الأمراض النفسية والعقلية حبر على ورق! (ألبوم)

كتب: أحمد حسين

مع بداية شهر أكتوبر، بيبدأ الرسامين حوالين العالم يتجمّعوا في مسابقة اسمها ”إنكتوبر -inktober“، وهي حدث عالمي بيشترك فيه الرسامين وبيدعوا برسومات بالحبر على الورق. من سنتين قرر رسّام أمريكي اسمه “شون كوس” المشاركة في المسابقة برسومات تمثل تصوّره للأمراض النفسية والعقلية بشكل مبدع جدًا.

هنتعرف عليهم بالتفصيل مع بعض واحدة واحدة..

اضطراب الرهاب/القلق الاجتماعي (Social Anxiety Disorder):

حالة نفسية تفقد الشخص القدرة على التعامل مع البشر في الحياة اليومية، خصوصًا لو اتحط في موقف إنه يكون في وسط بشر كتير زي جامعة أو مدرسة أو أي احتفال.

اضطراب الاكتئاب الحاد (Major Depressive Disorder):

كل البشر بيشعروا بالحزن ده طبيعي، لكن اضطراب الاكتئاب الحاد بيخلي المريض عايش في حزن طول الوقت، حتى لو بان عليه عكس ذلك في بعض الأوقات، بمعنى إن كيمياء المخ (الهرمونات) بتتغير، فالمخ مابيفرزش هرمون السعادة (السيراتونين) بمعدلات مظبوطة، وده بيأدي بالشخص للحزن الدائم.

اعرف أكتر | بعض الأمور التي يجب أن تعرفها عن الاكتئاب

الأرق (Insomnia):

ممكن تحس إنك مش نايم كويس أو نايم قليل، لكن المصابين بالأرق بيفضلوا لفترات طويلة جدًا مش نايمين، أو نايمين نوم متقطع ومش مريح (مابيناموش كويس يعني)، طبعًا ده بيؤثر بالسلب على حياة المصاب ككل.

اعرف أكتر| عن الأرق وحقائق والنوم الزائفة

اضطراب ما بعد الصدمة (Post-traumatic stress disorder):

مرض نفسي يتعلق بأزمة أو صدمة أو حادث كارثي أو استثنائي. مشكلة المرض ده، إنه بيفضل يطارد المصاب به طول حياته، بمعنى إن المصاب بيحصل له أزمة قوية كل ما بيفتكر الحادث اللي مر بيه. الجميل في الأمر إنه المرض ده بيتعالج عن طريق الجلسات النفسية والأدوية إذا تطلّب الأمر.

اعرف أكتر| عن اضطراب ما بعد الصدمة

الاضطراب ثنائي القطب (Bipolar disorder):

أو ما يطلق عليه “الهوس الاكتئابي” مرض نفسي بينقل المصاب بيه من قمة السعادة إلى أسفل درجات الحزن، ودي مش مجرد تغيرات مزاجية، لأ ده هوس كامل بيخلي المصاب ينتقل في لحظات من الضحك المفرط للبكاء حد الانهيار.

اعرف أكتر| الهوس الاكتئابي طريق الحزن والسعادة معا

اضطراب الشخصية الحدية (Borderline personality disorder):

نوع من أنواع الاضطرابات الشخصية بيطلق عليه اضطراب الشخصية غير المستقرة عاطفيًا، بمعنى إن المصاب به بيكون عنده اندفاعية وعدم اتزان في التعبير عن مشاعره، والعلاقات الشخصية مع الأشخاص اللي حواليه دايمًا مضطربة.

اضطراب طيف التوحد (Autism Spectrum Disorder):

مجموعة من اضطرابات النمو، الاضطرابات دي بتمنع المصاب بها من التعامل بسهولة مع البشر. زائد إن المصاب بيكون عنده عادات متكررة وقليلة جدًا، وده بيمنعه من التفاعل عمومًا مع البشر.

البارانويا/جنون الارتياب الفصامية (Paranoid Schizophrenia):

مرض نفسي مزمن المصاب بيه بيعتقد دايمًا إنه مضطهد من الجميع، وبيشك فيهم طول الوقت إنه بيهددوه أو بيهددوا حياته بشكل أو بأخر. المرض ده مالوش علاج لحد دلوقتي وبيلزم متابعة مع الطبيب لمدى الحياة.

