة ومعظم الكبد في اليمين، حتى الرئتين مختلفين عن بعض، الشمال فيها فصين، أما اليمين فيها 3 فصوص، ورغم إن فصين المخ شبه بعض إلا إن وظايفهم مختلفة.
ممكن أعضاءنا تتشقلب ويبقى يميننا شمالنا وشمالنا يميننا؟!
آه ممكن، والحالة دي بنسميها ”situs inversus“، وأحيانًا ده مابيبقاش فيه منه ضرر، بس لو فيه أعضاء اتقلبت وبقت الناحية التانية وأعضاء لأ، ده ممكن يبقى مميت خصوصًا لو القلب دخل في الموضوع، يعني يا إما المجموعة يمين كلها تبقى شمال والعكس صحيح، يا إما كل حاجة تفضل في مكانها.
بس يا ترى إيه اللي بيخلي نص جسمنا اليمين مختلف عن النص الشمال؟
بصوا، الجنين أول ما بيتكوّن بيبقى النص اليمين والشمال منه متطابقين. بس فيه نظرية بتركّز على حاجة جوا الجنين اسمها ”node“ أو العقدة. العقدة دي بتبقى متبطّنة بشعيرات صغيرة اسمها ”cilia“ أو الأهداب. الأهداب دي بتفضل تتحرك وتميل في نفس الاتجاه. الحركة دي بتزق سائل جوا العقدة من الجانب اليمين في الجنين للجانب الشمال.
على طرف العقدة الشمال، فيه أهداب تانية بتحس بتدفق السائل ده، فتبدأ تنشّط جينات معينة على الجانب الشمال من الجنين. الجينات دي بتوجّه الخلايا إنها تعمل بروتينات معينة، وفي خلال ساعات قليلة، بتبقى الناحية الشمال في الجنين مختلفة عن الناحية اليمين كيميائيًا.
مع ذلك، نصين الجنين بيبقى شكلهم لسه متطابق، بس في الآخر الاختلافات الكيميائية دي بتترجم لأعضاء مش زي بعضها في النصين. أول عضو بيبان فيه عدم السيمترية دي هو القلب، والقلب بيتكوّن بدءًا بقناة مستقيمة موجودة في وسط جسم الجنين، ولما الجنين يوصل سنه 3 أسابيع، القناة دي بتتني على شكل حرف c، وبتلف ناحية النص اليمين من الجسم. بعد كده القلب بيبتدي ينمو من كل ناحية بشكل مختلف لحد ما يوصل لشكل القلب المعروف اللي مابيكونش سيمتري. وباقي الأعضاء الرئيسية بتطلع برضه من قناة مركزية كده، وتفضل تنمو لحد ما تاخد شكلها النهائي.
الفكرة بقى إن فيه كائنات تانية زي الخنازير معندهاش الأهداب الجنينية دي، مع ذلك جسمها من جوه مش سيمتري برضه.
بس أوعى تفتكر إن إحنا عشان مش سيمتريين من جوه إننا وحشين، لأ ده إحنا قمرات. افتكر موجة البحر اللي شكلها سيريالي كده مع ذلك بتسحر قلوب الناس. إيه الأوفر ده! على العموم أديك عرفت أنت ليه نصك اليمين مش شبه الشمال.
المصدر
