حاكم الفطريات لكل لون معنى ومغنى ( الجزء التاني )
كتبت: يارا كمال
الفطريات مش مجرد خميرة ومشروم. الفطريات ليها أنواع شكلها مدهش وغريب جدًا، منها اللي الجميل ومنها المقزز ومنها اللي ليها شكل عمرنا ماشفناه قبل كده.في أنواع تانية كتيرة ومدهشة من الفطريات، اللي لها خصائص مميزة عنها وعن إزاي بتعيش، هنكمل بيها الجزء الأول من موضوعنا.
زواج ميمون:
إحنا عرفنا إن الفطريات عشان تعيش أحيانًا بتحتاج تتطفل على كائن حي، وأحياناً بتعيش معاه عيشة تكافلية (نظام شيلني وأشيلك)، ومن أهم أشكال الحياة التكافلية دي الأشنة (Lichen)، وهي إن الطحالب والفطريات يعيشوا مع بعض، ويستفيدوا من بعض، الطحالب توفر الكربوهيدرات للفطريات، والفطريات تحمي خلايا الطحالب الضعيفة من الحرارة والرياح والجفاف.
هنلاقي الأشنة في الغابات الغرقانة بالمطر متعلقة من الفروع الطويلة ومغطية الفروع والجذوع بلون رمادي وأخضر، وفارشة الأرض باللون الأصفر والبرتقاني والأحمر. هنلاقيها كمان في الأماكن اللي الظروف فيها بتبقى قاسية، زي قمم جبال الألب اللي بتعصف بيها الرياح، وفي الصحراء الباردة في القطب الشمالي، وعلى صخور الصحاري الحارة، وفي الشواطئ الصخرية اللي بتضربها الأمواج.
ممكن كمان تعيش في المدن على أعمدة السور وألواح الأسقف، والمعادن والأسطح المطلية والخرسانة والمباني، وشواهد القبور والتماثيل، وعلى الشبابيك الملونة، بس برغم طبيعتها الصلبة دي مبتستحملش التلوث بتاعنا أبدًا ولا تقدر تتعايش معاه، ففي ظل سلوكنا الحالي إحنا ممكن بطريقتنا دي نتسبب في انقراض الكائنات دي. فيه فطريات بتتطفل على الأشنة، مختلفة عن الفطريات اللي بتتكوّن منها الأشنة نفسها، دي بقى عاملة زي العازول في العلاقة بين الفطريات والطحالب.
النمل بيخدّم على البيه:
فاكرين في توم وجيري لما كنا بنشوف طابور نمل كل واحدة فيهم شايلة حتة من ورقة شجر وبيخشوا جوة ودن جيري ويطلعوا من الودن التانية؟ أهو الطابور ده بيخدّم على الفطريات، وبيعيش معاها، وهو اللي بيجيب لها أوراق الشجر، في مقابل إنه ياكل هياكل معينة متضخمة من الأفطورة (Mycelium) بتاعت الفطر اسمها (Gongylida)، ودي بتكون غنية بالجليكوجين (مادة بتتكوّن من الجلوكوز، وبتعتبر زي مخزن يتسحب منه وقت الحاجة للطاقة). يعني من الآخر، مش لله وللوطن، ده بالظبط زي إحنا ما بنزغّط البط، ونعلف البهايم عشان في الآخر ندبحهم وناكلهم.
فيه نوعين من النمل بيعملوا كدة: .(Atta),(Acromyrmex)النمل ده بيغطي قطع ورق الشجر بلعابه المضاد للبكتريا، اللي ممكن تأخر من نمو الفطريات لإنها بتزاحمه في الأكل.
كرة سلة تستطيع أن تغطي الأرض بالفطر:
الجزء الكبير من الفطر هو اللي بيحمل الـ Spores اللي هي صغيرة جدًا أصلًا، فما بالك بقى لو عندك حاجة بحجم كرة سلة مليانة spores؟ فيه نوع من الفطريات اسمه الفطر النفّاث أو (Puffball) ممكن الواحدة فيهم يوصل حجمها لحجم كرة سلة، دي بتحمل من الـSpores ما يكفي في خلال جيلين بالورقة والقلم كدة إنه يكوّن فطريات نفاثة تغطي حجم الأرض 7 مرات! لما الفطر ده بيوصل لمرحلة البلوغ الكورة دي بتتفتح والـ Spores بتتحرر، وتقدر تتنقل مع الهوا. ممكن الفطر الواحد فيهم يبقى فيه 6 مليار spore!
جثة الراجل الميت
رجلين وصوابع الراجل الميت، دي أسماء لفطريات فعلًا. الأنواع دي من الفطريات شكلهم أشبه ببقايا حاجة ماتت. أصابع الرجل الميت الجزء اللي بيحمل الـspores (الجزء المثمر) شبه الصوابع فعلاً، وأحياناً الصوابع دي تتجمّع مع بعض، وتعمل شكل الإيد. قدم الرجل الميت بتبقى الـspores عليها زي التراب كده، وبتبقى منشورة في المكان اللي حوالين الفطر. النوع ده من الفطر بيعيش عيشة تكافلية مع الأشجار القريبة منه.
الكمأ إيز فيري سكسي
الكمأ أو (Truffles) ده فطر بيتاكل، بس على عكس أنواع المشروم المتعارف عليها اللي بتنمو في الغابة، النوع ده بينمو تحت الأرض، وبيشبه كتل التراب أو الحصى اللي متجمعة تحت التربة. طب إحنا بنعرف مكانه منين؟ فيه بعض الحيوانات زي الكلاب والخنازير بتعرف تشم الفطر ده من على بعد حوالي 45 متر. ليه بقى؟ لإن الكمأ ده بيطلّع ريحة شبه ريحة الأندروستينول اللي بتكون موجودة في خصية الخنازيرعشان تجذب الخنازير الإناث.
متقرفش أوي كده. الريحة دي موجودة عند البني آدمين برضه ولنفس السبب، بس موجودة عند الرجالة في العرق اللي تحت الإبط، وعند الستات في البول. عشان كدة الكمأ كان بيستخدم كمثير للشهوة الجنسية، صحيح مفيش معلومات أكيدة عن إنه يقدر يعمل كده، بس ريحة الأندروستينول اللي شبه ريحته فعلاً بتزوّد الانجذاب الجنسي. ليه بقى الكمأ بيطلّع الريحة دي؟ لإنه تحت التربة، فمفيش طريقة الـ spores ممكن تتنقل بيها غير إنها تعدي من خلال الجهاز الهضمي لحيوانات بتحب الكمأ أو بتحب الريحة بتاعته، وتتنقل في حتة تانية مع عملية الإخراج.
أضخم كائن في العالم:
اتفقنا إن فيه فطريات بتعيش عيشة عيشة تكافلية مع النبات زي اللي بتعيش على جذوره عشان تسهل له امتصاص الميه والعناصر المعدنية، مقابل إن النبات يوفر لها السكر والأحماض الأمينية (وحدة البناء الأساسية للبروتين)، الأفطورة (Mycelium) بتاعت نوع اسمه (Armillariabulbosa)ممكن تمتد مسافات طويلة جدًا، يعني مثلاً الفرد الواحد من فطر ممكن يمتد لأكتر من 30 فدان، والنوع ده موجود في ولاية ميشيجان، وده بيُعتبر من أكبر أنواع الفطريات فى العالم. كمان لقوا في واشنطن أفراد من نفس العائلة Armillaria))، النوع ده ممتد لأكتر من ألف فدان في شبكة من الأفطورة موصولة مع المشروم اللي فوق التربة.
المصادر: waynesword si.edu
