من النهاردة طحالب ورياضة ، ورياضة وطحالب!
كتبت: مها طه
الطحالب البحرية بالنسبة لمعظم الناس مش من المأكولات المعتادة، مع إن فى الحقيقة الطحالب بتُعتبر جزء رئيسى من نظام الأكل فى كتير من المدن الساحلية فى العالم، وخصوصُا فى المدن الآسيوية، أما إحنا فغالبًا كل معلوماتنا عن الطحالب هى إنها بتدخل فى السوشي.
لكن حاليًا الكلام بقى عن ضرورة دخول الطحالب البحرية في نظامنا الغذائي اليومي، لأنها صحية، وهتقلل من نسب الإصابة بالسمنة، والتوابع اللى ممكن تنتج عنها، بالاضافة لفوايد تانية كتير.
فوائد الطحالب البحرية
الطحالب البحرية بتحتوى على مواد مهمة لتقليل أمراض القلب والأوعية الدموية، وده اللى توصل له الباحثين فى قسم الفيزياء الحيوية فى جامعة جنوب الدنمارك. لذلك إدخال الطحالب البحرية فى نظام الأكل اليومى مش هايبقى بس دور الأشخاص العاديين، لكن كمان الصناعات الغذائية لازم تبقى مهتمة بوجود الطحالب البحرية فى منتجاتها خاصةً اللى بيتم استهلاكها بشكل كبير.
كل أنواع الأطعمة المُصنعة لازم تتضمن كميات صغيرة من الطحالب البحرية كبديل للتوابل ومكسبات الطعم اللى بتوضع على أكلات زي البيتزا المجمدة، الهوت دوج، المكرونة المجففة، وحتى الوجبات السريعة.
بفحص 35 نوع مختلف من الطحالب البحرية اكتشف الباحثون إنها بتحتوي على مواد غذائية مهمة وضرورية زى الأحماض الأمينية، مضادات الأكسدة، المعادن، الألياف الغذائية، والأحماض الدهنية المفيدة للجسم. الطحالب البحرية ليها نكهة جيدة وبتحتوى على أملاح الكالسيوم المفيدة للجسم لأن خطرها أقل من أملاح الصوديوم اللى ممكن ترفع ضغط الدم.
بالإضافة لإن طعمها مقبول جدًا بالنسبة للبشر، وبكدة بتضمن النكهة وبتحقق الشبع في نفس الوقت، وبالتالى تساعد على التحكم فى كميات الطعام.
من الصعب تحديد كمية الطحالب البحرية اللازمة لتحقيق الاستفادة الحقيقية من فوائدها الصحية. فى تقدير بعض الباحثين من 5 لـ 10 جرام هى الكمية المطلوبة فى اليوم. ومش لازم ناكل الكمية دي من الطحالب بشكل مباشر على الفطار أو الغذاء لكن ممكن ندخلها فى نظام الأكل اليومى عن طريق استبدال 5% من الدقيق اللى بنستهلكه فى اليوم بكمية من الطحالب المجففة، ويتم استخدامها مثلًا فى عجينة البيتزا أو العيش، ونبقى حققنا الاستفادة من الطحالب بدون تأثير كبير على طعم الأكل أو قدرة العجين على الارتفاع.
هل كل أنواع الطحالب البحرية يمكن استخدامها فى الأكل؟أكيد، لأ. مش كل أنواع الطحالب صالحة للاستخدام والأكل، فى بعض الأنواع بتحتوى على كميات كبيرة من اليود، وبعض الأنواع التانية بتحتوى على الزرنيخ _اللي يعتبر مادة سامة_.
ينصح الباحثون بشراء الأنواع المعروفة بقيمتها لغذائية العالية، واللى بتكون آمنة، وكمية قليلة منها كافية لدعم صحة الجسم، وطبعًا مع إنتشار أنواع الطعام الغير صحى دلوقتى فمن الممكن بإضافة الطحالب ليها يتم تقليل أخطارها بعض الشيء، وبكده نقدر ناكل أكل لذيذ، وفى نفس الوقت نحمى نفسنا من أمراض القلب والأوعية الدموية.
المصادر