اعرف أكتر| هل بنو إسرائيل مصابون بالبارانويا؟

اضطراب الوسواس القهري (OCD):

مرض نفسي شديد، مش مجرد هزار وإنه الشخص يلاقي لوحة مش معدولة فيتوهم إنه مصاب بوسواس قهري، المرض ده صعب والمصاب به بيفضل ملازم لفعل قهري مايقدرش يتحكم فيه، وممكن يفضل يغسل إيده لساعات طويلة لحد ما إيده تنزف دم، ده غير أفعال تانية كتير على نفس الدرجة دي من الشدّة.

اعرف أكتر| اضطراب الوسواس القهري: إنت عندك OCD؟ 

اضطراب الشخصية الاعتمادية/الواهنة (Dependent personality disorder):

اضطراب شخصي، الشخص المصاب بيه بيفقد القدرة على إتخاذ القرارات، أي قرارات بقى حتى لو قرارات يومية زي إنه يلبس إيه أو ياكل إيه وكده. الشخص المصاب بيه طول الوقت بيهرب من المسئوليات بإنه يعتمد على غيره دايمًا في كل شيء.

فقدان الشهية العصبي (Anorexia Nervosa):

مرض نفسي، عبارة عن اضطراب في الأكل. المصاب بالمرض ده بيفقد شهيته تمامًا تجاه أي أكل وبيقل وزنه جدًا، وبيكون دايمًا عنه خوف مرضي من إن وزنه يزيد، حتى لو ده مش هيحصل بس هو بيكون حاطط في دماغه كده.

اضطراب تبدد الشخصية (Depersonalization disorder):

اضطراب نفسي المصاب بيه دايمًا بيشعر إنه غريب عن الواقع، بمعنى إنه بيراقب نفسه طول الوقت وبيحس إن الأشياء المحيطة بيه مش حقيقية. اضطراب مزعج جدًا وبيعمل مشاكل للمصاب بيه والبشر اللي حواليه كمان.

أجروفوبيا أو الخوف من الميادين/الخلاء (Agoraphobia):

نوع من الفوبيات أو الرُهاب وهو الخوف المرضي من التواجد في الأماكن العامة، أو الخوف عمومًا من التواجد في أي حشد.

اعرف أكتر| أغرب أنواع الفوبيا “اللي تخاف منه، ابعد عنه”

اضطراب تعدد الشخصية (Dissociative identity disorder):

اضطراب/مرض عقلي بيسمح بتعدد الشخصيات داخل عقل الفرد الواحد. المرض ده بيستخدموه المخرجين في أفلامهم لما بيخلوا الشخصية تتصارع مع نفسها، أو مع الشخصية اللي في مخها، ده مابيحصلش في الحقيقة بالشكل ده بالظبط، بس عمومًا الشخص المصاب بالمرض ده بيكون في عقله أكتر من شخصية مختلفة.

متلازمة وهم كابجراس (Capgras syndrome):

الاضطراب ده بيخلي المصاب بيه يفتكر أو يحس إن البشر اللي حواليه دول استُبدلوا بممثلين أو إنهم مش حقيقيين يعني.

متلازمة وهم كوتار (Cotard’s Delusion):

اضطراب بيُطلق عليه أيضًا متلازمة الجثمان السائر، لأنه الشخص المصاب بيه بيشعر دايمًا إنه ميّت، يعني بيتحرك ويروح ويجي بس بيفقد الشعور بإن الأشياء دي بيعملها وهو واعي.

اعرف أكترعن وهم كوتار | 10 اضطرابات عقلية تتلاعب بإدراكك للواقع

اضطراب جرأة المشاركة الاجتماعية (Disinhibited social engagement disorder):

اضطراب بيصيب الأطفال، وبيخليهم ينجذبوا للأشخاص الغريبة عنهم، والغريبة بشكل عام، يعني ممكن (زي الصورة كده) طفل يجري على معتدي أو قاتل منظره مخيف ويتعامل معاه عادي جدًا.

الشيزوفرينيا/الفصام (Schizophrenia):

اضطراب عقلي مزمن وحاد، يعتبر من أشهر الاضطرابات العقلية وبيؤثر على إدراك المصاب بيه للواقع، يعني المصاب بيه دايمًا بتصيبه الهلاوس والضلالات واضطرابات التفكير. المرض ده بيتطلّب علاج ومتابعة مع الطبيب مدى الحياة.

اعرف أكتر| أصوات العقل: ما تفعله الشيزوفرينيا في النافوخ