عن ”الكالسيوم“: الموضوع أكبر من العظام بكتير!
كتبت: مها طه
أكيد سمعت قبل كده عن الكالسيوم وعارف إنه موجود فى عضمك وسنانك، وكل أمهاتنا فضلوا لسنين يقولوا لنا لازم تشرب اللبن عشان اللبن فيه كالسيمات تبنى عضمك و تخليك قوى، ده غير إعلانات الجبن ومنتجات الألبان كلها اللى لازم تقولك إن المنتج ده مليان كالسيوم وهيساعدك تبقى أقوى، كل ده جميل وحقيقى الكالسيوم من أهم المعادن فى أجسامنا لكن هل ده بس هو دوره إنه يبني العضم؟!
الكالسيوم.. الموضوع أكبر من العظام بكتير!
الحقيقة إن الكالسيوم ده معدن أساسى ماينفعش الجسم يستغنى عن وجوده، وهو مكون رئيسى لبناء العظام والأسنان، وموجود فيهم نسبة 99% من إجماليه فى الجسم، والباقي موجود فى الدم لكن كمان لازم نعرف إن فى أجزاء من الجسم محتاجة وجوده عشان تقدر تقوم بوظيفتها زي القلب والأعصاب، وبيدخل كمان فى عملية تجلط الدم ووقف النزيف (1).
وقبل ما نتكلم عن كل وظيفة من وظايف الكالسيوم فى الجسم بشكل منفصل، لازم نعرف إنه زى أى عنصر تانى فى الجسم لازم يكون فى حدود معينة لا ينفع يقل عنها و لا يزيد وإلا يبقى فى مرض أو خلل معين لازم علاجه، وطبعًا عشان الجسم يضمن إن نسبة الكالسيوم فى الدم لاتزيد ولا تقل، كان لازم يكون فيه طريقة لتنظيم نسبته، وهي التنظيم الهرموني.
التنظيم الهرموني ده بيتم عن طريق غدتين بيفرزوا هرمونات مختلفة عشان تنظم نسبة الكالسيوم فى الدم:
1- الغدة الجاردرقية هى المسئولة عن إفراز هرمون (The parathyroid hormone (PTH، الهرمون ده هو المسئول عن تنظيم نسبة الكالسيوم فى الدم، واللي بمجرد ما بتقل فى الدم بيتم إفرازه، فيزود نسبته تاني ويرجعها للمعدل الطبيعي عن طريق استهداف الكالسيوم الموجود فى العظام وفي الكليتين وفي الأمعاء.
فى العظام: هرمون (PTH) بيحفز خلايا osteoclasts أو الخلايا الآكلة، الخلايا دي بتساعد على تحرير الكالسيوم من العظام وإفرازه فى الدم، الهرمون ده كمان بيقلل نشاط خلايا osteoblasts أو الخلايا البانية، ودي الخلايا اللى بتساعد فى ترسيب الكالسيوم فى العظام، وبالتالى لما يقل نشاطها، بيقل ترسيبه في العظام.
فى الأمعاء: هرمون (PTH) بيزود من امتصاص الكالسيوم الموجود فى الطعام من الأمعاء لكن ده مابيكونش عن طريق مباشر، الهرمون هنا بيحفز تكوين calcitriol وده الشكل النشط من فيتامين د، وهو اللى بيزود امتصاص الكالسيوم فى الأمعاء.
فى الكليتين: هرمون (PTH) بيحفز الكليه عشان تعيد امتصاص الكالسيوم تانى من البول، بحيث إن اللى يخرج منه مع البول يكون نسبته قليلة.
وبمجرد ما نسبة الكالسيوم ترتفع فى الدم وترجع لمعدلها الطبيعى، بيتوقف إفراز هرمون (PTH).
2- الغدة الدرقية هى المسئولة عن إفراز هرمون calcitonin، الكالسيتونين بيُفرز من خلايا C، الهرمون ده تأثيره على نسبة الكالسيوم فى الدم عكس تأثير هرمون (PTH)، الكالسيتونين أهميته كبيرة جدًا فى الأطفال لأنه بيحفز نمو العظام، فى حالة الأشخاص اللى بيعانوا من مجاعة لمدة طويلة لأنه بيقلل من أثر نقص العناصر على كتلة العظام.(2)
العظام والأسنان بتُعتبر كمخازن للكالسيوم اللى الجسم بيحتاجه عشان يقوم بكل وظايفه، نتكلم بقى عن الأدوار المختلفة اللى بيقوم بيها الكالسيوم فى أجهزة الجسم المختلفة:
فى القلب: عضلة القلب هي اللي بتساعد القلب عشان يضخ الدم لجميع أجزاء الجسم بمعدل 70 نبضة فى الدقيقة، وعليه فعضلة القلب لازم تنقبض وتنبسط أكتر من 100 ألف مرة فى اليوم، الكالسيوم بقى هو اللي بيساعد عضلة القلب إنها تنقبض بشكل قوي عشان تقدر تضخ الدم لجميع أجزاء الجسم. وطبعًا فى حالة زيادة الكالسيوم عن النسبة الطبيعية، بتتأثر بيها جدًا ضربات القلب، وبتبقى أسرع لأن العضلة بتنقبض أكتر نتيجة لزيادة الكالسيوم.(3)
فى العضلات: الكالسيوم هو اللى بيساعد الجسم على الحركة أصلًا لأن حركة العضلات بتبقى عبارة عن مجموعة من الانقباضات والانبساطات فى العضلات، وبتبقى الحركة عبارة عن محصلة الانقباض والانبساط ده، الانقباض والانبساط بيحصل نتيجة لتغير نسب الكالسيوم خارج وداخل العضلة.(4)
وعشان نقدر نفهم النقطة دي تحديدًا المتعلقة بدور الكالسيوم في العضلات وإيه اللي بيحصل، فلازم نقول إن العضلة بتتكون من مجموعة من الحزم العضلية، اللى بتتكون من ألياف عضلية، الألياف دي بتبقى عبارة عن مجموعة من القطع العضلية، والقطع العضلية دي هي الوحدة الأساسية المسئولة عن الانقباض والانبساط، يعني من الأخر لما القطع العضلية تنقبض، فالألياف العضلية هتنقبض وبعدها تنقبض الحزم العضلية وده هينتج عنه انقباض العضلة ككل.
