ياللي ظلمتوا البن وقلتوا عليها مش عارفة إيه!

كتبت: يارا كمال

أنا عارفة إن كلامي مش فارق مع حضرتك وإنك باعتبارك بتحب القهوة، فأي كلام هقولهولك سلبي أو حتى عن فوائد القهوة مش هيقلل من حبك وشربك ليها، ولو حضرتك عنيف شوية وعدواني، ممكن تضربني أنا، بس أنا هخيّب ظنك ومش هسيبك تعمل كده.

الدراسات اللي اتعملت عن القهوة في فترة السبعينات والتمانينات كانت بتدي فكرة عن القهوة إنها مشروب خطير وبتربطه بالمعدلات العالية للإصابة بمرض القلب والسرطان. أما الأبحاث الجديدة، فبتدي صورة أحسن للقهوة.

فوائد القهوة في الأبحاث الجديدة

د. روب فان دام، الخبير في المرض والتغذية بمدرسة هارفارد للصحة العامة واللي بحث في القهوة وآثارها الصحية، هو وزمايله حللوا البيانات الصحية والخاصة بالنظام الغذائي في حوالي 130 ألف بالغ على مدى 24 سنة، ومالاقوش أي دليل على إن شرب القهوة بيزوّد خطر الإصابة بالسرطان أو أمراض القلب والأوعية الدموية.

والكلام ده حتى بالنسبة للناس اللي بيشربوا 1.36 كيلوجرام من القهوة في اليوم. لأ كمان د. فان دام بيقول إن شرب القهوة بشكل منتظم ممكن يخلى الواحد أقل عُرضة للوفاة.

دراسات د. فان دام بتقول إن شرب القهوة ارتبط بالمعدلات المنخفضة من مرض السكري من ”النوع التاني“ والعرضة الأقل لخطر بعض السرطانات والحماية من الشلل الرعاش.

بعض الأبحاث ربطت القهوة بتحسن الذاكرة والمزاج ومستويات الطاقة. وفيه تحليل اتنشر مؤخرًا في جريدة ”Science“ بيقول إن القهوة مرتبطة بتنوّع البكتريا في القناة الهضمية، ودي حاجة من المرجح تكون كويسة.

كمان القهوة ممكن تحميك من نوع قاتل من سرطان الجلد. ليه؟

لإن الكافيين اللي في القهوة بيتفاعل مع نوع من ”جينات الإصلاح“ واللي بيلعب دور في في تطور سرطان الخلايا القاعدية، وفقًا للي قاله د. جايلي هان، وده باحث في الأمراض في جامعة إندايانا في مدينة إنديانابوليس، واللي شارك في الدراسة اللي عن علاقة القهوة بسرطان الجلد. ويمكن يكون ده بسبب المركبات المضادة للأكسدة اللي في القهوة.

بس عمومًا مفيش حاجة مفيدة كده في المطلق. يعني مثلًا الستات الحوامل المفروض يحدّوا من الكافيين الصبح لإن فيه ربط بسيط بين تناول القهوة والإجهاض.

وفيه تقارير بتشير إلى أن الأشخاص اللي عندهم مشاكل بخصوص الكوليسترول ممكن مشاكلهم تزيد بشرب بعض أنواع القهوة. فيه مركبات اسمها ”cafestol“ موجودة في حبوب القهوة طلعت بتعلّي الكوليسترول الضار.

من الآخر كده، خير الأمور الوسط، والكمية المتوسطة من القهوة كويسة، لو ماعندكش مشاكل تتعارض معاها. يعني لو أنت بتتعب من القهوة، فمثلًا مابتعرفش تنام منها أو قلبك ضرباته بتزيد، فأكيد شربها في العموم هيكون حاجة مش كويسة.

المصدر:  time