يا داخل بين البصلة وقشرتها هينوبك حاجات كتير غير ريحتها

كتب: أحمد حسين

بالرغم من أن البصل من أكتر الخضروات شهرةً في العالم، إلا أنه كمان من أكتر الخضروات المكروهة لأسباب تتعلق بالرائحة النفّاذة، والدموع اللي بسبب هذه الرائحة. كمان البصل مش بس واحد من أهم وأشهر مكونات المطبخ وعنصر أساسي في أغلب الوصفات، لكنه من ضمن أكتر الخضروات اللي بيستفيد منها البشر في العموم.

البصل والجيوب الأنفية

الميزة دي بالذات من أكتر مميزات البصل شهرة بين البشر. أول ما تحس بانسداد في الجيوب الأنفية، جرب تجيب بصلة وتفرمها وتبدأ في استنشاق رائحتها (أو  تحطها جنبك وأنت نايم)، وهتكون النتيجة هي تنظيف الجيوب الأنفية، وتخلصك من الشعور السئ بتاع الانسداد ده وكمان تقدر ترجع تشم من جديد وتتنفس بسهولة.

البصل والجروح

بعض الأبحاث اللي تناولت موضوع معالجة البصل للجروح بتقول إن البصل (أو عصير البصل) مفيد بالفعل في علاج الجروح وتنظيفها، لأنه بيحفز إنتاج ”الكولاجين“ (البروتين الأساسي لتغذية الأنسجة). لذلك بدأت بعض شركات الادوية في الاستعانة به في صنع چيل مُعالج للجروح. لكن بالرغم من إن البصل مفيد في علاج الجروح إلا إنه بيأخذ وقت طويل نسبيًا في العلاج.

البصل وآلام الأذن

للبصل قدرة على مقاومة الالتهابات، لدرجة قدرته على معالجة التهابات الأذن . لما تحس بألم في أذنك ممكن تحط قطعة صغيرة جدًا من البصل في تجويف الأذن الخارجية، وتاني يوم هتحس بانخفاض في شدة الألم. لكن لو محستش بالراحة، لازم تستشير طبيب فورًا.

البصل وتنظيف العيون

تقريبًا أكتر ميزة من ضمن مميزات البصل شهرة، في الأاغلب هتكون سمعت جملة من نوعية ”البصل بيغسل العيون“ ولو مرة في حياتك، وعشان نكون أكثر دقة خلينا نقول إن دموع البصل هي اللي بتغسل العيون. لو دخلت اي حاجة في عينك ومش عارف تتخلص منها – وده من أسخف المشاعر في الحياة- ، كل ما عليك هو إنك تبدأ في تقطيع البصل وبعدها عينيك هتبدأ في إنتاج الدموع بغزارة  وده هيساعد على تنظيف عينيك من اي حاجة مزعجة موجودة جواها.

المصادر:   newhealthguide  businessinsider