عن “الغدة النخامية” :القرد لسه بيتنطط ولا بطّل تنطيط؟
كتبت: يارا كمال
فاكرين فيلم ”جري الوحوش“ لما حسين فهمي كان عايز يزرع حاجة اسمها (Anterior lobe) لنور الشريف عشان يقدر يخلّف؟ الأنتريور لوب ده هو الفص الأمامي من غدة اسمها الغدة النخامية. الغدة دي هي اللي بتتحكّم في كل أنشطة الجسم.
الغدة النخامية هي غدة صماء (يعني غدة بتفرز هرموناتها في الدم مباشرةً) بتفرز هرمونات بتنظم عمل باقي الغدد الصماء. لكن المسألة مش سايبة، والجسم كل حاجة فيه بتسلّم التانية. الغدة دي موجودة تحت مكان في المخ اسمه ”تحت المهاد“. الجزء ده هو اللي بيقرر الغدة دي تفرز إيه وماتفرزش إيه عن طريق حاجتين: رسايل كهربية ورسايل هرمونية. طب الرسايل الكهربية وفاهمينها، لكن إزاي رسايل هرمونية؟ هو المخ بيفرز هرمونات؟ أيوه، الخلايا العصبية بتفرز هرمونات للغدة النخامية بتؤمرها إنها تفرز هرمونات أو تمنعها.
بتستجيب الغدة النخامية للرسايل الهرمونية اللي جاية لها من تحت المهاد عشان تفرز الهرمونات دي:
- هرمون النمو: اللي بيزوّد حجم العضلات والعضم.
- الهرمون المحفّز للغدة الدرقية (دي غدة مسئولة عن كتير من عمليات التمثيل الغذائي وهي العمليات الكميائية اللي جوه الجسم واللي بتخليه يحلل العناصر الغذائية من الأكل زي النمو واستهلاك الطاقة).
- هرمون بيحفّز إنتاج المبيض عند الستات، وبيحفّز إنتاج الحيوانات المنوية عند الرجالة.
- الهرمون اللوتيني: بيحفّز المبايض عند الست إنها تفرز هرمون الإستروجين (هرمون الأنوثة)، وبتحفّز برضه إنتاج الحيوانات المنوية عند الرجالة.
- البرولاكتين: وده الهرمون اللي بيحفّز الثدي إنه ينتج لبن.
- هرمون بيخلي الغدة فوق الكلوية تنتج مواد مهمة شبه الإسترويدات (مركب عضوي مابيدوبش في الميه من أصل نباتي أو حيواني – الهرمونات للي بتتكون من استرويدات بتفرزها الغدة فوق الكلوية وغدد صماء تانية).
أما الهرمونات اللي بتفرزها الغدة النخامية لما ”تحت المهاد“ بيبعتلها رسايل كهربية:
- الهرمون المضاد لإدرار البول (الفاسوبريسين): ده بيحفّز الكلية إنها تعيد امتصاص السوائل وتنتج بول أقل عشان تحافظ على الميه في جسمنا.
- الأوكسيتوسين: اللي بيبدأ ألم الولادة وتقلصات الرحم وإفراز اللبن عند الأمهات.
الغدة النخامية بتتكوّن من: فص أمامي (Anterior Lobe)، فص خلفي (Posterior Lobe)، جزء متوسط (Intermediate Part)، ساق الغدة النخامية (Pituitary Stalk)، ودي بتوصّل الفص الخلفي بتحت المِهاد.
الفص الأمامي والفص الخلفي بيشتغلوا بشكل مستقل عن بعض. الفص ده هو اللي مسئول عن الهرمون المحفّز للغدة الدرقية، والهرمون المحفّز للمبيض والخصية (المفروض عشان كده حسين فهمي فكّر يزرع الجزء ده لنور الشريف)، والهرمون اللوتيني، والهرمون اللي بيحفّز الغدة فوق الكلوية. الهرمونات دي بتتحكم في عمل غدد تانية. فيه هرمونات الفص الأمامي بيفرزها بتعمل تأثير مباشر على الجسم زي هرمون النمو وهرمون البرولاكتين، اللي بيأثّر على الغدد الثديية والمبايض.
غير إن تحت المهاد بيتحكم في الفص الأمامي في إنه يفرز هرموناته، هو كمان بيحدد نسب الهرمونات في الدم، فلو لقى مثلًا هرمون الغدة الدرقية قليل في الدم، الغدة النخامية وتحت المهاد يزوّدوا الهرمون اللي بيحفّزها عشان تفرز هرمون أكتر.
أما الفص الخلفي فده المسئول عن هرمون الأوكسيتوسين بتاع الولادة وهرمون الفاسوبريسين اللي بيتحكّم في السوائل اللي في جسمنا.
الجزء الوسطاني ده بقى بيفرز هرمون الإنترميدين اللي بيأثّر على الجلد لإنه بيحفّز الصبغة (الميلانين) اللي في جلدنا اللي بتحمينا من أشعة الشمس فوق البنفسجية والخلايا العصبية في المخ، وكمان بيتحكّم شهيتنا وررغبتنا الجنسية.
أظن لو الفكرة اللي في الفيلم اللي حصلت دي كانت في الواقع، القرد اللي كان محمود عبد العزيز بيسأل عليه دايمًا عشان اتعملته العملية قبله، لا كان بقى بيتنطط ولا بيعمل أي حاجة خالص!
المصادر
- theses.lib.vt.edu
- b endocrine colored lecture.doc
- umm.edu
- arbl.cvmbs.colostate.edu
- betterhealth.vic.gov.au
- betterhealth.vic.gov.au
- ncbi.nlm.nih.gov
مصدر الصورة:
