التنقيب عن الوقود في أمعاءك!
كتبت: يارا كمال
عايزة أفكرك إن فيه بكتريا في أمعاءك. متتخضش كده، أغلب البكتريا دي مش مضرة، بالعكس دي مهمة، وطبعا بعضها مضر.
البكتريا دي بشكل عام اسمها «الإشريكية القولونية» (E.coli). المشكلة مش في كده. الفكرة في إن العلماء وصلوا لطريقة يطلعوا من خلالها وقود اسمه البروبان. الوقود ده بيتحرق ويتفاعل مع الأوكسجين عشان يطلع طاقة وده بيلوّث البيئة، بس هو وقود نضيف لإن الكربون اللي فيه قليل. الوقود ده بيمثل الجزء الأكبر من الغاز البترولي السائل اللي بنستخدمه عشان نفوّل العربيات وعشان أنظمة التدفئة. البروبان منتج فرعي من معالجة الغاز الطبيعي وتكرير البترول، والإتنين هيخلصوا في يوم من الأيام.
أهو العلماء بقى فكروا إننا نطلّع البروبان من حاجة بتتجدد. العلماء وصلوا لإن البكتريا دي ممكن تعوق عملية بيولوجية بتحوّل الأحماض الدهنية لغشاء الخلية. العلماء هيستخدموا إنزيمات تخلي الأحماض الدهنية دي تمشي في مسار مختلف البكتريا تعمل من خلاله بروبان متجدد وجاهز للتشغيل.
كمان فيه علماء بيشتغلوا على الطحالب عشان يطلعوا منها وقود حيوي، بس المشكلة إن البنية التحتية مش مهيئة لفكرة الوقود الحيوي دي أوي. المشكلة دي مش موجودة في البكتريا والبروبان عشان هو بالفعل بيستخدم بس من مصادر تانية، ده كل الفرق.
اللي العلماء اللي اشتغلوا على البكتريا وصلوا له ممكن يُستخدم على طول، بس المشكلة إنهم عملوا كمية أقل ألف مرة من اللي ممكن يتعمل منه منتج ينفع يتباع، زائد إنهم دلوقتي بيحاولوا يعرفوا جزيئات الوقود ده بتتكوّن ازاي.
