لأ دي ميه بايتة .. أنا بحبها طازة!
كتبت: يارا كمال
عارف لما تسيب البيت وتبقى سايب إزازة كنت شارب منها بره التلاجة وتسافر كام يوم، فترجع تلاقي الميه في الإزازة عاملة فقاقيع صغيرة وطعمها مختلف شوية؟
أنا بالنسبة لي عادي ممكن أشرب منها بس مابستظرفش طعمها، فيه غيري يقول لأ احنا نملى بدالها عشان الميه دي بقت مضرة. يا ترى هي زي ما هي ولا حصل لها حاجة زي الأكل كده؟ أنا كنت فاكرة إن ده ليه دعوة بركود الميه.
هل ممكن شرب المياه البايتة ولا خطر؟
فكرة إن الميه القديمة تبقى ملوثة ولا لأ بتختلف. د. كيلوج سكواب، مدير معهد المياه بجامعة جونز هوبكنز، بيقول إنك لما تاخد منها شفطة، شفايفك وبُقك بيدخلوا للميه كائنات دقيقة، ومع حرارة المكان وضوء الشمس اللي داخله، الكائنات دي بتتكاثر بسرعة كبيرة.
لكن لو عندك ميه نضيفة محطوطة في حاجة إزاز نضيفة، هتفضل كويسة لمدة يوم أو اتنين. لكن لو سايب ميه لمدة يوم وبعدين أخدت منها شفطة، هتلاقي طعمها اتغيّر لإن بعد مرور حوالي 12 ساعة، ثاني أكسيد الكربون اللي في الهوا بيتفاعل مع الميه اللي في كوبايتك وده بيقلل درجة حموضة الميه حاجة بسيطة، لكن في الأغلب الميه دي بتبقى آمنة للشرب.
أما بقى لو بتستخدم كوباية مش نضيفة يوم ورا التاني، فده هيعرضك لبعض أنواع البكتريا الضارة، وخصوصًا لو حد تاني شرب من كوبايتك أو زمزميتك (أيوة اللي كنت مابتشربش أصحابك منها دي 😀 )، ونقل لك الكائنات الدقيقة اللي في بوقه وخلطها بكائناتك الدقيقة.
بس احتمال مايكونش فيه مشكلة، لو بتغيّر الكوباية كل كام يوم، مش هتبقى الخطر الصحي الفظيع يعني.
إلا بقى لو حد لطيف بيشرب من كوبايتك وبيلمس حافتها بإيده، اللي ممكن يكون ماغسلهاش بعد ما خرج من الحمام مثلًا، قال يعني بيمسح مكان بوقه من على كوبايتك. يمكن البكتريا المسببة للأمراض اللي اتنقلت من إيده في الحالة دي توصل للميه.
طب لو سايب إزازة بلاستيك في دواسة العربية؟
عارف إنت الإزازة اللي بتحط منها ميه للعربية وتسيبها فيها وترجع تشرب منها دي؟
بصوا الحرارة والبلاستيك ميكس سيء. فيه مادة كيماوية اسمها ”بيسفينول أ“ أو (BPA) ومعها مواد تانية كمان بتستخدم في صناعة البلاستيك ممكن تتسرب للميه، لو الإزازة سخنت أو اتسابت في الشمس.
البيسفينول أ بيسبب اختلال هرموني والأبحاث ربطته بشكل مبدئي بكذا خطر صحي زي أمراض القلب والسرطان. ده غير إن أنواع البلاستيك اللي بتستخدم في تعبئة الميه مش معمولة عشان تتغسل ويعاد استخدامها ونملاها مية مرة تانية، يعني المفروض يستخدموا مرة واحدة وبعدين يعاد تدويرهم، ولو عايز إزازة بترجع تتملي، استخدم حاجة إزاز أو معدن.
طب بالنسبة لتخزين الميه لمدد طويلة؟
زي إنك تسيب ميه في شقة المصيف من سنة، وترجع تلاقي إزازة محطوطة وإنت عطشان، فتشرب منها على طول؟
زان ساترفيلد، عالم مهندس في المركز الوطني للخدمات البيئية في جامعة فرجينيا الغربية، بيقول لك إن تخزين الميه لفترات طويلة بيخليها غير آمنة للشرب، وأغلب الخبراء بيقولوا إن ميه الحنفية ليها مدة صلاحية 6 شهور، لإن بعد كده الكلور بيتبدد وده بيسمح للبكتريا والطحالب بالنمو، والنمو ده هيبقى أسرع لو سيبت الميه في منطقة دافية أو مشمسة، أو في حاجة إزاز بس مش مغسول كويس أو مش مقفول كويس.
يعني لو ماما بتحب تعبي أزايز كتير وتحتفظ بيها للطوارئ لو الميه قطعت مثلًا، فماينفعش تسيبها أكتر من سنة، وبعدها المفروض تستبدل الميه دي بميه جديدة، وخصوصًا بقى لو متعبية في أزايز بلاستيك، لإن البلاستيك مش محكم، بدليل إنك ممكن تلاقي الميه قلت من جواه لإنها بتتبخر منه.
المصدر: time
