الرجالة بتعجز قبل الستات.. عقليًا!
كتبت: مها طه
اكتشف العلماء فرق جوهري بين الرجالة والستات فى العمر العقلى، حيث إنهم توصلوا لإن خلايا تحت القشرة المخية بتعجز فى الرجالة قبل الستات وده السبب إن الرجالة بيبقوا مُعرضين أكتر للإصابة بالأمراض العصبية زى الشلل الرعاش لما يكبروا فى السن.
البحث عمله مجموعة من علماء الأعصاب فى جامعة سيجيد فى المجر، وتضمن تركيب المخ فى 53 راجل و50 ست كلهم من نفس العمر، وكان التركيز على تركيب تحت القشرة المخية، الجزء ده من المخ هو المسئول عن التحكم فى الحركة والمشاعر، كمان بدأ العلماء يقارنوا منطقة ”المهاد“ المسئولة عن نقل المعلومات بين أجزاء المخ المختلفة فى أثناء التفكير.
البحث أثبت إن وظائف المخ بتبدأ تضعف وحجم المهاد فيه بيبدأ يقل عن العادى، كل ما الشخص بيكبر فى العمر، لكن الحقيقة إن فى مناطق معينة فى مخ الرجالة حجمها اصبح أقل أسرع بكتير منها فى الستات، وهي المناطق المسئولة عن التحكم في حركة الجسم بالإضافة لإن المنطقة الرمادية_ المكون الرئيسى للجهاز العصبي المركزي واللي بتتكون من الخلايا العصبية_ فى المخ كان معدل الشيخوخة في خلاياها أعلى فى الرجالة من الستات!
البحث ده أثبت وجود فروق كتيرة بين مخ الرجالة والستات، مثلًا مخ الرجالة أكبر_ولأ مش معناه إنهم أذكى ولا حاجة_، أبحاث كتير تانية أثبتت إن الرجالة أكثر عرضة للشلل الرعاش فى حين إن الستات أكثر عرضة للزهايمر، البحث الجديد أشار لأن التغير الهرموني هو أحد الأسباب المسئولة عن ده بالرغم من إنه فعليًا محدش قدر يعرف هى الأسباب دي بالتحديد، النتائج اللى وصلها البحث ممكن يبقى ليها تأثير مهم فى تفسير الاختلافات دي بين الراجل والست عن طريق دراسة العوامل الثابتة اللي زي العمر والجنس ومقارنتهم بالتركيب التشريحى لكل طرف فيهم وده اللى وضحه الرنين المغناطيسي على المخ للمشاركين فى البحث.
طبعًا الفرق فى حجم وتركيب الخلايا تحت القشرة المخية بيؤدى للإصابة بأمراض عصبية مختلفة زي الشلل الرعاش واضطراب نقص الانتباه وفرط الحركة والنشاط وغيره من الأمراض، وطبعًا فهم التغيرات دي هيفيد فى دراسة ومحاولة فهم الأمراض دي وعلاجها، بعد الدراسة هيكون مطلوب إن الأبحاث تتوالى وتحاول تكشف الأسباب ورا إن المخ عند الراجل والست مختلف وعلى أساسه بيتحدد العلاج المناسب للمرض العصبب سواء كان في ست أو راجل.
المصدر