القطعة العضلية بتتكون من خيوط بروتينية رفيعة ”أكتين“ وخيوط بروتينية تخينة ”ميوسين“، أيونات الكالسيوم بتساعد فى تكوين روابط مستعرضة بين الأكتين والميوسين فتنقبض العضلة كمحصلة للانقباضات دى، الغشاء المحيط بالليفة العضلية هو اللى بينظم تدفق الكالسيوم داخل الخلايا العضلية، عشان يقوم بالدور ده.(5)
دورأيونات الكالسيوم فى المخ: لما بتوصل الإشارة العصبية للمخ، بيبدأ دور أيونات الكالسيوم عشان تقدر توصل الإشارات من خارج الخلية العصبية فى المخ لداخلها، أيونات الكالسيوم بترتبط بمجموعة من البروتينات وبتؤدى لتنشيطها، البروتينات دي بتعمل تغيرات فى الخلية العصبية، وعلى أثرها بتستجيب الخلية للإشارة العصبية.(6)
فى نقل الإشارات العصبية: الإشارات العصبية هى عبارة عن إشارات كهربية، بتبدأ من المخ، وتوصل لجميع أجزاء الجهاز العصبي، الخلايا العصبية اللي بتستقبل الإشارات دي بتبقى محاطة بغشاء، الغشاء ده بيكون تركيز أيونات الصوديوم والبوتاسيوم جواه وبراه مختلف، وبتغير تركيز الأيونات دي بتتنقل الإشارة الكهربية (العصبية)، أيونات الصوديوم والبوتاسيوم بيتغير تركيزهم نتيجة لحركتهم لداخل الخلية أو لخارجها عن طريق قنوات بتساعد فى تحرير أيونات الصوديوم والبوتاسيوم، وبالتالي نقل الإشارة العصبية خلال الخلية، أيونات الكالسيوم بتبقى كأنها بوابات للقنوات دي، أيونات الكالسيوم لازم تتحرك عشان أيونات الصوديوم والبوتاسيوم تتحرر، وفى نفس الوقت لازم أيونات الكالسيوم ترجع لمكانها قبل ما تتوقف الإشارة العصبية، لأن تراكم أيونات الكالسيوم داخل الخلية العصبية بيؤدى لموتها.(7)
فى عملية التجلط: عملية تجلط الدم من أهم العمليات الحيوية فى أجسامنا، لأنها بتحمينا من خطر النزف لحد الموت، وده السبب فى إن الأشخاص المصابين بأمراض سيولة الدم، بيبقى مجرد الجرح العادى بالنسبة لهم مصيبة، لأنه ممكن يؤدى للموت.
بمجرد ما الجلد بيتقطع بتيجى الصفائح الدموية، وتحاول تكون جلطة عشان توقف نزيف الدم من الجرح، لو مفيش مستويات كافية من الكالسيوم وفيتامين ك ، عملية التجلط هتاخد وقت أطول، ولو اختفوا تمامًا فالشخص هينزف لحد الموت، عملية التجلط بتحصل لما الجرح بيتعرض للهواء، فتتفاعل الصفايح الدموية مع بروتين ”الفربرينوجين“ وتحوله للـ”فبرين“، والفبرين بيبقى عبارة عن خيوط رفيعة أوى، وده بيتسبب فى سلسلة من التفاعلات اللي بتعتمد على وجود مستويات كافية من الكالسيوم وفيتامين K، الفبرين بيتصلب بسرعة جدًا، وييكون القشرة السميكة اللى بتقفل الجرح.(8)
أخر حاجة بقى، لازم نقول إن الكالسيوم عنصر الجسم مابيقدرش ينتجه ولازم يحصل عليه من مصادر خارجية عن طريق الاكل أو المكملات الغذائية اللي بتحتوى عليه، وفي العادي، ماتنساش بس كوباية اللبن كل يوم، وحتة الجبنة القريش ومعاهم بيضة مسلوقة وأنت كده هتبقى زي الفل، وقلل من المشروبات الغازية لأنها بترفع مستوى الفسفور فى الدم وبتخلي الجسم محتاج يزود مستوى الكالسيوم وبالتالي بيتسحب من العظام _لأن العلاقة بين الكالسيوم والفسفور لازم تكون متوازنة_، وعشان كده على المدى الطويل المشروبات الغاوية بتبقى أحد الأسباب الرئيسية للإصابة بهشاشة العظام.
المصادر:
